Lubog na ang Aroma Beach ngunit tigib ng alaala

HAGONOY, Bulacan—Punta tayo sa Aroma Beach!

Ito ang karaniwang maririnig kung tag-araw sa mga kabataan sa bayang ito ilang dekada na ang nakakaraan.

Ang kanilang tinutukoy ay ang isang mabuhanging paltok sa baybayin ng bayang ito sa pagitan ng mga islang barangay ng Pugad at Tibaguin.

Libre ang paliligo sa Aroma Beach na ang pangalan ay hango sa halaman sa tabing dagat na ang tinik ay may isa hanggang dalawang pulgada ang haba.

Dahil nasa baybayin ng dagat, ang Aroma Beach na ayon sa matatandaan nag-iisang beach sa lalawigan, ay nararating lamang sa pamamagitan ng bangkang de motor.

Ito ay hindi kakatwa dahil sa kabila na ang lalawigan ng Bulacan ay may baybaying dagat, ito ay napapaligiran ng mga palaisdaan.

Para sa mga residente ng bayang ito sa baybayin ng look ng Maynila, ang Aroma Beach ay isang paraisong paliguan kung tag-araw.

Bukod sa libre ang paliligo doon, maaari pang makahuli ng mga isdang dagat o kaya mangapa ng mga talaba at alimasag na naiuulam o napupulutan ng mga dumarayo.

“Mahirap malimutan ang Aroma Beach, naging bahagi na iyan ng aming kabataan,” sabi ni Manolito Fabian, 43, dating residente ng Barangay Mercado na ngayon ay nakatira sa bayan ng Paombong.

Inayunan din ito ni Inhinyero Bernardo Vicente ng Maynilad Water Services Incorporated na dating nakatira sa barangay Sta. Monica ng bayang ito ngunit ngayon ay nakatira sa bayan ng Plaridel.

Ikinuwento ni Vicente na bilang dating mag-aaral ng St. Anne’s Catholic High School (SACHS) sa bayang ito, nakarating siya Aroma Beach noong siya ay nasa high school nong huling bahagi ng dekada 80.

Ang mga karanasan nila at alaala sa nagdaang panahon patungkol sa Aroma Beach at dala pa rin nila sa muling pagbisita sa nasabing lugar noong Linggo, Marso 31.

Ngunit ang mga matulain larawang nakintal sa kanilang isipan ay naglaho.

Ito ay dahil sa ang dating mabuhanging paltok na tinatawag na Aroma Beach ay lumubog na sa tubig dagat.

Sa paglusong nina Fabian at Vicente sa dating paltok ng Aroma Beach, umabot sa leeg nila ang tubig ng dagat.

Ngunit katulad sa nagdaang panahon, nadoon pa rin ang kanilang kasiyahan na marating at makapaligo sa Aroma Beach kasama ang kanilang mga kaklase noong High School sa SACHS na ngayon ay tinatawagng St. Anne’s Catholic School (SACS).

“Talon na, mababaw naman, kayang kaya natin ito,” ang pag-aanyaya ni Fabian sa mga kaklaseng noo’y nakasakay pa sa bangkang malaki.

Matapos magtanong sa piloto ng bangka, nagtalunan na rin sa tubig ang mga kaklase niyang sina Froilan Alvarado, Roderick Dela Cruz, Alfredo Lunes, Arnel Sebastian, at Emelito Villanueva.

Siyempre, habang nagsisipaligo panay naman ang kuha ng larawan ng mamamahayag na ito na kaklase rin nila.

Nakasabay rin nilang maligo ang isang pangkat ng mga bakasyunistang nagmula pa sa Lungsod ng Malabon na dumayo sa Aroma Beach sakay din ng isa pang malaking bangka.

Nandoon din ang mga kabataang residente ng Barangay Pugad at Tibaguin na mga nagsipagpasikat sa pagta-tumbling sa tubig mula sa balikat ng kanilang kasama.

Katulad noong kanilang kabataan, nagkayayaan ang magkakaklase na mangap sa baklad na pag-aari ni Lunes na isang kagawad ng Pugad.

Nanguna si Fabian na buong kasiyahang nanisid ng huli sa baklad, ngunit sa kanyang paglitaw ay isang maliit na alimangong bato ng nakasipit sa kanyang hinlalaki.

Lalong nadagdagan ang kasiyahan ng magkakaklase at nagpatuloy si Fabian sa paninisid. Sa muling paglitaw niya at isang kanduli naman ang hawak.

 Sa panayam, nagbalik tanaw si Lunes sa dating kalagayan ng Aroma Beach.

Ikinuwento niya malaki na ang nabago sa bayabayin ng Bulacan.

Ayon kay Lunes, noong dekada 80, kahit maglakad ka ng isang kilometro sa dagat ay hanggang bewang lang ang tubig, ngunit ngayon, sa dating paltok ay hanggang leeg ang tubig.

Sinabi niya na nagsimulang lumubog ang Aroma Beach nong kalagitnaan ng dekada 90.

Batay sa mga naunang pahayag ng mga dalubhasa, ang paglubog ng baybaying dagat katulad ng Aroma Beach ay sanhi ng pagtaas ng tubig sa dagat na dulot ng pagkalusaw ng mga niyebe sa mas malalamig na bansa.

Bukod dito, sinasabi rin ng mga dalubhasa na ang baybayin ng Bulacan ay lumulubog dahil sa land subsidence o paglubog ng lupa.

Ito ay sanhi raw ng sobrang paghugot ng tubig mula sa ilalim ng lupa o ground water na pinadadaloy ng water district sa bawat tahanan.

Dahil sa mga kalagayang ito, ang kabuhayan sa baybaying dagat at lumiiit, maging ang posibilidad ng turismo.

Gayunpaman, ilan ang nagpapayo na sa kabila na lubog na ang Aroma Beach ay maaari pa rin itong maging destinasyon ng mga turista sa lalawigan.

Ayon kina Alvarado at Vicente, ang kailangan lamang ay makabuo ng tour packages kung saan ang mga turista ay susunduin ng malaking bangka mula sa kabayanan ng bayang ito upang marating at makapaligo sa Aroma Beach.  Dino Balabo

‘Team Patay’ di iboboto ng mga laykong Bulakenyo

 

MALOLOS—Lalong lumalaki ang hamon sa mga kandidatong tinaguriang “Team Patay” dahil hindi sila iboboto ng mga layko ng simbahan.

Ito ay dahil sa kanilang pagboto ng pabor sa Reproductive Health Law na ngayon ay nasa ilalim ng temporary restraining order (TRO) na inilabas ng Korte Suprema.

Kaugnay nito, ibinulgar ng mataas na opisyal ng Diyosesis ng Malolos na lahat ng kongresistang Bulakenyo ay nangako kay Obispo Jose Francisco Oliveros na hindi susuportahan ang RH Bill,ngunit iisa lamang sa kanila ang tumupad sa pangako.

Ang paninindigan ng mga layko sa Diyosesis ng Malolos ay taliwas sa pananaw ng ilang puluitiko at opisyal ng Simbahang Katoliko na walang matatag na Catholic vote sa bansa.

Ang desisyon ng mga layko ay nananatiling indipendiente sa simbahan dahil hindi pa naglalabas ng opisyal na pahayag si Obispo Oliveros.

Gayunpaman, inaasahang sa mga susunod na araw ay maglalabas ng opisyal na pahayag ang Obispo, at ayon sa mataas na opisyal ng simbahan, malaki ang impluwensiya ng kinahinatnan ng pagpapatibay sa RH Law sa desisyon ng Obispo.

Ayon kay Father Dars Cabral, tagapamuno ng Commission on Social Communications ng Diyosesis, walang matatag na Catholic vote sa bansa.

Ito ay dahil sa ang mas nakararaming Pilipino ay nabibilang sa pananampalatayang Katoliko.

“Hindi pinag-uusapan ang Catholic vote dahil majority sa atin ay Katoliko,” sabi ni Cabral sa panayam.

Ngunit nagbabala siya na maaaring magbago ang nasabing pananaw habang nalalapit ang halalan,partikular na sa lalawigan ng Bulacana may populasyong halos 3-milyon at may rehistradong botante na umaabot sa mahigit 1.4 milyon.

Ang mga nasabing bilang ay karaniwang mga kasapi ng Simbahang Katoliko.

Ayon kay Cabral kahit hindi pa naglalabas ng opisyal na pahayag hinggil sa halalan ang obispo, nagbigay na ng paninindigan ang mga layko ng simbahan na hindi nila iboboto ang mga kasapi ng Team Patay o mga kandidatong pumabor sa pagpapatibay ng RH Law.

Bukod dito, inihayag ni Cabral na mula pa noong Pebrero ay nagsimula na ang voter’s education program ng Simbahan sa pamamagitan ng Parish Pastoral Council for Responsible Voting (PPCRV).

Ayon pa kay Cabral,ang mga kasapi ng PPCRV sa bawat parokya sa lalawigan ay aktibo;at ang PPCRV ng Bulacan ang nanguna sa pagsasalin sa wikang tagalong ang mga impormasyon at polyetong ipinamamahagi para sa voters education.

Inaasahang higit na darami ang susuporta sa paninindigan ng layko ng Simbahan kapag naglabas na ng opisyal na pahayag si Oliveros.

Ayon kay Cabral, kahit hindi pa nagbibigay ng pahayag ang Obispo kung sino ang iboboto at hindi,malaki ang posibilidad na ang magiging mensahe ng Obispo ay may kaugnayan sa RH Law.

“There will be modification because of the influence of the RH Law, yung mga di pumanig sa paninindigan ng simbahan laban sa RH ay pinaninindigan din ng mga layko na hindi nila iboboto,” ani Cabral.

Kaugnay nito, ibinulgar din ng pari na lahat ng kongresista sa lalawigan ay nakipag-usap sa Obispo bago pagtibayin ng Kongreso ang RH Law.

Sa nasabing pag- uusap, lahat ng kongresistang Bulakenyo ay nangako sa Obispo na hindi nila susuporthan ang RH Bill.

Ngunit ayon kay Cabral tanging si Kinatawan Arthur Robes lamang ng Lone District ng San Jose Del Monte ang nanatilin tapat sa pangako sa Obispo.

Ito ay dahil sa ang iba pang kongresista sa lalawigan ay tuwirang sumuporta sa RH Law, samantalang ang iba ay umalis ng bansa bago pa magbotohan sa kongreso. Dino Balabo

5 patay, P100-M natupok sa 2 sunog

BALAGTAS, Bulacan—Lima katao ang nasawi sa magkahiwalay na sunog na tinatayang tumupok ng mahigit sa P100-milyong ari-arian sa Bulacan noong Linggo, Abril 7.

Ang dalawang sunog ay naganap sa pagitan lamang ng 12 oras. Ang una ay naganap sa Barangay Lolomboy sa bayan ng Bocaue bandang alas-2 ng madaling araw; at ang ikalawa ay sa katabing bayan ng Balagtas kung saan ay nasunog ang pamilihang bayan sa kahabaan ng MacArthur Highway bandang alas-2 ng hapon.

Ang dalawang sunog ay naganap pitong araw matapos masunog ang isang bahay sa bayan ng Hagonoy noong Marso 31o Linggo ng Pagkabuhay.

Ang mga biktima sa bayan ng Bocaue ay nakilalang sina Rodolfo Dela Cruz, 61; ang kanyang maybahay na si Felicita, 51; mga anak na sina Frian, 16; Francis, 11 at apo na si Checy, 11.

Ayon sa Bureau of Fire Protection (BFP) ang sunog ay umabot ng ikalawang alarma.

Kasalukyang nahihimbing sa tulog ang mag-anak nang maganap ang sunog kaya naipit sila sa loob ng bahay.

Ayon sa mga saksi, malaki na ang apoy nang kanilang makita, gayun pa man, agad silang tumawag ng bumbero.

Batay sa pagtaya ng BFP, umabot sa P500,000 ang halaga ng pinsala.

Sa bayan ng Balagtas, tinupok ng apoy ang palengke sanhi ng sunog na nagsimula bandang alas-2:30 ng hapon.

Tinayang umabot sa P100-M ang halaga ng napinsala sa nasunog na palengke . Umabot sa general alarm ang sunog, ngunit wala pang naiulat na nasaktan.

Ayon sa mga saksi, nagsimula ang sunog sa gawing gitna ng palengke kung saan ay matatagpuan ang isang pawnshop.

Mabilis na na kumalat ang apoy at tinupok agad nito ang 90 porsyento ng palengke matapos lamang ang mahigit isang oras.

Nagbunga ng pagkakabuhol ng trapiko ang sunog dahil ang palengke ay matatagpuan sa kahabaan ng MacArthur Highway.

Dahil naman sa sunog, malaking problema ang hinaharap ng mga tindera sa palengke.

Ang insidente ay ikatlo sa Bulacan sa loob lamang ng isang linggo.

Matatandaan na isang bahay ang nasunog sa bayan ng Hagonoy noong umaga ng Linggo ng Pagkabuhay.

Ang palengke naman ng Balagtas ay ikatlong palengke sa lalawigan na nasunog mula noong 2010.

Noong Agosto 2010,nasunog ang palengke ng Hagonoy at noong Agosto 2012 nasunog ang palengke ng Malolos.Rommel Ramos at Dino Balabo

Nagkalat ng balitang maraming namatay sa 4 na pool resort mananagot

  

MALOLOS CITY—Hindi totoo ang kumakalat na balitang maraming namatay sa apat na swimming pool resort sa Bulacan.

Kaugnay nito,nagbabala ang mga opisyal na tutugisin ang sinumang nasa likod ng mapanirang balita matapos silang makipag-ugnayan sa pulisya at National Bureau of Investigation (NBI).

Ayon kay Jose Clemente, may ari ng Ciudad Clemente Resort sa bayan ng Paombong, malaki ang nagiging epekto ng kumalat na balita simula noong Linggo.

Bilang tagapagtatag at dating pangulo ng Bulacan Association of Resort Owners (BARO), sinabi ni Clemente na inisip niyang isang April Fools Day prank ang balita noong Lunes kung kailan ginunita ang nasabing araw.

Ngunit bago matapos ang araw ng Lunes, tatlo pang resort sa lalawigan ang napabalitang may mga namatay matapos makuryente.

Ang unang napabalita ay ang 4K Resort sa Sta. Maria, kasunod ay Agatha Resort and Country Club sa Guiguinto, Jed’s Island Resort sa Calumpit at Villa Lorenzo sa Pulilan.

Iginiit pa niya na ang mga nasabing resort ay ang ilan sa pinakamalalaki sa lalawigan.

Kaugnay nito,sinabi ni Bokal Michael Fermin na nakipag-ugnayan na siya sa PNP at NBI.

Bilang tagapangulo ng Committee on Tourism sa Sangguniang Panglalawigan, inayunan ni Fermin ang naging pahayag ni Clemente.

“Hindi isang biro yung pagkakalat ng balitang iyon, sabotahe na yan sa industriya,” ani Fermin.

Batay sa tala ng pamahalaang panlalawigan may mahigit sa 101 primera klaseng resort sa Bulacan na dinarayo tuwing tag-araw.

Bukod dito,ang Bulacan ay ang itinauturing na wave pool capital ng bansa dahil dito naipon ang pinakamaraming resort na may wave pools sa Pilipinas.

Ang mga resort na may wave pool sa Bulacan ay matatagpuan sa Malolos, Calumpit, San Rafael, Pandi, Sta. Maria at Bocaue.