6-anyos patay sa pagsabog ng isang tricycle na paputok

MALOLOS CITY-- Patay ang isang anim na taong gulang na bata samantalang sugatan naman ang kanyang ama sa pagsabog ng isang tricycle na may kargadang mga paputok sa baranggay Partida sa Norzagaray, Bulacan  bandang alas-otso ng gabi noong Lunes.

Namatay habang nilalapatan ng lunas sa Norzagaray Municipal Hospital si John Ezekiel Silva habang inoobserbahan naman ang kanyang ama na si Noli Silva, kapwa residente ng Guimba, Nueva Ecija.

Ayon sa inisyal na ulat, bumili ng paputok sa Bocaue ang mga biktima at pabalik na ng Nueva Ecija ng biglang sumabog ang pinamiling paputok pagdating sa sa baranggay Partida, Norzagaray na naging sanhi rin ng pagkawasak at pagkasunog ng sasakyan ng mag-ama.

Nagkalat din sa kalsada at maging sa mga puno ay nakasabit ang mga piraso ng mga paputok tulad ng sawa, sinturon ni hudas at mga pla-pla.

Ang isang bahay malapit sa pinangyarihan ng insidente, nabasag daw ang mga salamin dahil sa lakas ng impact ng pagsabog.

Ayon kay Dr. Joselito Santiago, municipal doctor ng Norzagaray  matindi ang naging pinsala sa ulo ng bata na naging dahilan ng kamatayan nito.

Lumabas daw ang utak nito sa insidente kayat ilang oras lamang matapos isugod sa pagamutan ay binawian na ito ng buhay.

Samantalang si Noli naman ay nagtamo ng 1st degree burn at ililipat nila sa mas malaking ospital.

Ayon kay kay P/Supt. Bruno Viola, Jr., hepe ng Norzagaray PNP, self accident daw ang pangyayari.

Aniya galing sa Bocaue ang mag-ama at doon namili ng mga paputok na dadalhin sa Nueva Ecija.

Dahil daw sa init ng tambutso ng tricycle kayat nagsiklab at sumabog ang mga paputok dito.

Nagkakahalaga daw ng trenta mil ang mga pinamiling paputok nina Silva.

Natuklasan na may kargang bomb shell, pla pla, sawa, kwitis at ibat-ibang rebentador ang tricycle ng mag-ama.