Negosyanteng babae nilikida di kalayuan sa kapitolyo

MALOLOS CITY—Patay ang isang babaeng negosyante matapos itong barilin sa ulo ng hindi pa nakilalang salarin habang ito ay nakasakay sa pampasaherong jeep sa harap ng kapitolyo ng Bulacan kahapon ng umaga.

Ang biktima ay nakilalang si Cristina Roxas, 51 anyos, may ari ng Shell Gas station sa Sto Nino Paombong Bulacan.

Ayon sa inisyal na imbestigasyon ni Officer on case PO2 Danilo Torres ng Malolos PNP, dumalo sa isang pagdinig sa Bulacan RTC kaninang umaga si Roxas kaugnay ng kasong isinampa nito laban sa isang malaking carnapping group.

Sumakay ng jeep sa tapat ng kapitolyo si Roxas at kasunod na sumakay sa harapan nito ang lalaking suspek.

Nagbayad daw ng pasahe ang suspek sabay baril sa ulo ni Roxas.

Agad na bumulagta si Roxas at tumakas naman ang suspek na umangkas sa isang nakaabang na motorsiklo.

Narekober mula sa crime scene ang isang basyo ng kalibre .45 baril at mga dokumento ng kasong isinampa ni Roxas.

Ang kaso laban sa isang carnapping group ang isa sa anggulong tinitignan ng pulisya sa Malolos na posibleng motibo sa pagpaslang.

Ang biktima ay dinala sa Blue Cross Funeral Homes para sa kaukulang awtopsiya samantalang patuloy naman ang imbestigasyon ng pulisya hinggil sa naturang kaso.

Napag-alaman na noong ika-8 ng Pebrero 2010 ng harangin at tangayin ng tatlong kalalakihan ang Toyota Fortuner ni Roxas habang siya ay nasa baranggay Guinhawa sa Malolos.

Dahil dito ay nagsampa daw ng kaso ang biktima laban sa hinihinalang malaking grupo ng carnapping na tumangay sa kanyang sasakyan.