Hiling sa CMWD: Aksyunan ang problema sa tubig sa Paombong

PAOMBONG, Bulacan – Walang na namang tubig!

Ito ang karaniwang sigaw ng mga residente ng Barangay bayang ito hinggil sa patuloy na lumalalang problema sa tubig.

Ang problemang ito ay napalulubha pa ng patuloy na pag-init ng panahon kaya walang magawa ang mga resident kungdi magtitiis sa kakarampot na tulo ng tubig sa kanilang mga gripo.

Ang problemang ito ay hindi ngayong lang nararamdaman, sa halip ay mahigit sampung taon, ayon sa isang residente.

“Maraming taon nang ganyang ang sitwasyon ng tubig dito. Mga mahigit sampung taon na nga,” ani Cristina Bullos, 35.

Ayon kay Bullos, na mahigit tatlong dekada nang residente sa Baranggay Sto. Niño, nagsimula ang problema sa tubig noong piñata ang deep well na dating pinanggagalingan ng tubig.

“Dati kasi may poso, may deep well, hindi nawawalan ng tubig dito. Nung piñata ang deep well sa NAWASA na tayo umasa,” aniya.

Labis na hirap ayon sa mga residente ang mabuhay ng kapos sa tubig kaya naman iba’t-ibang paraan ang kanilang ginagawa upang makaipon ng tubig.

Sa pamilya ni Bullos, marami silang malalaking drum na tinatiyaga nilang pag-ipunan ng tubig mula ala-una hanggang alas-kuwatro ng madaling araw.

“Madami kaming drum. Pinupuno (namin) kapag gabi. Puyat ang mga tao sa pag-iipon ng tubig,” kwento niya.

Tulad ni Bullos, pinagpupuyatan din ni Michelle dela Cruz, 35, ang pag-iipon ng tubig para may magamit ang kanyang pamilya sa araw. Maliban dito, sa madaling araw din naglalaba si dela Cruz dahil walang tulo kapag araw.

“Minsan one o’clock naglalaba na ko. Inuubos ko na yung labahin ko para kapag umaga na walang tulo nakalaba na ko,” aniya.

Maliban sa maagang pag-iipon ng tubig at paglalaba, labis na pagtitipid din sa tubig ang ginagawa nina Bullos at dela Cruz dahil sa kakulangan ng tubig sa kanilang baranggay.

“Kapag naliligo ako nakasahod ako sa batya para yung tubig na pinang-paligo ko magagamit pa pambuhos sa banyo,” ani dela Cruz.

“Kapag naligo isang timba lang,” biro naman ni Bullos.

Hindi maikakaila ang hirap ng walang tubig ayon kina dela Cruz at Bullos.

Anila, labis na puyat ang nararanasan  nila makaipon lamang ng tubig dahil laging walang tubig tuwing araw.

Kadalasan ay nagsisimula ang pagtulo ng tubig ng ala-una at matatapos ng alas-singko ng umaga.

“Napakahirap. Minsan kapag naghugas ka ng kaldero may langis langis pa. Hindi mo mahugasan ng maayos kasi nga tipid tipid sa tubig,” ani Bullos.

“Yung gusto mong gawin sa araw hindi mo magawa kasi walang tubig. Saka imbis na makaligo ng maayos ang mga bata dahil mainit hindi magawa dahil kulang sa tubig,” ani dela Cruz.

Ayon kay Bullos, makailang beses na siyang nagreklamo sa City of Malolos Water District (CMWD), ang nagsusuplay ng tubig sa baranggay Sto. Niño. Ngunit kahit anong reklamo ang gawin ay walang pagbabagong nagaganap.

Dahil dito, plano aniya ng kanilang baranggay na gumawa ng sulat na pirmado ng mga residente ng kanilang baranggay na ipapadala sa CMWD.

Ang gagwin nilang hakbang na ito ay suportado ng Kapitan ng baranggay na si Edgardo Cabantog.

“Oo, suportado ko iyon. Dahil alam ko din ang hirap ng walang tubig,” ani Cabantog na labing-anim na taon nang nagsisilbing Kapitan ng baranggay.

Ayon as kanya, minsan ng nagpadala ng pirmadong petisyon, kung saan 300 residente ang pumirma, sa CMWD subalit wala ring naganap na aksyon.

“Nagreklamo na kami sa Water District. Nagbigay na kami ng pirmadong petisyon para aksyunan yung aming problema dito siguro one year ago. Pero wala hindi namin makausap yung manager,” ani Cabantog.

“Ang lagi nilang sinasabi ay gagawan ng paraan (pero) walang aksyon, walang solusyon,” dagdag pa niya.

Batid aniya ng mga opisyal ng baranggay ang lumalalang problema sa tubig at ang hirap na dinadanas ng mahigit apat na libong residente ng Baranggay Sto. Niño.

“Yung sitwasyon ng tubig naging worst. Puyat ang mga tao makaipon lang ng tubig,” ani Cabantog.

Aniya, lalong lumala ang sitwasyon ng tubig noong nasira pa ang water pump dalawang taon na ang nakakalipas. Hindi na aniya ito pinalitan o ginawa ng CMWD.

Dahil sa kawalan ng aksyon ng CMWDt, mayroon ng nakalatag na plano ang baranggay upang masolusyunan ang suliranin sa tubig.

“Sa amin sa baranggay, kung ayaw kaming bigyan ng pansin ng Malolos Water District gumagawa kami ng paraan at humahanap kami ng alternatibo upang masolusyunan ang problemang ito,” ani Cabantog.

Isa sa alternatibong paraan aniya ang pagbabaon ng mga tubo ng Jet Matic na makakapagsuplay ng tubig na maari pang inumin.

Sa kasalukyan aniya ay may mga motor ng Jet Matic ang baranggay na ilalagay sa apat na purok sa baranggay.

Inaasahan aniya na sa buwan ng Agosto pa maikakabit na ang apat na water pumps dahil kulang pa ang kagamitang kailangan para dito dahil sa kakulangan na din sa pondo.

Ayon pa kay Cabantog, may balitang balak nang ibenta ng CMWD ang prangkisa nito sa pagsusuplay ng tubig sa Paombong sa Hiyas Water District.

Kung sakaling matuloy ito, ani Cabantog “Bagong management baka naman maging mas maayos ang serbisyo pagka maganda angs serbisyo ay paniguradong tataas ang singil sa tubig.”

Maliban sa paglalagay ng mga tubo at makina na maaaring panggalingan ng tubig, balak din aniyang magtayo ng isa Baranggay Water Cooperative kung saan magiging serbisyo ng baranggay ang patubig sa bawat esidente.

“Ang tubig ay serbisyo, hindi negosyo. Kaya ang gusto talaga natin ay magkaroon ng isang Water Cooperative. Kumita man ito ay kaunti lang at sa Sto. Niño din mapupunta,” ani Cabantog.  Rosemarie Gonzales

Mga pahayagan sa Baguio humakot ng parangal, Cebu Daily News sumungkit ng 3

Si dating Pangulong Fidel V. Ramos kasama ang mga nagsipagwagi sa 2013 Community Press Awards ng Philippine Press Institute. Larawan mula sa PPI.

LUNGSOD NG PASAY—Limang parangal ang hinakot ng tatlong pahayagang nakabase sa Lungsod ng Baguio sa taunang Community Press Awards ng Philippine Press Institute (PPI).

Ngunit ang nakasungkit ng pinakamaraming parangal ay ang Cebu Daily News na nag-uwi ng tatlong parangal.

Tig-dalawa ang parangal na tinanggap ng Baguio Midland Courier at Baguio Chronicle, samantalang isa ang nasungkit ng Sun.Star Baguio.

Tinanggap ng Baguio Midland Courier ang mga parangal na Best in Business and Economic Reporting, at ang Best in Photojournalism; samantalang ang iniuwi ng Baguio Chronicle ang Best Edited Community Newspaper at Best Editorial Page; kapwa sa hanay ngmga pahayagang inilalathala ng lingguhan.

Ang ikalimang parangal ng pahayagang nakabase sa Baguio ay ang Best in Culture, Arts and History Reporting na nasungkit ng Sun.Star Baguio.

 

Sly Quintos ng Baguio Chronicle at Tony Ajero ng Edge Davao.

Sa pangkalahatan, ang tumanggap ng pinakamaraming parangal ay ang Cebu Daily News na nag-uwi ng mga parangal na Best Editorial Page, Best in Photojournalism, at Special Award na Coke Bayanihan Award on Best Reporting on Disasters.

Ang iba pang nagwagi sa mga lingguhang pahayagan ay ang  Business Week Mindanao (Best in Business and Economic Reporting),The Mindanao Cross (Best in Culture, Arts and History Reporting), at ang The Bohol Chronicle.

Sa hanay ng mga pahayagang inilalathala araw-araw, ang mga nagwagi ay ang Edge Davao (Best Edited Community Newspaper), Visayan Daily Star (Best in Business and Economic Reporting), at Sun.Star Davao (Best in Environmental Reporting)

Ang pagwawagi ng Baguio Chronicle ay ikinagulat at ikagalak ng mga lumahok sa ika-18 Community Press Awards ng PPI.

Ito ay dahil sa ang Baguio Chronicle ay isa sa pinakabagong kasaping pahayagan ng PPI na nagdiwang ng ika-50 anibersaryo nito.

Ang Baguio Midland Courier naman at ang The Mindanao Cross ay ilan sa pinakamatatandang pahayagan sa bansa na kasapi ng PPI.

Ang dalawang pahayagan ay kapwa itinatag noong dekada 40 o mahigit 10 taon bago maitatag ang PPI noong 1964.

Kapansin-pansin na walang nakuhang parangal ang Sun.Star Cebu at Mabuhay sa katatapos na parangal samantalang noong nakaraang taon ay tatlo ang naiuwi ng Sun.Star Cebu at dalawa naman sa Mabuhay.

Noong ding nakaraang taon ay walang naiuwing parangal ang Cebu Daily News ngunit sa katatapos parangal ay tatlo ang nasungkit.

Ang kalagayang ito, ayon sa mga dumalo sataunang parangal ay nagpapatunay lamang na patuloy ang pagsisikap ng ibang kasaping pahayagan na higit na pagbutihin ang kanilang pamamahayag bawat taon.

Sa pagwawagi naman ng Baguio Chronicle sa taon ng ito, nabuo na ang higit na paligsahan ng mga pahayagang nakabase sa parehong lungsod sa tatlong pangunahing islang bansa.

Sa Luzon, inaasahang higit na uunlad ang tunggalian sa pagitan ng Baguio Midland Courier at Baguio Chronicle na kapwa inilalathala ng lingguhan.

Ang katulad na tunggalian ay unang nasaksihan sa pagitan ng Cebu Daily News at Sun.Star Cebu na kapwa inilalatahala araw-araw sa lungsod ng Cebu.

 Ang tungaling ito ay nasundan pang katulad na paligsahan sa pagitan ng Edge Davao at Sun.Star Davao na kapwa rin inilalathala ng araw-araw sa lungsod ng Davao. (Dino Balabo)

Cloud seeding sa Angat Dam,isasagawa anumang oras

 

Engr. German habang nakamasid sa Angat Dam. DB

 

MALOLOS—Tuloy at anumang oras ay maaaring simulan ang cloud seeding operation sa Angat Dam dahil sa patuloy ang pagkaubos ng tubig doon.

Ito ang naging pahayag ni Gladys Cruz-Sta. Rita, pangulong National Power Corporation (Napocor) ilang araaw matapos masawi ang apat katao na nagsasagawa ng cloud seeding sa Magat Dam ng bumagsak sa isang maisan ang eroplanong kanilang kinasasakyan.

“Tuloy ang cloud seeding,” sabi ni Sta. Rita sa isang text message na ipinahatid sa mamamahayag na ito noong Miyerkoles, Abril 30.

Ang mensahe ay tugon ni Sta.Rita sa katanungan ng mamamahayag na ito hinggil sa balitang kumalat na sinuspinde ang cloud seeding sa Angat Dam dahil sa pagbagsak ng eroplano sa Nueva Vizcaya noong Sabado, Abril 26.

Sa kasunod na mensahe ni Sta. Rita, mas nilinaw niya ang operasyon ng cloud seeding.

“Only the Nueva Vizcaya (cloud seeding) was suspended,” aniya.

Mapapansin din sa kasunod na mensahe ng pangulo ng Napocor na lubhang kailangan na ang pagsasagawa ng cloud seeding sa Angat Dam.

Ayon kay Sta. Rita, “anytime ang sa Angat Dam.”

Ito ay dahilna din sa patuloy ang pagkaubos ng tubig sa Angat Damna pinagkukunan ng 97 porsyentong tubig inuming may 13 residente ng kalakhang Maynila, kasama ang ilang bayan at lungsod ng sa mga lalawigan ng Rizal at Cavite.

Batay sat ala, ang water elevation sa Angat Dam ay bumaba sa 183.62 meters above sea level (Masl) noong Miyerkoles.

Ito ay mahigit tatlong metro na lamang bago sumayad sa kritikal na 180masl.

Kapag sumayad sa 180 maslang water elevation sa Angat Dam, ang alookasyong sa irigasyon ng magsasaka ay puputulin upang bigyang prayoridad ang tubig inumin ng kalakhang Maynila.

Una rito, sinabi ni Inihineyro Rodolfo German noong Biyernes, Abril 25 na bago pumasok ang unang linggong Mayo ay sisimulan na ang cloud seeding operations sa Angat Dam.

Si German ang general manager ng Angat River Hydro Electric Power Plant (Arhepp) na nasa ilalim ng Napocor at siyang namamahala sa 53,000 ektaryang Angat Watershed.

 

Hot summer over Bulacan. DB

Igiiit pa ni German na nakikipag-ugnayan na ang Napocor sa Metropolitan Waterworks and Sewerage System (MWSS), National Disaster Risk Reduction Management Council (NDRRMC) at sa Bureau of Soils and Water Management (BSWM) ng Department of Agriculture (DA).

Nilinaw pa niya na ang cloud seeding operations ay tatagalng 60 flight houts at nagkakakhalaga ng P2.6-Milyon.

Ayon kay German, kailangan masimulan samadaling panahon ang operasyon dahil sa naghahabol sila sa seedable clouds.

Sa mga nagdaang taon, nagsagawa rin ng cloud seeding operation sa pagtatangka na makalikha ng ulan at madagdagan ang tubig sa dam at matiyak na may tubig na iinumin ang kalakhang Maynila.

Kaugnay nito, muling ipinaalala ng Napocor sa mga residenteng kalakhang Maynila ang [pagtitipid sa paggamit ng tubig.

Ayon kay German, makabubuting magresiklo ng tubig upang hindi kapusin.

Ilan sa mga payo niya ay isahod ang tubig ginamit sa paghuhugas ng pinggan o paglalaba at gamitin sa pagdidilig ng mga halaman o kaya ay pangluinis sa ibang gamit.

Samamtala, hindi lamang ang Angat Dam ang natutuyuan ng tubig dahil sa kakulangan ng ulan.

Maging ang ibang dam sa bansa tulad ng Pantabangan Dam sa Nueva Ecija at Magat Damsa pagitan ng mga lalawigan ng Nueva Vizcaya at Ifugao.

Noong Sabado, naiulat na isang eroplanong gamit sa pagsasagawa ng cloud seeding sa Magat Dam ang bumagsak na ikinasawi ng apat na sakay nito.

Kabilang sa mga nasawi ay ang pilotong si Philip Jubane, at mga kawani ng  Bureau of Soils and Water Management (BSWM) ng Department of Agriculture (DA) na sina Leilani Naga, Christopher Evan Borja at Melvin Simangan

Sila ay pawang nakasakay sa eroplanong nirentahan ng SN Aboitiz Power upang magsagawa ng clud seeding sa Nueva Vizcaya at Ifugao sa hangaring makalikha ng ulan sa Magat Dam.

Ang SN Aboitiz ay isang Filipino-Norwegian Consortium na namamahala sa power plant ng Magat Dam. Dino Balabo

5 kinasuhan sa sa pagnanakaw at pagpatay sa inhinyerong Hapon

 

MALOLOS—Limang suspek sa pagnanakaw at pagpatay sa isang Japanese engineer sa San Miguel, Bulacan noong Lunes ang kinasuhan noong Miyerkoles, Abril 30 sa Provincial Prosecutor’s Office sa Lungsod na ito.

Ang mga suspek ay nakilalang sina Bartolome Alvaro, Junior Cascano at Armand Lubong na bayaw ni Alvaro. Sila ay pawang naaresto na.

Ang dalawang suspek na kinasuhan ngunit nakalalaya pa ay nakilalang sina alyas Rosendo Cascano alyas “Kalbo” at Jaypee Gunayan alyas “Denden.”

Ang limang suspek ay sinampahan ng kasong robbery with homicide matapos pagnakawan at mapatay ang binatang Japanese engineer na si Katsushige Fujinaga, 60.

Ayon kay Superintendent Fitz Macariola, hepe ng pulisya ng bayan ng San Miguel, naganapang insidente sa kahabaan ng Daang Maharlika Highway sa bahagi ng Barangay Sacdalan sa bayan ng San Miguel noong Lunes, Abril 28 bandang ika-7:30 ng gabi.

Ang Barangay Sacdalan ay matatagpuan di kalayuan sa hangganan ng San Miguel, Bulacan at Lungsod ng Gapan sa Ecija.

Ito ay naganap matapos sunduin nina Alvaro at Ronald Yebes ang inhinyerong Hapon sa Ninoy Aquino International Airport (NAIA) noong Martes sa ganap na ika-2:30 ng hapon upang ihatid sa tahanan ng kasintahan nito sa Lungsod ng Cabanatuan sa Nueva Ecija.

Ang kanilang sinakyan ay isang itima na Toyota Vios na may plakang NQU 691.

Ayon sa salaysay ni Alvaro sa pulis, binunggo ang kanilang sasakayanng isang tricyclesa kahabaanng Daang maharlika Highway sa Barangay Sacdalan at hinoldap sila ng apat na kalalakihang nakasakay sa tricycle.

Pilit na inagawa ng mga suspek ang pera at kagamitan ni Fujinaga ngunit tumutol at nanlaban ito.

Dahil dito, pinagsasaksak ng mga suspek ang inhinyero na naging sanhi ng biglang pagkamatay nito.

Ngunit hindi nakumbinse ang mga imbestigador sa salaysay ni Alvaro dahil maluwag at walang traffic sa kahabaan ng Daang Maharlika Highway noong Lunes ng gabi.

Bukod dito, sa imposibleng abutan ng isang tricycle ang sinasakyang Toyota Vios ng biktima.

Di nagtagal, umamin si Alvaro na sangkot siya sa insidente at itinuro ang pinagtataguan ng apat pang kasamahan na nagbunga ng pagkakaresto sa dalawa pa.

Naaresto sina Cascano at Lubong sa Barangay Tigpalas, San Miguel kung saan narekober ang tricycle na may plakang 3802-DO na ginamit na get-away vehicle,maging ang kutsilyong hinihinalang ginamit sa pagpatay sa Hapon.

.

 Narekober din ng pulisya ang halagang 273,000 yen; cash na P18,000, $56 na cash, isang Sony Vaio laptop, gintong relo at iba pang mahahalagang gamit.

Batay sa imbestigasyon ng pulisya, sina Alvaro at Lubong ng nagplanong nakawan ang biktima, ngunit iginiit ng mga ito na di nila planong patayin ang Hapon.

Ayon kay Macariola, kinasuhan na nila ang mga suspek maliban kay Yebes.

Nahaharap ngayon sa kasong robbery with homicide ang mga suspek samantalang hinahanap pa sina Rosendo Cascano at  Gunayan.

Nakipag-ugnayan na rinang pulisya sa Embahada ng Japan sa Maynila upang makapagsagawa ng awtopsiya sa katawan ng biktima. Dino Balabo

Petisyong recall election laban kay Gob Alvarado isinumite na sa Comelec

 

MALOLOS—Naisumite na sa tanggapan ng Commission on Elections (Comelec) sa Bulacan ang petisyong recall election laban kay Gob. Wilhelmino Alvarado.

Ito ay matapos ang ilang buwan ng bulung-bulungan sa lalawigan na may mga taong nagsusulong ng recall election laban sa punong lalawigan na sa halalan noong Mayo 2013 ay kumandidato na walang katunggali o unopposed.

Batay sa sipi ng petisyon, ang nanguna sa pagsasampang recall election laban kay Alvarado ay si Perlita Mendoza ng 714 Mendoza Street, Barangay Lolomboy,Bocaue Bulacan.

Si Mendoza ay sinasabing dating Provincial Administrator ng kapitolyo sa panahon ng panunungkulan ni dating Gob. Joselito Mendoza na ngayon ay kongresista ng ikatlong distrito ng Bulacan.

Bilang pangunahing petitioner, si Mendoza ay kumakatawan sa 319,707 na Bulakenyong lumagda sa nasabing petisyon.

Sa kabuuan, sinabi ni Abogado Elmo Duque na umabot sa 80 kahon ang isumiteng dokumento sa kanilang tanggapan.

Ito ay dahil sa ang mga nagpetisyon ay nahati sa 12 grupo at ang bawat kopya ng petisyon ay may pitong sipi.

“I confirm na may petition para sa recall election laban kay Governor na isinumite sa aming tanggapan kahapon ng alas-11:30 ng umaga,” ani Duque sa panayam ng Mabuhay noong Martes, Abril 29.

Si Duque ang Provincial Election Supervisor ng Comelec sa Bulacan.

 

Front page ng petisyon.

Sa panayam,nilinaw ni Duque na sa proseso ng paghahain ng recall election,nangangailangan ito ng lagda ng 10 porsyento ng voting  population ng isang local government unit (LGU).

Dahil ang punoing lalawigan ang pinetisyon, ito ay ngangailangan ng 10 porsyento ng voting population ng buong lalawigan.

Batay sa sertipikasyon na ipinagkaloob ng National Statistics Office (NSO) kay Abogado Jolette Fajardo na inilakip sa kopya ng petisyon,ang kabuuang voting population ng Bulacan ay umaabot sa 1,830,698 ayon sa isinagawang census noong 2010.

Ipinaliwanag pa ni Duque na ang voting population ay ang bilang ng mga mamamayan ng lalawigan na may edad 18 taong gulang pataas, rehistrado man o hindi.

Gayunpaman, iginiit niya na kahit nakabatay ang 10 porsyento sa voting population, ang mga lumagda sa petisyon ay dapat nakarehistro bilang botante at bumoto sa halalan noong Mayo 2013.

 

Pagsusuri sa form and substance ng petisyon.

Hinggil naman sa bilang na 319,707 na lumagda, sinabini Duque na, “based on initial assessment, umaabot sa halos 20 percent ng voting population ng Bulacan ang pumirma sa recall petition.”

Sa panayam, nilinaw pang Abogado an ang kanilang ginawa sa isinumiteng dokumento ay “ministerial lamang.”

Kabilang sa kanilang sinusuri ay kung ang bawat pahina ng nilagdaan ng mga nagpetisyon ay nakasulat ang pangalan at posisyon ng pinetisyon, maging ang dahilan kung bakit pinetisyon.

“Importante na nakasulat ang mga impormasyon ito sa bawat signature sheet para walang fraud o panloloko sa pagpapapirma,” ani Duque.

Batay sa  isinumiteng dokumento nakita ng Mabuhay,ang dahilan  ng pagpetisyon kay Alvarado ay ang “loss of confidence due to graft and corrupt practices and abuse of authority” o “kawalan ng tiwala dahil sa korupsyon at pag-abuso sa kapangyarihan.”

Kaugnay nito,nilina ni Duque na may tatlong araw lamang sila upang iproseso ang mga dokumentong isinumite sa kanilang tanggapan.

“Limitado muna kami sa form and substance ng petition dahil three days lang ang allow sa amin batay sa ruling ng Commission,” aniya.

Pagkatapos nito,ay isusumite nila sa Office of the Deputy Executive Director for Operations (ODEDO)  angmga dokumento.

 

Mga kahon ng petisyong isinumite sa Comelec.

Ang ODEDO ay may tatlong araw di lamang upang suriin ang “form and substance” ng petisyon bago ito ilipat sa Comelec En Banc.

Ang En Banc naman ay 15 araw bago maglabas ng desisyon.

Ayon kay Duque, may dalawang posibilidad ang desisyon ng En Banc—tuloy o hindi.

“Pag may pondo, tuloy yan at saka namin sisimulan yung verification kung yungmga pumirma ay registered voters at bumoto sa magdaang halalan,” ani Duque.

Kung wala namang pondo, maaaring makatulad itong desisyon ng En Banc sa katulad na petisyon na isinumite ni dating Puerto Princesa City Mayor Edward Hagedorn laban kay incumbent Mayor Lucio Bayron.

Ang naging desisyon ng Comelec En Banc sa nasabing kaso ay “suspended” ang proceedings dahil saw ala pang pondo.

Ayon kay Duque, maaaring sa 2015 masimulan ang aktuwal na proseso sa recall petition kung ito ay mapondohan sa General Appropriation Act bago matapos ang taon. Dino Balabo