Total ban sa field trip hiniling

PTCA Bulacan Chair Felix Tiongson (2nd from left)

 MALOLOS—Dapat nang ipagbawal ang mga field trip.

Ito ang posisyon ng Federation of Parents, Teachers and Community Association (PTCA) sa Bulacan matapos ang isinagawang pagdinig sa sangguniang panlalawigan  noong Lunes.

Kinabukasan, pinagtibay naman ng SP ang isang indefinite moratorium na nagbabawal sa pagsasagawa ng mga field trip ng mga mag-aaral sa lalawigan, bilang paghahanda sa pagbuo ng ordinansa na magtatakda ng pamantayan at regulasyon sa pagsasagawa ng katulad na gawain.

Ang desisyong ito ng SP ay naganap halos isang buwan matapos masawi sa isang aksidente sa Tanay, Rizal ang dalawang mag-aaral ng Holy Spirit Academy-Malolos (HSAM) noong Pebrero 8.

Ayon kay Felix Tiongson Jr., tagapangulo ng PTCA sa Bulacan, matagal nang inirereklamo ng mga magulang ang malaking halaga na sinisingil ng mga paaralan sa mga mag-aaral kaugnay ng pagsasagawa ng field trip.

Batay sa mga impormasyong naipon ng PTCA, ang halagang sinisingil sa bawat mag-aaral sa pampubliko at pribadong paaralang elementarya hanggang sekundarya ay nasa pagitan ng P800 hanggang P1,500.

“Ang totoo po niyan, ipinangungutang lamang ng maraming magulang, lalo na yung nasa public schools ang pambayad sa field trip ng kanilang anak,” ani Tiongson.

Bukod sa malaking gastos sa halos taunang pagsasagawa ng field trip, hindi rin nauubos ang pangamba ng mga magulang kapag sumama sa field trip ang mga anak nila.

“Hindi po kasi namin alam kung ano mangyayari sa kanila kaya pag-alis pa lang sa bahay ay nagdadasal na kami.

Ang pangambang ito ay hindi lingid kina Dr. Romeo Alip, at Amancio Villameyor,ang division superintendent ng DepEd-Bulacan at supervisor ng Malolos City Schools Division, ayon sa pagkakasunod.

Ayon kay Alip, kapag nagpahatid ng pagpapaalam sa kanya ang mga punong guro ay nagdadasal na siya na makauwi ng maayos ang lahat ng kalahok sa field trip.

Ang pangamba ng mga magulang at ng mga tagapamuno ng DepEd sa Bulacan at lungsod na ito ay may batayan.

Matatandaan na bago naaksidente sina Rio Bianca Ramirez at Pamela Enriquez ng HSAM sa Tanay, Rizal ay napabalita rin ang aksidenteng kinasangkutan sa Enchanted Kingdom ng mga mag-aaral ng Lipana National High School sa Guiguinto may limang taon na ang nakakaraan.

Sa nasabing insidente, nakasakay sa isang popular na ride ang mga mag-aaral nang tumigil ang makina nito at ilang oras ang lumipas bago nakababa ang mga mag-aaral mula sa Guiguinto.

Ayon kay Tiongson, samantalang kinukunsidera ng SP ang pagtatakda ng mga regulasyon sa field trip, mas makabubuting ipatigil na iyon ng tuluyan.

Inayunan din ito ng iba pang opisyal ng PTCA tulad nina Melissa Fernandez ng San Rafael at Jun Lopez ng Bulakan..

Binanggit din nila ang malaking halagang sinisingil ng mga paaralan, partikular na sa mga pribadong paaralan.

Binigyang diin din ito ni Dr. Roberto Ramirez, ang tiyuhin ni Rio Bianca.

Batay sa pagtaya ni Ramirez, kung ang bawat mag-aaral ay sinisingil ng P1,000 at ang bilang ng lumahok ay 300, lumalabas na umaabot sa P300,000 ang nasisingil.

Ang nasabing halaga ay ikunumpara ni Ramirez sa halaga na ibabayad sa mga bus na ayon sa kanya ay nasa pagitan lamang ng P20,000 hanggang P30,000.

Bukod dito, ibinulgar ni Ramirez na may mga pribadong paaralan na sumisingil ng bayad sa field trip bago pa magsimula ang klase, kasabay ng paniningil sa matrikula.

Bokal Ayee Ople

Ito ay ikinagulat nina Alip at mga bokal na sina Michael Fermin, Felix Ople, Ayee Ople at Ramon Posadas.

Ayon kay Alip, nakapagtataka ang paninigil ng maaga sa field trip dahil hindi pa natutukoy ang pupuntahan ay may halaga nang sinisingil.

“It’s either they overcharge the parents or short change them,” ani Alip.

 Para naman sa ama ni Rio Bianca na si Reynaldo, dapat lamang itigil ang pagsasagawa ng taunang field trip.

Sinabi niya dapat ang dumalo lamang sa field trip ay ang mga nasa ikatlo o ika-apat na taon sa sekundarya.

Bukod dito, sinabi ni Reynaldo na dapat palitan ang pangalang field trip dahilang huling tatlong letra nito na “RIP” ay maaaring mangahulugan ng “rest in peace.”

Samantala, pinagtibay ng SP ang isang resolusyon noong Martes na nagtatakda ng indefinite moratorium sa mga field trip.

Ayon kay Bokal Fermin, pansamantalang ititigil ang mga field trip sa lalawigan ng Bulacan hanggang hindi napagtitibay ang inihahanda nilang ordinansa hinggil dito.

Bokal Fermin

Sa pagsasagawa ng isang pagdinig noong Lunes, nagpahayag ng pagkadimsaya sina Bokal Felix at Ayee Ople na sa kabila ng DepEd Order No. 52 na nagtatakda ng mga pamanatayan sa field trip ay hindi ito nasusunod ng mga paaralan.

“Dapat siguro, basahin muna yung DepEd Order, at itigil muna yang mga field trip,” ani Bokal Felix Ople.

Para naman kay Dr. Mariano De Jesus, pabor siya sa moratorium at sa katunayan ay nagtakda na siya nito sa Bulacan State University.

Bilang pangulo ng pamantasan, nilinaw din ni De Jesus na may mga kurso na di mapipigilan ang field trip katulad ng engineering, architecture at tourism.

Nilinaw ni De Jesus na bahagi ng mga nasabing kurso ang pagsasagawa ng field trip. Dino Balabo

Pagsasawalang bahala ni PNoy; pagkabilang ng mga kasapi ng Ampatuan sa LP at UNA, binatikos

HAGONOY, Bulacan—Binatikos ng mga mamamahayag ang pagsasawalang bahala ni Pangulong Aquino sa katarungan at malayang pamamahayag na masasalami sa mga pagkakamali at pagkukulang ng kanyang administrasyon.

Ito ang buod ang nagkakaisang pahayag na inilabas ng mga samahan mga mamamahayag sa bansa kaugnay ng paggunita sa ikatlong taong anibersaryo ng Maguindanao massacre noong Biyernes, Nobyembre 23.

Ang nagkakaisang pahayag ay nilagdaan ng mga kinatawan ng Center for Community Journalism and Development (CCJD), Center for Media Freedom and Responsibility (CMFR), Freedom Fund for Filipino Journalists (FFFJ), National Union of Journalists of the Philippines (NUJP), Philippine Center for Investigative Journalism (PCIJ), Philippine Press Institute (PPI), at ng University of the Philippines-College of Mass Communication (UP-CMC).

Kabilang sa mga puntos na isiniwalat ng mga mamamahayag ay ang pagsama ng mga kasapi ng pamilya Ampatuan sa hanay ng mga kandidato ng Liberal Party (LP) ni Aquino at United Nationalist Alliance (UNA) ni Bise Presidente Jejomar Binay.

Kaugnay nito, binanggit din nila na dahil sa pagkukulang at pagkakamali ng administrasyon, ilang kasapi ng pamilya ng biktima sa [pamamaslang ay nawawalan na ng pag-asa at ito ay isinisi nila sa gobyerno.

“Taken together, the acts of commission and omission by the Aquino administration betray sheer lip service to justice and press freedom, and a dangerous tendency to sacrifice both to the exigencies of power,” sabi ng mga mamamahayag sa dalawang pahinang pahayag.

Binanggit nila na noong Agosto 2010, ipinangako ng Pangulo ang limang krusyal na reporma para makamit ang katarungan.

Kabilang dito ay ang pagpapaunlad sa Witness Protection Program (WPP), pagbuo ng  quick-response teams na mag-iimbestiga sa pamamaslang sa mga mamamahayag, [pagpapabilis sa paglilitis, at pagrebisa sa Rules of Court upang maiwasana ng pag-abuso at manipulasyon.

Ngunit matapos ang dalawang taon, sinabi ng mga mamamahayag na ang mga problemang kanilang binigyang pansin noon ay nananatili pa ri.

Ininalimbawa nila ang pag-aaral na isinagawa ng ng CMFR kung saan ay nabulgar na halos 100 warlord ang patuloy na naghahari sa ibat-ibang bahagi ng bansa kung saan nakapagtala ng mataas na bilang ng pamamaslang sa mga mamamahayag.

Dahil dito, patuloy rin nangangamba ang mga saksi at mga nagsmpa ng kaso sa kanilang personal na kaligtasan.

Ang kalagayang ito ay higit pang pinalala ng pagkakabilang ng mga mga kasapi ng pamilya Ampatuan sa LP at UNA.

Ayon sa ulat ng PCIJ, umaabot sa 72 kasapi ng pamilya Ampatuan ang kandidato sa halalan sa 2013.

Siyam sa mga ito ay kandidato ng LP, at 34 ang kandidato ng UNA.

“The big number of candidates from the clan bares an intact financial and power infrastructure. In fact, the PCIJ report shows that Andal Ampatuan Jr. has managed to sell eight prime properties, an outrage when the government has pledged to forfeit wealth that multiplied many times as the clan consolidated its powers with help from successive administrations that wooed the clan’s formidable voting machine,” ani ng nagkakaisang pahayag.

 Patungkol sa  kaligtasan ng mga mamamahayag sa bansa, binanggit sa pahayag ang ulat ng Southeast Asian Press Alliance (SEAPA) kung saan ay isinasaad na ang Pilipinas na itinuturing na may pinakamasiglang demokrasya sa rehiyon, ngunit nananatili namang pinakadelikadong lugar para sa mga mamamahayag.

Batay sat ala ng NUJP, umabot na sa 153 mamamahayag ang pinaslang sa bansa muila noong 1986; kabilang dito ang 14 na pinaslang sa ilalim ng halos tatlong taong administrasyong Aquino.

Bukod sa di mapigil na pamamaslang sa hanay ng mga mamamahayagt, pinuntusan din sa pahayag ang patuloy na pagkalulong ng Pangulo sa mga panukalang batas na sumasalangsang sa malayang pamamahayag at paghahayag ng damdamin.

 “Despite his avowed pledge to implement “tuwid na daan,” he has reneged on a promise to prioritize the passage of the Freedom of Information bill – an initiative that could help his government fulfill its promise to rid the country of corruption. Aquino supported instead is the patently unconstitutional Cybercrime Prevention Act, a law which grants the state draconian powers to crack down on dissent and critical expression on digital space,” ani ng mga mamamahayag sa nagkakaisang pahayag. (Dino Balabo)

Mamamahayag, mag-aaral nagsanib sa Bulacan sa paggunita sa Maguindanao massacre

MALOLOS—Hindi bababa sa 200 mamamahayag at mag-aaral ng ibat-ibang pamantasan sa Bulacan ang lumahok noong Miyerkoles ng gabi, Nobyembre 21 sa paggunita ng ikatlong taon ng Maguindanao massacre.

Kaugnay nito, isang mas malawakang pagkilos ang ang isinagawa sa Maynila noong Biyernes, Nobyembre 23 ng ibat-ibang samahan ng mamamahayag sa paggunita ng karumaldumal na pamamaslang at paggunita sa International Day to End Impunity.

Ang pagkilos ng mga mamamahayag sa Maynila ay tinampukan ng parada ng 153 kabaong bilang simbulo ng pamamaslang sa katulad na bilang ng mga mamamahayag sa bansa mula noong 1986.

 

“Dapat ng matigil ang pamamaslang sa mga mamamahayag dahil kawawa ang susunod na henerasyon,” sabi ni Rommel Ramos, ang vice chairman ng National Union of Journalists of the Philippines (NUJP) Bulacan Chapter.

 

Inayunan din ito nina Carmela Reyes-Estrope at Shane Velasco na kapwa kasapi rin ng NUJP at kapwa guro sa pamamahayag sa Bulacan State University.

Binigyang diin pa nila na isa sa susi upang makaiwas sa pamamaslang ay ang pagiging responsableng mamamahayag.

Sa kanyang pahayag, binigyang pansin din ni Velasco na g lugar na pinaghdausan nito.

“Nasa harap tayo ngayon ng gusali ng Regional Trial Court at sumisigaw ng katarungan sa harap ng bantayog ng tatlong lalaking nagsulong ng La Solidadridad.

Ang kanyang tinutukoy ay ang bantayog nina Gat Jose Rizal, at mga Bulakenyong sina Gat Marcelo H. Del Pilar at Mariano Ponce.

Ayon kay Velasco, sa panahon ng tatlong bayni, ipinakipaglaban nila ang malayang pamamahayag, ngunit sa kabila nito, patuloy na hinahamon ang kasalukuyang salinlahi ng mga banta sa buhay ng mga mamamahayag.

 “Ang hamon sa atin at sa susunod na herasyon ay hindi lamang proteksyunan ang sarili, sa halip ay sikaping maging magaling at sikaping hindi matatapakan ang karapatan sa pamamahayag.

 

Binigyan diin pa niya na na sa hanay ng mga mamamahayag, ang kredibilidad ay tanging nagsisilbing lisensya sa pagpapatuloy ng pamamahayag,

Iginiit naman ni Nestor Torres ng UNTV 37 ang pagiging mapagkumbaba ng mga mamamahayag upang magsilbing modelo sa mga pamayanan.

Binigyang diin na mahalaga lamang ang buhay dahil sa tungkulin at ipinaalala sa mga kabataang mamamahayag ang tungkulin sa pamamahayag ng katotohanan.

Kaugnay nito, hindi itinago ni Ramos ang pagkadismaya sa pagwawalang bahala sa nasabing okasyon ng mas nakararaming mamamahayag sa lalawigan.

“Maraming kulang sa atin ngayong gabi” sabi ni Ramos at ipinaliwanag na mas maraming mag-aaral ang lumahok sa nasabing pagtitipon, ngunit iilan ang lumahok na mamamahayag.

Ayon kay Ramos, ipinakita sa kanya ng Provincial Public Affairs Office (PPAO) ang talaan ng mga mamamahayag sa lalawigan at ang bilang ay umaabot sa halos 500.

“Marami ang nagmamalaki na mahuhusay silang mamamahayag, ngunit kapag adbokasiya para sa malayang pamamahayag ang gagawin, nasaan sila,” sabi Ramos na siyang nagsisilbing station manager ng Radyo Bulacan.

Idinagdag pa niya na “siguro kung may pulitikong mamimigay ng pera dito, tiyak na mahaba ang pila nila.”

 Nagpahayag din ang mga mag-aaral na lumahok sa paggunita.

Ayon kay Rick Laurenz Enriquez, ang mga pamamaslang sa mga mamamahayag ay naghahatid ng pangamba sa kanila bilang mga mag-aaral ng pamamahayag.

Para naman kay Ehris Villafane, hindi sila magsasawa na makiisa sa katulad na paggunita upang patuloy na maimulat ang mga mga mamamayan sa lumalalang kultura ng impunity sa bansa.

Bilang isang mag-aaral ng Bachelor of Science in Information Technology, binigyang diin ni Joan Condero na bilang tao at estudyante na may karapatan din silang malaman ang nangyayari sa kanila, at ipaglaban ang tamang pamamahayag sa Pilipinas

Para naman kay Archieval Mariano ng Pace Setter, ang opisyal na pahayag ng Bulacan State University, sa pananahimik ng kabutihan, naghahari ang kasamaan.

Sinabi ni Mariano na hindi pa tapos ang laban ang katulad na paggunita sa mga pinaslang na mamamahayag ay bahagi lamang ng mas malawak na laban para sa malayang pamamahayag sa bansa.

Sa isang pahinang pahayag naman, hinamon ng NUJP Bulacan ang administrasyong Aquino na ”bigyang kahulugan, kulay at hubog ang kanyang pangako.”

Ipinalala rin ng NUJP sa Pangulo na “matagal ng tapos ang kampanya na tinatampukan ng pangako ng mga kandidato.  Oras na upang kumilos at makinig at patunayan sa sambayanang Pilipino na “kami ang Boss mo.”

Ayon pa sa NUJP-Bulacan, ang patuloy na pamamayagpag ng culture of impunity sa bansa at isang banta sa demokratikong lipunang pilit na itinataguyod at ipinakipaglaban sa noong 1896, 1945, at Edsa noong 1986.

“Kung ang pamamaslang sa mga mamamahayag ay magpapatuloy, anong kinabukasan ang naghinhintay sa mga mag-aaral ng pamamamahayag ngayon, at maging sa susunod na salinlahing Pilipino kung ang mga tagapaghatid ng balita at katotohanan ay namumuhay sa mundo ng takot,” ani ng NUJP sa pahayag na inilabas.

Iginiit pa nila na “bilang tagapaghatid ng balita’t impormasyon, ang mga mamamahayag ay dapat manatiling malaya hindi lamang sa impluwensiya ng makakapangyarihang diyos-diyosan, kungdi ay maging sa banta ng karahasan at pananakot.” (Dino Balabo)