Saan pwedeng magtayo ng socialized housing sa Bulacan?

MALOLOS--Nagpahayag ng suporta si Gob. Wilhelmino Alvarado  sa mga programa ng administrasyong Aquino sa paglilinis ng mga estero sa kalakhang Maynila sa pamamagitan ng paglilipat ng mga iskwater.

Ito ay kaugnay ng moratorium sa Lungsod ng SJDM hinggil sa pagpapatigil sa pagpapatayo ng socialized housing.

Ayon sa gobernador, kahit may moratorium sa SJDM, may iba pang mga bayan sa lalawigan na maaring pagtayuan ng mga socialized housing projects na malilipatan ng mga iskwater.

Kabilang dito ang mga bayan ng Pandi, Bustos, San Rafael, San Ildefonso at Norzagaray.

Sa kabila naman ng pagbubukas ng ilang bayan para sa mga socialized housing, iginiit ni Alvarado na dapat ay magkaroon ng tamang koordinasyon sa kanya at maging sa mga punong bayan.

Bukod rito, ipinaalala niya na anumang socialized housing project ang itayo sa ibang bayan sa lalawigan, ito ay kailangan pa ring sumunod samga umiiral na land use plan.

Idinagdag paniya na bukod samga iskwater sa Maynila, mayroon ding mga iskwater sa lalawigan ng Bulacan na dapat bigay ng marangal na tirahan sa mga mas ligtas na lugar.

Ito ay dahil sa ang mga Bulakenyong iskwater ay karaniwang nakatira sa mga gilid ng ilog at sapa na natukoy bilang mga geo-hazard areas.

Isa sa halimbawa ay ang may 6,000 iskwater sa SJDM, na ayon kay Ignacio ay unti-unti na ring naililipat dahil ang 10 porsyento ng mga proyektong pabahay ay ipinagkakaloob sa mga iskwater sa lungsod na ito.

Ang lungsod ng SJDM ito ay sinasabing dating isang barangay lamang ng lungsod ng Meycauayan, ngunit ito ang may pinakamataas na bilang ng populasyon sa lalawigan ngayon.

Ito ay dahil na rin sa mahigit 50 taong paglilipat ng mga iskwater sa kalakhang Maynila patungo sa lungsod na ito.

Batay sa mga tala, ang mga unang iskwater na inilipat sa SJDM ay ang mga retiradong sundalong nakatira sa gilid ng Fort Bonifacio sa Taguig.

Ngunit noong 1959 ay naapektuhan sila ng bahang hatid ng malakas na bagyo at inilipat sa dating Haceinda Sapang Palay, sa silangang bahagi ng SJDM.

 

Nasundan pa ito na mga sunod-sunod na maramihang paglilipat ng mga iskwater mula sa Intramuros, Maynila noong Disyembre 3,1963.

Ito ay matapos puwersahin ni dating Manila Mayor Antonio Villegas ang paglilipat ng mga iskwater na sa Intramuros, sa pamamagitan ng pagbabaklas ng kanilang mga barong-barong.

Ang mga pamilya ng iskwater ay isinakay sa trak at inihatid sa Sapang Palay sa kalagitnaan ng gabi.

Bukod rito, sinasabi ng mga nakasama sa unang inihatid na ibinaba lang sila sa trak at umalis, at wala pang bahay na nakatayo na malilipatan.

Ayon kay Fr. Edward Kelly, isang pari nanagmula sa Ireland at naboluntaryong magsagawa ng misyon sa Sapang Palay, umabot sa 20,000 pamilya ang nailipat sa Sapang Palay sa pagitan ng Disyembre  1963 at Abril 1964.

Si Kelly ay dumating sa bansa noong 1961, at nagsimula ng kanyang misyon sa Sapang Palay noong Mayo 1964.  Siya ay kasalukuyang pa ring nakatira sa Sapang Palay. Dino Balabo

Gusali ng STI-Malolos gumuho

MALOLOS CITY—Apat na stay-in worker ang nasugatan matapos gumuho ang isang bahagi ng itinatayong STI building sa lungsod na ito kamakalawa ng hapon.

Ang mga nasugatan ay agad na isinugod sa Bulacan Medical Center (BMC) sa lungsod na ito, at isa sa kanila ay nakilalang si Ricky Watiwat, 37, isang mason na tubong Marinduque.

Ang tatlo pang kapwa obrero ni Watiwat ay hindi nakilala dahil agad ding pinauwi ng mga duktor sa BMC, samantalang si Watiwat ay kasalukuyan pang inoobserbahan.

Batay sa ulat ng pulisya, sinabi ni Mayor Christian Natividad ng lungsod na ito na ang insidente ay naganap sa itinatayong gusali ng STI na matatagpuan sa harap ng lumang relay station ng Radio Veritas sa kahabaan ng MacArthur Highway sa Barangay Dakila ng lungsod na ito pasado alas-5 ng hapon noong Lunes..

Sa pagsisiyasat ng pulisya, natukoy na ang pagguho ay sanhi ng pagbagsak ng scaffolding na sumusuporta sa ikalawang palapag ng gusaling sinasabing gagamiting academic center ng STI.

Ayon pa sa pulisya, kasalukuyang binubuhusan ng sariwang semento ang ikalawang palapag ng gusali nang gumuho ito.

Ang konstruksyon ng nasabing gusali ay nagsimula noong nakaraang taon. Dino Balabo

Bulakenyo nagkaisa sa pagsuporta kay Bro. Eddie

 

MALOLOS—Suportado ng mga lider pampulitika sa Bulacan ang kandidatura sa Senado ni Bro. Eddie Villanueva ng Bangon Pilipinas sa kabila magkakaiba ang kanilang kinasasanibang partido.

Kaugnay nito, inilunsad ng Villanueva ang kanyang kandidatura sa lungsod na ito noong Martes, Pebrero 12.  Ito ang ikatlong sunod na paglulunsad ni Villanueva ng kanyang kandidatura sa lungsod na ito.

“Walang ibang higit na kakalinga sa ating lalawigan kungdi ang ating kalalawigan din,” sabi ni Gob. Wilhelmino Alvarado sa kanyang talumpating pang-endorso kay Villanueva na kilala bilang isang televangelist.

Bilang tagapangulo ng National Unity Party (NUP) sa lalawigan, sinabi ng punong lalawigan na ang Bulacan ay nahaharap sa mas mabilis na kaunlaran at kailangan nito ang lahat ng tulong.

Ayon sa gobernador, kakailanganin ng Bulacanng isang kaalyado sa Senado at si Villanueva ang isa sa mga mangungunang tutulong kung mananalo.

Gayundin ang mga naging pahayag nina dating Gobernador Roberto Padanganan  at Joselito Mendozana siyang tagapangulo ng Liberal Party sa lalawigan at kasalukuyang kinatawan sa ikatlong distrito.

Maging si dating Gob. Josefina Dela Cruz ay nagpahayag ng suporta sa pamamagitan ng maikling video message na ipinapanood sa mga dumalo sa paglulunsad ng kampanya ni Villanueva.

Si Dela Cruz ay kasalukuyang naglilingkod bilang Post Master General ng Philippine Postal Corporation (Philpost).

Ang mga nabanggit na lider, kasama ang mahigit sa 90-taong gulang na si dating Gob. Tomas Martin ng Nacionalista Party at dating Gob. Ignacio Santiago ay naunang nagpahayaga ng kanilang suporta sa pamamagitan ng paglagda sa isang manipesto.

Ang nasabing manipesto ay nilagdaan din ng mahigit 100 pang lider pampulitika sa lalawigan na nabibilang rin sa ibat-ibang partido.

Nagpasalamat si Villanueva sa pagbibigay ng suporta ng mga Bulakenyong lider.

Sinabi niya na ito ang kauna-unahang pagkakataon na nagkaisa ang mga lider sa lalawigan upang isulong ang kandidatura ng isang kalalawigan.

“I am so grateful for their support despite the fact that they came from different political persuasions.  They stand ten feet tall in solidarity to support my attempt to capture a Senate seat.  The future of Bulacan is beyond politics,”  ani Villanueva.

Sa kanyang talumpati, inihayag ng televangelist ang kanyang program kinabibilangan  ng tatlong “E”.

Ito ay ang ekonomiyang agresibot’ walang napag-iiwanan; Edukasyon na napapanahon; Entrepinoy na masang Pilipino ang nangunguna at nakikinabang.”

Ayon kay Villanueva ang nabanggit na plataporma ay kailangan upang higit na mabigyan ng kahulugan ang pagunlad ng ekonomiya ng bansa na ayon sa kanyan ay dahil sa programang tuwid na landas ni Pangulong Aquino.

“Mabilis ang pagunlad ngayon ng bansa, pero hindi tumatagos sa mga masa. Kailangang maramdaman ng masa ang kaunlarang pang-ekonomiya,” sabi ni Villanueva.

Bilang tagapagtatag ng  Jesus Is Lord Movement (JILM), binigyang diin ni Villaneuva ang kahalagahan ng moral leadership.

 “We need moral leadership.  The bedrock of good economics is good politics,” aniya. 

Si Villanueva nagtapos ng Bachelors of Science in Commerce major in Economics sa Polytechnic University of the Philippines (PUP).

Bilang isang lider ng mga mag-aaral, siya ay ng pinakamatagal na nagsilbing kasapi ng PUP Board of Regents. Nagsilbi rin siyang propesor ng Economics sa PUP.

Bilang isang negosyante noong dekada 70, siya ay nagsilbing export manager ng maran Export Industries, at nagtatag ng Agape Trading company kung saan siya ay nanungkulan bilang general manager.

Sa larangan ng pananampalataya, nasubok ang katatagan ni Villanueva ng laban niya ang isang sindikato ng sa kaso ng land grabbing na kinabibilangan ng isang hukom, isang piskal, at apat na abogado na pawang nakulong.

Kasunod nito ang pagtatayo ni Villanueva ng Jesus is Lord Movement (JILM) na may 4,000 simbahan sa buong bansa, at Jesus Is Lord Colleges Foundation.

Noong 2004 at 2010, kumandidato si Villanueva bilang Pangulo, ngunit natalo.

Ang paglulunsad ng kanyang kampanya para sa halalan noong 2004 ay isinagawa sa Bulacan State university; at noong 2009 ay sa bakuran ng makasaysayang simbahan ng Barasoain bilang paghahanda sa halalan noong 2010.

Si Villanueva ay anak ng Olympian na si Joaquin Villanueva na kasal kay Maria Cruz, isang beautician na kapwa nagmula sa Bocaue.

Siya ay kasal kay Adoracion Villanueva  at sila ay biniyayaan ng apat na supling.

Ito ay sina  Eduardo Jr., Joel, Eleanor, at Edelisha.

Si Eduardo Jr., ay kasalukuyang alkalde ng bayan ng Bocaue samantalang si Joel ay nanunuparan bilang Director General ng Technical Education Skills Development Authority (Tesda).     Dino Balabo

ARAW NG REPUBLIKA: PNoy, “El Presidente” at “Darna”lalahok sa Araw ng Republika

MALOLOS—Payak ang inihandang pagdiriwang para sa paggunita ng ika-114 na taon ng Araw ng Republika sa Barasoain sa Enero 23 na idineklarang isang non-working holiday sa Bulacan ng Malakanyang.

Ngunit inaasahang dudumugin ito ng mga Bulakenyo na nais masilayan hindi lamang si Pangulong Benigno Aquino, kungdi ang mga bituin ng pinilakang tabing na nagsiganap sa mga pelikulang “El Presidente” at “Darna.”

Kaugnay nito, kinumpirma ni Gob. Wilhelmino Alvarado noong Sabado, Enero 19 inimbitahan bilang panauhing tagapagsalita si Pangulong Aquino sa nasabing pagdiriwang.

Ngunit iginiit niya na may posibilidad na hindi makarating ang Pangulo dahil sa aalis ito ng bansa sa nasabing araw upang dumalo sa pulong ng mga opisyal sa World Economic Forum (WEF) sa Swrizerland.

“Naghihintay pa kami ng kumpirmasyon,” ani Alvarado at iginiit na walang pasok sa Bulacan sa Enero 23 dahil sa Proclamaton No. 533 na nilagdaan ni Executive Secretary Paquito Ochoa Jr.m noong Disyembre 12.

Layunin ng proklamasyon ang malawakang pag-alaala sa nasabing araw na inilarawanni Alvarado bilang araw ng pagsilang ng pamahalaang Pilipino.

Iginiit pa niya na noon pang nakaraang linggo ay abala na ang kapitolyo at ang pamahalaang lungsod ng Malolos sa paghahanda para sa payak na pagdiriwang.

“Gusto kasi ng Pangulo ay simpleng pagddiriwang lamang dahil tinamaan tayo ng kalamidad noong Agosto at iba pang bahagi ng Pilipinas bago matapos ang 2012,” ani Alvarado sa kanyang lingguhang programang “the Governor’s Hour” na isinahimpapawid sa Radyo Bulacan noong Sabado, Enero 19.

Sa kabila naman ng pagahahanda para sa payak na pagdiriwang, inaasahang dudumugin ng mga Bulakenyo ang pagdiriwang dahil sa inaasahang pagdating ni Gob. ER Ejercito ng Laguna at Gob. Vila Santos ng Batangas.

Ang dalawa ay kapwa dating bituin sa pinilakang tabing ngunit paminsan-minsan ay gumagawa pa rin ng pelikula.

Si Gob. Santos ay higit na napatanyag sa kanyang pelikulang “Darna” Sis. Stella L” at iba pa, samantalang katatapos lamang ni Gob. Ejercito sa pelikulang “El Presidente.”

Bukod sa dalawang gobernador, inaasahan din ang paglahok nina Gob. Juanito Victor Remulla ng Cavite, Lilia Pineda ng Pampanga, Aurelio Umali ng Nueva Eciaja, Victor Yap ng Tarlac, Wilhelmino Alvarado ng Bulacan at Mayor Alfredo Lim ng Maynila.

Ayon kay Mayor Christian Natividad, ang mga nasabing opisyal ay kanilang inanyayahan sa layuning higit na mapalawak ang pagdiriwang ng Araw ng Republika.

“Hindi lang Bulacan ang nakinabang sa pagpapasinaya ng Republika sa Malolos noong 1899, buong Pilipinas ang nakinabang, pero ang Bulacan lamang ang gumugunita sa Araw ng Republika,” ani Natividad.

Nilinaw din niya ang dahilan ng pag-iimbita sa mga pinuno ng mga nasabing lalawigan at lungsod.

Ayon kay natividad ang mga nasabing lalawigan at lungsod ay kumakatawan sa walong sinag ng araw sa watawat ng Pilipinas.

Ang walong sinag na araw sa bandila ay kumakatawan sa unang walong lalawigang nag-aklas at lumahok sa rebolusyon laban sa rehimeng Kastila sa Pilipinas.

Parola sa Pugad, kinukumpuni na

HAGONOY, Bulacan—Bago sumapit ang Pasko ay inaasahang makukumpuni na ang parola sa Barangay Pugad ng bayang ito na may pitong taon nang walang dingas.

Ito ay dahil sa naakyat na ang tuktok ng parola at naibaba ang lumang mekanismo doon at ngayon ay sinusuri na, isang linggo matapos itong bisitahin ng mga opisyal ng Sigla Movement of the Philippines (SMP).

Ayon kay Grossman Dax Uy, tagapangulo ng sangay ng SMP sa Bulacan, umaasa sila na sa Disyembre 15 ay mapapasinayaan na ang parola.

 “We are hopeful that we can install it back by December 15,” ani Uy sa isang email na ipinadala sa Mabuhay.

 Sinabi rin niya sa nasabing email na maayos na naibaba ng mga mga electrical engineers at mga technicians ng SMP ang mga lumang mekanismo ng parola sa tulong ng mga opisyal ng Barangay Pugad na.

 Ang mga lumang mekanismo para sa pagpapailaw ng parola ay sinuri ng mga mga inhinyero at technician ng SMP.

Ayon kay Uy, matapos ang masusing pagsusuri, natuklasan nila na ang lamp changer flasher, day light control at light bulb ng parola ay dapat ng palitan.

Ang  solar panel at solar battery naman nito ay kasalukuyan pang sinusuri; samantalang ang mga lumang electrical cables at iba pang mga connector at hindi na mapapakinabangan.

Matatandaan na unang natawag ang pansin ng Mabuhay sa may 80-taong gulang na parola ang larawan nito ay ilathala sa Facebook.com noong Enero 2011 ni Bernard Dave Concepcion, isang kagawad ng Pugad.

Sa pagtungo ng Mabuhay sa Barangay Pugad noong Enero 30, 2011, sinabi ni Kagawad Alfredo Lunes na anim na taon na noong hindi napapakinabangan ang nasabing parola.

Ito ay dahil sa wala ito ilaw na nagsisilbing gabay ng mga mangingisda sa Manila Bay kung gabi.

Para naman kay Ramon Atienza, kapitan ng Barangay Pugad, marami na silang nilapitang opisyal ng pamahalaan upang makumpuni ang nasabing parola na nagsilbi rin gabay sa pangingisda ng kanilang mga magulang sa Manila Bay sa mga nagdaang panahon.

Inilathala ng Mabuhay ang larawan at kuwento ng pangangailangan ng mga mangingisda na makumpuni ang nasabing parola at ng ito ay mabasa ni Gob. Wilhelmino Alvarado, agad din niya itong ipinasuri.

 Pagkatapos nito ay inihain ni Alvarado sa pulong ng Regional Development Council (RDC) ng Gitnang Luzon noong Hunyo 30, 2011 ang panukala na mapondohan ang pagkukupuni nito.

Ngunit bago ito tuluyang tanggapin ng RDC ay ipinanukala ni Mayor Donato Marcos ng Paombong na isabay na rin ang pagpapatayo ng katula dna parola sa baybayin ng kanilang bayan.

Ito ay nadagdagan pa ng panukala na magpatayo rion ng isa pang parola sa baybayin ng Obando;maging sa baybayin ng mga lalawigan ng Pampanga at Bataan; at pagpapakumpuni ng isa pang sirang parola sa baybayin ng Barangay San Roque sa bayan ding ito.

Matapos ang pagbahang hatid ng bagyong Pedring sa Bulacan noong Oktubre 2011, nagpulong ang RDC sa Kapitolyo ng Bulacan at pinagtibay ang mga panukalang pagpapakumpuni sa parola sa Pugad at San Roque at pagpapatayo ng dagdag na parola sa Obando, Paombong, Pampanga at Bataan.

Ang pinagtibay na resolusyon ng RDC ay isinumite sa Malakanyang bago matapos ang 2011, ngunit makalipas ang halos isang taon ay wala pa ring nangyari sa panukalang pagkukumpuni.

Dahil sa kalagayang ito, nagkainteres ang SMP na bigyang solusyon ang pagpapakumpuni ng parola sa Pugad matapos ang isang panayam ng Mabuhay nitong Oktubre.

Noong Nobyembre 24 ay binisita ng mga opisyal ng SMP ang parola at tiniyak na iyon ay ipakukumpuni.  (Dino Balabo)

Ligtas, de-kalidad ang paputok na gawa sa Bulacan

LUNGSOD NG MALOLOS—Tiniyak ng Department of Trade and Industry (DTI) na ligtas at mataas ang kalidad ng mga paputok na gawa sa Bulacan.

Ito ay dahil sa 475 na paputok at pailaw na gawa sa Bulacan ang may product standard (PS) license mula sa nasabing ahensiya, bukod pa sa dagdag na 75 produkto na sumasailalim sa dagdag na pagsusuri upang magkaroon ng katulad na lisensiya mula sa Bureau of Product Standards (BPS).

Ayon kay Zorina Aldana, direktor ng DTI sa Bulacan, ang PS license ay isa sa mga garantiya na ang produkto sa ay de kalidad at ligtas.

“Those that applied and secured PS licensees are following the provisions of Republic Act 7183 or the Firecracker Law,” ani Aldana at iginiit na batay sa nasabig batas, ang mga paputok ay dapat lamang maglaman ng .2 gramo ng kemikal para sa paputok.

Gayunpaman, nilinaw niya na hindi lamang ang nilalamang kemikal ng bawat produktong paputok sa lalawigan ang batay ng pagiging de kalidad nito,

Ipinaliwanag ni Aldana na upang makakuha ang isang negosyante ng PS license, kailangang magsagawa ito ng maayos na proseso sa paggawa ng produkto, at pagkakaroon ng quality management system na umaayon sa pamantayang pambansa at pandaigdigan.

Dagdag pa ni Aldana, “there are also requirements on packaging and labelling. The manufacturer’s name and contact details plus safety labelling must be written on the product.”

Iginiit niya na ang mga nasabing requirement ay nakatuon sa pananagutan ng mga negosyante at isang daan upang ipabatid sa mga kostumer na ligtas at de kalidad ang produkto.

Batay sa tala ng DTI-Bulacan, umaabot na 475 produktong paputok at pailaw sa lalawigan ang may PS license.

Kabilang dito ang ibat-ibang uri ng fountain, aerial fireworks, sawa, judas belt, trompillo, roman candle, luces, Mabuhay fountain, Pagoda fountain at iba pa.

 Ayon kay Aldana, halos magkakapareho ang ilang produkto, nguniit magkakaiba ito ng disenyo.

Batay pa rin sa tala ng DTI, ang mga kumpanyang may PS license sa kanilang produktong paputok sa lalawigan ay ang Dragon Fireworks na nakabase sa bayan ng San Rafael, at Diamond Fireworks sa Pulilan na kapwa may tig-100 produktong may PS license.

Ang iba pa ay ang LF Fireworks sa San Ildefonso (80 produkto), Nation Fireworks sa Baliwag (25), SPM General Merchandise sa Bocaue (40) Pyro Kreation Fireworks sa Sta. Maria town (30), Platinum Fireworks sa Sta. Maria (50), at Phoenix Fireworks sa Sta. Maria (50).

Ang mga kumpanya namang may aplikasyon para sa PS license ay ang Z & N Nicolas Fireworks (20 produkto), ERCY Fireworks (20), A. Santiago Fireworks (10), Purity Fireworks (10) na pawang nakabase sa bayan ng Baliwag; at ang Double L Fireworks na nakabase sa bayan ng Pandi na may 15 produktong naka-aplay.  (Dino Balabo)

Pagkukumpuni sa parola sa Bulacan, pangungunahan ng Sigla Movement

HAGONOY, Bulacan—Pangungunahan ng isang non-governmental organization (NGO) ang pagpapakumpuni sa parola sa bayang ito na may pitong taon nang walang ilaw.

Ang pagkukumpuni ay inaasahang matatapos bago magpasko ngayong taon.

Ayon kay Grossman Dax Uy, tagapangulo ng Sigla Movement of the Philippines (SMP) Bulacan chapter, lubhang mahalaga para sa mga mangingisda ang parola na matatagpuan sa baybayin ng Manila Bay sa Barangay Pugad ng bayang ito.

Ito ay dahil sa ang ilaw ng parola ang nagsisilbing gabay sa mga mangingisdang pumapalaot sa karagatan ng Maynila kung gabi.

“Uunahin namin yung pagpapailaw sa parola, saka isusunod yung pagpapatibay sa pundasyon nito,” ani Uy matapos bisitahin ang parola noong Sabado kasama ang mga kasapi ng SMP.

Sinabi pa ni Uy na lumagda na sila sa isang memorandum of agreement (MOA) ni Kapitan Ramon Atienza ng Barangay Pugad para sa pagpapakumpuni at pamamahala sa nasabing parola.

Ayon kay Rommel Santos, dating kagawad ng nasabing barangay, ang parola ay mahigit ng 80 taon.

Sinabi ni Santos na ilang matatanda sa kanilang barangay na may edad  na higit 77-taong gulang, bata pa sila ay nakatindig na ang parola.

Ngunit may mga nasasabi rin na panahon pa ng Kastila ay nakatindig na ang parola na nagsilbi ring gabay sa mga bumibiyaheng bangka kung gabi.

Bibigyang diin naman ni Kagawad Alfredo Lunes ng Barangay Pugad na ang nasabing parola ay unang naiilawan ng coleman.

Noong dekada 70, ito ay ginamitan ng kuryente ngunit palagiang nasisira kapaga bumabagyo dahil sa napuputol sa malakas na hangin ang kable ng kuryente.

Nitong huling bahagi ng dekada 90, ang parola ay pinalitan ng solar powered batteries at solar lamp.

Ngunit sa nakalipas na pitong taon ay hindi nagamit ang parola dahil sa nag-expired ang baterya nito

Dahil dito, hulining ng tulong sa mga opisyal ng mas matataas na tanggapan  ang mga namumuno sa Barangay Pugad.

Noong nakaraang taon, inilathala sa facebook.com ni Kagawad Bernard Dave Concepcio ang kalagayan ng parola na nakatawag pansin sa mamamahayag na ito.

Dahil dito, pinauntahan at kinunan ng larawanng mamamahayag na ito ang nasabing parola; na nakatawag naman ng pansin ni Bulacan Governor Wilhelmino Alvarado.

Inihain ni Alvarado sa Central Luzon Regional Development Council (RDC) ang panukala sa pagpapakumpuni noong Hunyo 30 ng nakaraang taon.

Kinatigan ng RDC ang panukala ni Alvarado matapos isulong ng mga kasapi nito ang pagpapatayo ng dagdag na parola sa mga bayan ng Obando at Paombong sa Bulacan, maging sa lalawigan ng Pampanga at Bataan.

Inendorso ng RDC sa Malakanyang aty sa Department of Transportation and Communications (DOTC) ang nasabing proyekto sa mga parola noong Oktubre 2011.

Ngunit hanggang sa kasalukuyan ay wala pang nakikitang pagkilos ang pamahalaang pambansa  sa pamamagitan ng DOTC.

Ayon kay Uy, ang plano ng SMP na pagpapakumpuni sa parola ay hindi isang pakikialam sa kakayahan ng pamahalaan, kungdi isang pagkakataon na makatulong sa mamamayang Bulakenyo partikular na sa mga mangingisda. (Dino Balabo)