Pagsuko ni Napoles kay Pnoy, idinepensa

 

BULAKAN, Bulacan—Ipinagtanggol ni Senador Teofisto Guingona III ang ang pagsuko ni Janet Lim Napoles kay Pangulong Benigno Aquino III sa Malakanyang noong Miyerkoles ng gabi, Agosto 28.

Kaugnay nito, iginiit ni Guingona na pabor ang 15 sa 24 na Senador na tuluyang buwagin ang pork barrel, ngunit idinepensa rin niya ang pork barrel ng Pangulo na tinatawag ding Presidential Social Fund (PSF).

Sa isang ambush interview matapos magsalita si Guingona sa ika-163 pagdiriwang ng kaarawan ni Gat Marcelo H. Del Pilar sa bayang ito noong Biyernes, Agosto 30, nilinaw ng senador na hindi “scripted”ang pagsuko ni Napoles sa Pangulo.

 “He is the commander in chief, lahat ay nagrereport sa Pangulo at siya rin ang kinikilalang walang kinikilingan sa pagpapatupad ng batas,”ani Guingona.

Iginiit niya na walang ibang mapagkatiwalaan si Napoles kungdi ang Pangulo.

Ito ay dahil sa posibilidad ng banta sa buhay ni Napoles na itinuturing na utak sa paglustay ng mahigit P10-Bilyon pork barrel fund ng mga kongresista at Senador mula 2007 hanggang 2009.

Hinggil naman sa pananaw ng mga kapwa senador sa kontrobersyal na pork barrel, sinabi ni Guingona na 15 sa mga ito ay pabor na tuluyang alisin ang pork barrel.

“After reading the COA report, at least 15 of us favored the abolition. That’s a majority already,” ani ng Senador na nagpahayag na isa siya sa mga pabor ba alisin ang pork barrel ng mga senador.

Sa pagtatanong ng Mabuhay, inayunan din ni Guingona ang pananaw na bilang mga senador, ang kanilang trabaho ay humubog at magpatibay ng batas at hindi mangasiwa sa P200-M pork barrel bawat taon.

Gayunpamn, ipinagtanggol niya ang PSF ng Pangulo dahil sa ito raw ay nagagamit lalo na panahon ng kalamidad.

Ngunit sa pananaw ng dumaraming Pilipino,ang pork barrel pati na ang PSF ng Pangulo ay isang ugat ng korapsyon.

 Ilan na ang nagpayo na dapat ito ay ipagkaloob sa mga ahensiyang nagpapatupad ng proyekto at maging sa mga pamahlaang lokal.

Hinggil sa paggamit ng PSF sa mga kalamidad, ilan na ang nagsabi na mas makabubuting gamitin iyon sa pagpapatatag sa mga Disaster Risk Reduction Management Councils (DRRMCs).

Matatandaan na noong Biyernes, Agosto 23 ay ipinahayag ng Pangulo ang pagbuwag sa pork barrel.

Ang pahayag ay isinagawa, ilang araw bago isagawa ang million man march sa Luneta noong Lunes, Agosto 26 kung saan ang nagkakaisang panawagan ay buwagin ang pork barrel.

Ang pananaw na ito ay inayunan ng ilang Bulakenyo na nagsabing kung ang pork barrel ng mga kongresistang Bulakenyo ay ginamit sa paghahanda sa kalamidad, hindi sana binaha ang Bulacan at isinailalim sa state of calamity sa nagdaaang tatlong taon.  Dino Balabo

PLARIDEL-BUSTOS BYPASS: P163-M natipid sa proyekto ikinagalak ni PNoy

Makikita si PNoy matapos pasinayaan ang Plaridel-Bustos by-pass road.

BOCAUE, Bulacan—Ikinagalak ni Pangulong Benigno Aquino III ang malaking pondong natipid ng Department of Public Works and Highways sa pagpapatupad ng dalawang proyektong pinasiyaan niya sa Bulacan noong Biyernes, Marso 1.

Ang kagalakan ng Pangulo hindi niya naisatinig, ngunit nabakas ito sa kanyang ngiti at pangunguna sa pagpalakpak habang nagsasagawa ng project briefing si Public Works Undersecretary Alfredo Tolentino sa tulay ng bayang ito.

Ang project briefing ay isinagawa matapos pangunahan ng Pangulo ang inaugural drive sa 14 na kilometrong phase 1 ng Plaridel-Bustos by-pass arterial road project; at bago isagawa ang pasinaya sa pinalapad na tulay sa bayang ito noong araw ding iyon.

Kapansin-pansin naman na walang kasamang kandidatong senador ng Liberal Party ang Pangulo sa pagpapasinaya sa dalawang proyektong naglalayon na mapaluwag an gang daloy ng trapiko sa lalawigan, na naghatid din ng pagsisikip ng daloy ng trapiko sa kahabaan ng MacArthur Highway habang isinasagawa ang briefing at pasinaya sa tulay.

Ayon kay Tolentino, ang Plaridel Bypass ay may kabuuang habang 24-61 kilometro mula sa North Luzon Expressway (NLEX) hanggang Barangay Maasim sa bayan ng San San Rafael.

Ang unang bahagi nito ay may habang 14.675 kilomentro mula NLEX hanggang sa bayan ng Bustos.

Ang nasabing bahagi ay pinondohan ng halagang P706.544-Milyon, ngunit ang nagstos lamang ay P593-M, o halos P113-M na katipiran.

Project briefing sa Bocaue bridge.

Ayon kay Tolentino, umabot sa P163-Milyon ang natipid sa nasabing proyekto, ngunit sa huling pagbisita ni Secretary Rogelio Singson ay may ipinadagdag na tambak sa mga tulay na nagkahalaga ng P50-M.

Bukod dito, ang proyekto ay natapos noong  Nobyembre 21, 2012 o tatlong buwan bago matapos ang itinakdang araw upang iyon at tapusin.

Ang mga kalagayang ito ay ikinagalak ni Pangulong Aquino kaya’t siya ay napapalakpak sa pagsasagawa ng briefing ni Tolentino.

Hinggil naman sa pinalapagd na tulay ng Bocaue, sinabi ni Tolentino na maaga rin iyong natapos at nakatipid sila ng halos P4-M.

Ang kabuuang pondong nagugol sa tulay ng Bocaue ay P57.416-M, ngunit ang kabuuang pondong inihanda roon ay P61.593-M.

”Ito po ang epekto ng inyong kampanyang tuwid na daan, kaya tuwid ang bidding pati implementasyon,” Tolentino.

Iginiit pa niya na ang ikalawang bahagi ng Plaridel By pass na may habang 10 kilomentro ay sisimulang isubasta sa Marso 5.

Kasama sa konstruksyon ng ikalawang bahagi ng Plaridel bypass ay ang tulay na may habang mahigit sa isang kilometro na tatawid sa Ilog Angat sa pagitan ng mga bayan ng Bustos at San Rafael.

Ito ay tinatayang matatapos sa unang tatlong buwan ng 2016.

Ngunit ayon kay Tolentino, kung ang nasabing proyekto ay isasagawa ng walang tigil sa loob ng 24 oras sa bawat araw, matatapos iyon bago magtapos ang 2015.

“Mahigit pos a 40 porsyento ng trapiko ang mababawas sa kahabaan ng Cagayan Valley Road dahil sa Plaridel Bypass,” dagdag pa niya. Dino Balabo

Katiwalian tutuldukan, ani PNoy

MALOLOS—Muling tiniyak ni Pangulong Benigno Aquino III na tutuldukan niya ang katiwalian sa gobyerno at binigyang diin na ang adhikain ng kanyang administrasyon ay sumasalamin sa prinsipyo ng Unang Republika ng Pilipinas.

Ito ang buod mensahe ng Pangulo na binasa ni dating Senador Ramon Magsaysay Jr., sa ika-114 guning taong pagdiriwang ng pagpapasinaya sa Unang Republika ng Pilipinas na isinagawa sa makasaysayang Simbahan ng Barasoain sa lungsod na ito noong Enero 23.

“Sa tingin ko po ay malinaw na sa lahat na walang puwang para panglalamang ang tuwid na landas.Papanagutin natin ang mga nagsamantala sa katungkulan at kapangayarihan. Sisiguruhin natin na ang interes ng marami ang ating isinusulong, at gagawin natin ang lahat upang tuldukan ang katiwalin upang magdulot ng kaunlaran,”  sabi ng Pangulo sa kanyang mensahe na binasa ni Magsaysay.

Nagbabala rin siya na posibilidad na magbalik sa madilim na kabanata ng kasaysayan ang bansa kung ang mga mamamayan ay mananatiling manhid at magsasawalang kibo sa pag-abuso ng mga opisyal ng pamahalaan.

Hinikayat din ng Pangulo angmga mamamayan na laging alalahanin ang kahalagahan ng kalayaan at Saligang Batas bukod sa “kailangan ang pakikiisa ng bawat Pilipino upang maipagpatuloy ang positibong bunga ng pagtahak sa tuwid na daan.”

Sa nasabing mensahe, nagbalik-tanaw ang Pangulo sa pagtatag ng Unang Republika na tinapukan ng pagbuo ng Saligang Batas na pinagtibay ng Kongreso ng Malolos.

Sinabi niya na 70 pangunahin pinuno sa bansa noong panahong iyon ang nagtipon sa Barasoain at pinagkasunduan ang pangangalaga sa kalayaan.

Sa pagpapatibay nhg Saligang Batas ng Malolos ay iniluwal ang Unang Republika ngv Pilipinas na ayon sa Pangulo ay “sagisag ng katuparan ng mga pangarap na ipinaglaban ng ating mga bayani.”

Binigyan diin niya ang tatlong pangunahing elemento ng pagkakatatag ng Unang Republika: “ang pagkalas mula sa tanikala ng dayuhan, mamumuhay na malaya at nagsasarili, at pagpapatunay sa mundo na ang Pilipinas ay para sa Pilipino.”

Bukod dito ipinaalala niya ang kahalagahan ng Saligang Batas na pinagtibay sa Malolos dahil  “nakapaloob dito ang mga tuntunin na dapat sundin, nagsilbi ito bilang batayan kung paano natin tutuparin ng marangal at mahusay ang tungkulin natin bilang mamamayan at linggkod bayan.”

Ayon sa Pangulo ang pagtukoy sa karapatan ng mamamayan at ng mga namumuno ay ang “ang diwa ang pagkakapantay panatay natin” dahil “bilang mamamayan nagpapailalim tayo sa iisang batas na susundin ng lahat mayaman o mahirap.”

Ngunit sa paglipas ng panahon, may mga taong nagtangka na baluktutimn ang Saligang Batas at tinangkang gamitin ito sa kanilang pansariling interes.

Ayon sa Pangulo hindi magtatagumpay ang mga nagtatangkang baluktutin ang batas, dahil sila ay pipiglan.

Bukod dito, sinabi niya na patuloy ang pagsisikap ng pamahalaan upang lalo pang mapatingkad pa ang demokratikong sistema ng ating bansa na ang ganap na kapangyarihan ay nagmumula at angkin ng sambayanang Pilipino.

Tiniyak din ng Pangulo sa kanyang mensahe na “hindi natin bibiguin ang tiwala ang taumbayan, nakahanda tayong ipagtanggol ang bansa anumang banta at peligro. Ngayon isang bansa tayong may sariling soberanya may sariling batas, pamahalaan at pagkakakilalanlanI Ito ang kongkretong patunay sa tagumpay mga pinunong nakipaglaban para sa ating kalayaan.”  (Dino balabo)

ARAW NG REPUBLIKA: PNoy, “El Presidente” at “Darna”lalahok sa Araw ng Republika

MALOLOS—Payak ang inihandang pagdiriwang para sa paggunita ng ika-114 na taon ng Araw ng Republika sa Barasoain sa Enero 23 na idineklarang isang non-working holiday sa Bulacan ng Malakanyang.

Ngunit inaasahang dudumugin ito ng mga Bulakenyo na nais masilayan hindi lamang si Pangulong Benigno Aquino, kungdi ang mga bituin ng pinilakang tabing na nagsiganap sa mga pelikulang “El Presidente” at “Darna.”

Kaugnay nito, kinumpirma ni Gob. Wilhelmino Alvarado noong Sabado, Enero 19 inimbitahan bilang panauhing tagapagsalita si Pangulong Aquino sa nasabing pagdiriwang.

Ngunit iginiit niya na may posibilidad na hindi makarating ang Pangulo dahil sa aalis ito ng bansa sa nasabing araw upang dumalo sa pulong ng mga opisyal sa World Economic Forum (WEF) sa Swrizerland.

“Naghihintay pa kami ng kumpirmasyon,” ani Alvarado at iginiit na walang pasok sa Bulacan sa Enero 23 dahil sa Proclamaton No. 533 na nilagdaan ni Executive Secretary Paquito Ochoa Jr.m noong Disyembre 12.

Layunin ng proklamasyon ang malawakang pag-alaala sa nasabing araw na inilarawanni Alvarado bilang araw ng pagsilang ng pamahalaang Pilipino.

Iginiit pa niya na noon pang nakaraang linggo ay abala na ang kapitolyo at ang pamahalaang lungsod ng Malolos sa paghahanda para sa payak na pagdiriwang.

“Gusto kasi ng Pangulo ay simpleng pagddiriwang lamang dahil tinamaan tayo ng kalamidad noong Agosto at iba pang bahagi ng Pilipinas bago matapos ang 2012,” ani Alvarado sa kanyang lingguhang programang “the Governor’s Hour” na isinahimpapawid sa Radyo Bulacan noong Sabado, Enero 19.

Sa kabila naman ng pagahahanda para sa payak na pagdiriwang, inaasahang dudumugin ng mga Bulakenyo ang pagdiriwang dahil sa inaasahang pagdating ni Gob. ER Ejercito ng Laguna at Gob. Vila Santos ng Batangas.

Ang dalawa ay kapwa dating bituin sa pinilakang tabing ngunit paminsan-minsan ay gumagawa pa rin ng pelikula.

Si Gob. Santos ay higit na napatanyag sa kanyang pelikulang “Darna” Sis. Stella L” at iba pa, samantalang katatapos lamang ni Gob. Ejercito sa pelikulang “El Presidente.”

Bukod sa dalawang gobernador, inaasahan din ang paglahok nina Gob. Juanito Victor Remulla ng Cavite, Lilia Pineda ng Pampanga, Aurelio Umali ng Nueva Eciaja, Victor Yap ng Tarlac, Wilhelmino Alvarado ng Bulacan at Mayor Alfredo Lim ng Maynila.

Ayon kay Mayor Christian Natividad, ang mga nasabing opisyal ay kanilang inanyayahan sa layuning higit na mapalawak ang pagdiriwang ng Araw ng Republika.

“Hindi lang Bulacan ang nakinabang sa pagpapasinaya ng Republika sa Malolos noong 1899, buong Pilipinas ang nakinabang, pero ang Bulacan lamang ang gumugunita sa Araw ng Republika,” ani Natividad.

Nilinaw din niya ang dahilan ng pag-iimbita sa mga pinuno ng mga nasabing lalawigan at lungsod.

Ayon kay natividad ang mga nasabing lalawigan at lungsod ay kumakatawan sa walong sinag ng araw sa watawat ng Pilipinas.

Ang walong sinag na araw sa bandila ay kumakatawan sa unang walong lalawigang nag-aklas at lumahok sa rebolusyon laban sa rehimeng Kastila sa Pilipinas.

PNoy imbitado sa ika-114 na taong pagdiriwang ng Araw ng Republika

MALOLOS—Umaasa si Gob. Wilhelmino Alvarado sa paglahok ni Pangulong Benigno Aquino III sa pagdiriwang ng ika-114 na guning taon ng pagpapasinayan sa kauna-unahang Demoraktikong Republika sa Asya sa Enero 23.

Ang nasabing araw ay idineklarang ni Aquino bilang isang non-working holiday sa lalawigan ng Bulacan ayon sa Proclamation No. 523 na nilagdaan ni Executive Secretary Paquito Ochoa noong nakaraang Disyembre 10.

Ito ay matapos magpahatid ng imbitasyon sa Pangulo ang National Historical Commission of the Philippines (NHCP) sa pamumuna ni Dr. Serena Diokno.

Kaugnay nito, itatampok sa isang eksibisyon ang mga memorabilia at obra ng dalawang Bulakenyong  pambansang alagad ng sining na sina Ernani Cuenco at Guillermo Tolentino sa pagsasagawa ng taunang Fiesta Republika ng Lungsod ng Malolos na magsisimula sa Enero 17 at matatapos sa Enero 30.

“Sana ay makarating ang Pangulo, at sana walang makasabay na appointment sa January 23,” anio Gob. Alvarado sa kanyang lingguhang palatuntunang “the Governor’s Hour” na isinasahimpapawid sa Radyo Bulacan.

Ang pahayag ay ginawa ni Alvarado noong Sabado, Enero 12.

Ipinabatid ng punong lalawigan na ang imbitasyon sa Pangulo ay naipahatid na ng NHCP.

“Umaasa ako na makakarating ang Pangulo dahil malapit sa kanyang puso ang kasaysayan,” ani Alvarado.

Binigyang diin pa niya lubhang mahalaga ang pagdiriwang ng Araw ng Republika para sa bansa at inilartawan pa na “ito ang birthday  Republika ng Pilipinas, dito tayo nagsimula.”

Hinggil sa pagdedeklara ng Pangulo na isang non-working holiday ang Enero 23 sa lalawigan ng Bulacan, sinabi ni Alvarado na ito ay isang magandang pasimula.

Gayunpaman, sinabi niya na dapat ay buong bansa ang gumugunita sa Araw ng Republika at hindi ang Bulacan lamang.

“Dapat at national holiday ito,” ani ng punong lalawigan at binanggit na nagpasa siya ng isang panukalang batas sa kongreso noong siya ay isa pang kongresista.

Hindi pa napagtibay ang nasabing panukalang batas, kaya’t ito ay muling inihain sa Kongreso ni Kint. Marivic Alvarado, ang maybahay ng gobernador.

Kinatigan naman ng mga historyador sa lalawigan ang panukala ng mag-pasawang Alvarado na itakda bilang isang national holiday ang Araw ng Republika tuwing ika-23 ng Enero.

Ayon kay Isagani Giron, dating pangulo ng Samahang Pangkasaysayan ng Bulacan (Sampaka), ang Araw ng Republika at dapat gunitain ng bawat Pilipino.

Ito ay dahil sa ito ang kauna-unahang demokratikong republika sa buong Asya.

Ang Araw ng Republika ay pinasinayaan sa makasaysayang simbahan ng Barasoain noong Enero 23, 1899 matapos mapagtibay ang Saligang Batas ng Malolos ng mga kasapi ng Kongreso ng Malolos.

Ang nasabing Kongreso ay pinasinayaan noong Setyembre 15, 1898 at siya ring nagpatibay sa kalayaang idineklara ni Heneral Emilio Aguinaldo sa Kawit, Cavite noong Hunyo 12, 1898.

Samantala, itatampok sa idaraos na Fiesta Republika sa lungsod na ito ang eksibit ng mga memorabilla at obra ng mga National Artists na sina Ernani Cuenco at Guillermo Tolentino.

Layunin nito na maipagmalaki at maipakilala sa bagong henerasyon ang mga dakilang likhain ng mga Pambansang Alagad ng Sining na anak ng Malolos.

Naging popular si Tolentino dahil sa kanyang likhang Oblation na makikita sa Unibersidad ng Pilipinas sa Diliman at ang Bonifacio Monument na matatagpuan sa Lungsod ng Kalookan.

Noong Hunyo 24, 2012, ginanap ang paghawi ng tabing sa pananda ng kasaysayan na inilagay ng Pambansang Komisyong Pangkasaysayan ng Pilipinas sa kanyang pook na sinilangan, sa Sabitan, Sto Rosario.

Samantala, si Cuenco na mula sa Barangay Tikay ay kilala bilang isang magaling na kompositor.

Ilan sa mga pinatanyag nyang komposisyon ang “Gaano ko ikaw kamahal “ at “ Kalesa”.

Ang Tolentino y Cuenco Exhibit ay bubuksan sa Enero 17 kasabay ng pagbubukas ng Fiesta Republika sa Museo ng Barasoain at tatagal ito hanggang Enero 30.

Muling isasagawa ang taunang Fiesta Republika kaalinsabay ng ika-114 guning taon ng  pagkakatatag ng unang republika ng Pilipinas sa Malolos.  (Dino Balabo)