Di tapos na kalsada’t tulay sumalubong sa mga mag-aaral sa pagbubukas ng klase

Calumpit bridge

CALUMPIT, Bulacan—Handang-handa ang mga paaralang pampubliko sa lalawigan sa pagbubukas ng klase noong Lunes, Hunyo 2, ngunit ang sumalubong sa kanila ay mga di pa natatapos na kinukumpuning tulay at mga lansangan.

Kaugnay nito, pinalalahanan Department of Public Works and Highways (DPWH) ang mga kontraktor ng mga pagawaing bayan sa lalawigan na madaliin ang mga proyekto upang hindi makaabala at di abutan ng tag-ulan.

Ikinagalak naman ni Gob. Wilhelmino Alvarado ang maayos at payapang pagbubukas ng klase sa buong lalawigan kung saan ay daan libong mag-aaral ang nagbalik eskwela.

Ipinagmalaki ng punong lalawigan ang paghahanda sa 457 paaralang elementarya  at 87 paaralang sekundarya sa lalawigan na noong nakaaarang linggo ay nilinis at kinumpuni kaugnay ng pagsasagawa ng taunang Brigada Eskwela.

Bukod dito, ipinagmalaki rin ng punong lalawigan na sapat ang mga silid aralan salalawigan dahil sa halos 2,000 silid aralan na naitayo sa nagdaaang dalawang taon.

Ang konstruksyon sa mga  nasabing silid aralan ay pinondohan ng kapitolyo at ng Department of Education (DepEd).

Hinggil sa kapayapaan at kaayuna, naging maagap dinang kapitolyo sapag-uutos sakapulisan upang magtalaga ng mga pulis sa mga istratehikong lugar upang matiyak ang kaayusan at kapayapaan.

Ngunit ang sa kabila ng mga paghahandang ito, ang naiwasan ng maraming mag-aaral partikular na sa sekundarya ay ang trapiko sa mga piling lansangan sa lalawigan sanhi ng mga di pa natatapos konstruksyon at rehabilitasyon ng mga lansangan at mga tulay.

Kabilang dito ang tulay sa bayang ito na noong huling linggo ng Mayo ay bumagsak; at ang tulay sa bayan ng Balagtas na sa kahabaan din ng MacArthur Highway.

Ang tuilay sa Balagtas ay nadadaanan ng mga sasakyan tulad ng mga bus at public utility jeepney.

Ngunit ang tulay sa bayang ito ay hindi dahil kasalukuyan pa itong kinukumpuni, bukod pa sa pagbagsak ng gitnang bahagi nito noong Mayo 25.

Dahil sa sarado pa ang tulay sa bayang ito,ang mga tao ay nagsisitawid sa pinatatag na hanging bridge na katabi nito.

Ang mga motorsiklo naman ay isinasakay sa mga bangka at itinatawid sa ibayo ng Ilog Angat.

 

Malis Elementary School sa Guiguinto. Larawang kuha ni Anjeline Domingo

Ito ay dahil sa hindi pa natatapos ang idinadagdag na tig-isang metro espasyo sa magkabilang gilid ng hanging bridge.

Ayon sa DPWH, kapag natapos ang nasabing dagdag na espasyo, makakatawid na rin ang mga mottorsiklo sa nasabing hanging bridge.

Hinggil naman sa konstruksyon at mga rehabilitasyon ng mga lansangan, hindi pa rin natatapos ang lansangan sa bahagi ng bayang ito, maging sa Hagonoy, Paombong at Lungsod ng Malolos.

Mahaba pa rin ang kalsadang kinukumpuni sa kahabaan ng MacArthur Highway sa bahagi ng mga bayan ng Bocaue, Marilao, at Lungsod ng Meycauayan.

Ayon sa ilang magulang,kailngang gumising ang kanilang mga anak ng maaga upang makatiyakna makakarating sa oras sa paaralan.

Ito ay upang makaiwas din sa mabagal na daloy ng trapiko sa mga nasabing lugar.

Bukod rito, iginiit ng ilan na dapat ng ipakumpuni ang hanging bridgena nag-uugnay sa Barangay Iba, Hagonoy at Barangay Iba Este sa bayang ito.

Maging ang hanging bridge sa Sitio Parong-parong sa Barangay San Agustin sa bayan ng Hagonoy ay ipinanawagang maipakumpuni agad.

Nagpasalamat naman ang mga guro at mag-aaral sa Barangay Abulalas sa Hagonoy dahil nakumpuni na ang hanging bridge sa kanilang lugar.  (Dino Balabo)

Kinukumpuning Calumpit Bridge bumagsak, 2 sugatan

CALUMPIT, Bulacan—Dalawang obrero ang iniulat na nasaktan sa pagbagsak ng kinukumpuning  tulay sa Calumpit, Bulacan noong Biyernes ng umaga, Mayo 23.

Ang mga biktima ay nakilalang sina Robert Vidal, isang crane operator at Jerry David, isang mason.

Sila ay agad na isinugod sa di kalayuang Sta. Cruz Hospital ng mga kasapi ng Calumpit 1024 volunteer rescue group na nakatalaga sa tulay upang tumugon sa katulad na insidente.

Ayon kay Inhinyero Ruel Angeles, hepe ng Department of Public Works and Highway (DPWH) First Engineering District, ang pagbagsak ng tulay ay isang aksidente.

Ikinuwento niya na bago maganap ang aksidente ay inilipat ng kontrator na Wing-An Construction Development Corporation ang kanilang mga kagamitan sa gitna ng tulay upang bigyang daan ang demolisyon ng south span ng tulay.

Ang south span ng tulay ay nasa bahagi ng Poblacion, Calumpit at ng north span nito ay nasa bahagi ng Barangay Gatbuka.

“Ang ide-demolish ay yung span sa side ng Poblacion kaya yung mga equipment ay inilipat sa mid-span pero bumigay din yung mid-span,” ani Angeles.

Iginiit pa ni Angeles na ang pagbagsak ng middle span ng tulay ay nagpapakita lamang na mahina na iyon at dapat na talagang palitan.

Sa pagbagsak ng middle span ng tulay ay bumagsak din ang mga steel truss sa ibabaw nito na tumama samga kagamitan tulad ng crane at lifter.

Una rito, inirereklamo na ng mga residente ang mabagal na rehabilitasyon ng tulay na nagsimula noong Hunyo 2013 at dapat sana ay natapos nitong Abril.

Ngunit humiling ng dagdag na panahon ang kontraktor dahil sa mga tatanggaling steel, concrete at wooden piles sa ilalim ng tulay.

Ayon kay Angeles, tinatayang matatapos ang tulay sa darating na Setyembre.

Matatandaan na ng rehabilitasyon sa tulay ay isinulong matapos ang pagbagsak ng Colgante Bridge sa bayan ng Macabebe, Pampanga noong 2011.  Dino Balabo at Rommel Ramos

HANGING BRIDGE: P5-M gugugulin sa malawakang pagkukumpuning hinihintay

 

CALUMPIT, Bulacan—Limang milyong piso na ang inihanda ng administrasyong Aquino para sa pagpapakumpuni ng hanging bridge na nag-uugnay sa mga barangay ng bayang ito at ng bayan ng Hagonoy.

Ngunit sa kabila na matagal nang naihanda ang nasabing piondo ay hindi pa rin ito na nailalabas upang magugol sa pagpapakumpuni ng nasabing hanging bridge na muling nasira noong Marso 3.

Ayon kay Gob. Wilhelmino Alvarado, ang nasabing pondo ay mula sa pondo ng National Disaster Risk Reduction Management Council (NDRRMC).

Ito ay nakakatulad ng pondo na ipagkakaloob din sana ng Malakanyang sa isa pang gobernador para sa pagpapakumpuni rin ng tulay.

Ngunit hindi rin nailabas ang nasabiong pondo dahil sa nagkaroon ng kalaban sa halalan sa Mayo ang nasabing punong lalawigan.

“Maghintay na lang tayo ng ilang panahon, marerelease na yung pondo para sa Iba hanging bridge.”ani Alvarado.

Ngunit sa pananaw ng ibang Bulakenyo,hindi na kailangan ang pondo mula sa NDRRMC upang maisagawa ang malawakang pagpapakumpuni sa Iba hanging bridge.

Ito ay dahil sa ang pondo ng pamahalaang panglalawigan para sa kalamidad ay umaabot sa mahigit P100-M bawat taon.

Ang calamity fund ng bawat pamahalaang lokal ay limang porsyento ng kabuuang pondo sa isang taon.

Batay sa impormasyong naipon ng Mabuhay,umaabot sa halos P3-Bilyon ang pondo ng kapitolyo sa taong 2012.

Batay sa mas naunang pahayag, sinabi ni Kapitan Celerino Fajardo ng Iba, Hagonoy na ang nasabing hanging bridge ay sinimulang itayo noong 1997.

Sa pananalasa ng malalim napagbahang hatid ng Bagyong Pedring noong 2011,nasira at pumalipit ang hanging bridge matapos bumalandra sa ilalim nito ang maraming waterlily na tinangay ng agos.

Noong Enero ay sinimulan ng kapitolyoang inisyal na pagpapakumpuni sa hanging bridge, ngunit nito Marso 3 at nasira ang pamakuan o girder nito sa gitna.

Dahil dito, nagsagawa ng pansamantalang pagkukumpuniang pamahalaang barangay ng Iba, Hagonoy.

Ngunit binigyang diin ni Fajardo na kailangan pa rin ang malawakang pagpapakumpuni.

HANGING BRIDGE: Muling nasira, malawakang pagkukumpuni dapat nang isagawa

HAGONOY, Bulacan—Dapat nang magsagawa ng malawakang pagkukumpuni sa hanging bridge na nag-uugnay sa mga barangay ng Hagonoy at Calumpit matapos na muli itong masira noong Marso 3.

Nagsagawa naman ng agarang pagkukumpuni sa nasabing tulay ang mga opisyal ng Barangay Iba sa bayang ito, ngunit ayon sa kanila, iyon ay pansamantala lamang.

Ayon kay Kapitan Celerino Fajardo ng Barangay Iba, hindi maaring pagtalinang kasalukuyang kalagayan ng nasabing tula.

“Kailangan ang major repair dahil baka may madisgrasya,” ani Fajardo patungkol sanasabing tulay na nag-uugnay sa barangay Iba sa bayang ito at Iba Este sa bayan ng Calumpit.

 

Ang nasabing tulay ay ginagamit na tawiran ng mga residente ng dalawang barangay, kabilang na ang mga batang mag-aaral.

Upang matiyak ang kaligtasan ng mga batang mag-aaral, sila ay ihinihahatid at sinusundo ng kanilang mga magulang sa eskwela.

Sa pagmamasid ng Mabuhay noong Miyerkoles, Marso 6, napansin na ilang magulang ang binubuhat ng kanilang magulang pagsapit sa bahagi ng tulay na nasira.

Ilang kabataan namang namasyal  sa nasabing tulay na nagmula sa barangay Calumpang sa bayan ng Calumpitang hindi na tumuloy sa pagtawid sa pangambang madisgrasya.

“Totoo ang sabi ni Kapitan, kailangan na na talaga ang major repair dahil paulit-ulit na nasisira yan,”sabi ni Kagawad Soledad Santos ng nasabing barangay.

 

Ayon kay Santos, marami na silang hiningan ng tulong upang tuluyang makumpuni ang tulay.

“Puro minor repairs lang,” sabi niya at iginiit na noong nakaraang taon ipinakumpuni ngh kapitolyo ang tapakan ng hanging bridge sa pamamagitan ng paglalatag ng mga bagong table.

Nagbigay naman ng ilang piraso ng kawahyan ang pamahaalang bayan ng Hagonoy bilang pamalit sa mga gabay ng tulay na nasira.

Ayon kay Kapitan Fajardo, ang nasabing tulay ay sinimulang itayo noong 1977, at may kabuuang habang 142 linera meters na tumawid sa magkabilang pampang Labangan channel.

Sa panayam ng Mabuhay kay Fajardo, ikinuwento niya mula noong 1977 ay minsan pa lamang nagsagawa ng major repair sa hanging bridge.

Kaugnay nito, sinabi ni Inhinyero Ruel Angeles ng Department of Public Worksand Highways (DPWH) First Engineering District na pinapuntahan na nila sa kanilang tauhan ang hanging bridge upang masuri.

Nangako naman kay Gob. Wilhelmino Alvarado na ipakukumpuni niya ang nasabing tulay.

Matatandaan na noong nakaraang taon ay muling nasira ang nasabing tulay matapos na pumalipit ito g bumalandra ang mga water lily na natangay ng pagbahang hatid ng bagyong Pedring noong Oktubre 2011.

Noong Linggo ng hapon, nabali ang wooden girder o pamakuang tahilan sa gitna ng tulay kaya’t lumaylay ang may tatlong metrong bahagi nito.

Dahil sa paglaylay, naghatid ito ng pangamba sa mga dumadaan dahil sa posibilidad na tuluyang bumagsak iyon.

Ayon kay Ver Fajardo, isang residente na karaniwang nangangawit ng isda mula sa tulay, maging siya ay natatakot dumaan dahil baka mahulog siya.

“Mas delikado iyan samga bata, malalaimang bahaging ito ng ilog,” sabi ni Fajardo.

Batay sa pagtaya ni Fajardo, umaabot sa mahigit 20 talampakan ang lalim ng ilog sa ilalim ng tulay.  Dino Balabo

PLARIDEL-BUSTOS BYPASS: P163-M natipid sa proyekto ikinagalak ni PNoy

Makikita si PNoy matapos pasinayaan ang Plaridel-Bustos by-pass road.

BOCAUE, Bulacan—Ikinagalak ni Pangulong Benigno Aquino III ang malaking pondong natipid ng Department of Public Works and Highways sa pagpapatupad ng dalawang proyektong pinasiyaan niya sa Bulacan noong Biyernes, Marso 1.

Ang kagalakan ng Pangulo hindi niya naisatinig, ngunit nabakas ito sa kanyang ngiti at pangunguna sa pagpalakpak habang nagsasagawa ng project briefing si Public Works Undersecretary Alfredo Tolentino sa tulay ng bayang ito.

Ang project briefing ay isinagawa matapos pangunahan ng Pangulo ang inaugural drive sa 14 na kilometrong phase 1 ng Plaridel-Bustos by-pass arterial road project; at bago isagawa ang pasinaya sa pinalapad na tulay sa bayang ito noong araw ding iyon.

Kapansin-pansin naman na walang kasamang kandidatong senador ng Liberal Party ang Pangulo sa pagpapasinaya sa dalawang proyektong naglalayon na mapaluwag an gang daloy ng trapiko sa lalawigan, na naghatid din ng pagsisikip ng daloy ng trapiko sa kahabaan ng MacArthur Highway habang isinasagawa ang briefing at pasinaya sa tulay.

Ayon kay Tolentino, ang Plaridel Bypass ay may kabuuang habang 24-61 kilometro mula sa North Luzon Expressway (NLEX) hanggang Barangay Maasim sa bayan ng San San Rafael.

Ang unang bahagi nito ay may habang 14.675 kilomentro mula NLEX hanggang sa bayan ng Bustos.

Ang nasabing bahagi ay pinondohan ng halagang P706.544-Milyon, ngunit ang nagstos lamang ay P593-M, o halos P113-M na katipiran.

Project briefing sa Bocaue bridge.

Ayon kay Tolentino, umabot sa P163-Milyon ang natipid sa nasabing proyekto, ngunit sa huling pagbisita ni Secretary Rogelio Singson ay may ipinadagdag na tambak sa mga tulay na nagkahalaga ng P50-M.

Bukod dito, ang proyekto ay natapos noong  Nobyembre 21, 2012 o tatlong buwan bago matapos ang itinakdang araw upang iyon at tapusin.

Ang mga kalagayang ito ay ikinagalak ni Pangulong Aquino kaya’t siya ay napapalakpak sa pagsasagawa ng briefing ni Tolentino.

Hinggil naman sa pinalapagd na tulay ng Bocaue, sinabi ni Tolentino na maaga rin iyong natapos at nakatipid sila ng halos P4-M.

Ang kabuuang pondong nagugol sa tulay ng Bocaue ay P57.416-M, ngunit ang kabuuang pondong inihanda roon ay P61.593-M.

”Ito po ang epekto ng inyong kampanyang tuwid na daan, kaya tuwid ang bidding pati implementasyon,” Tolentino.

Iginiit pa niya na ang ikalawang bahagi ng Plaridel By pass na may habang 10 kilomentro ay sisimulang isubasta sa Marso 5.

Kasama sa konstruksyon ng ikalawang bahagi ng Plaridel bypass ay ang tulay na may habang mahigit sa isang kilometro na tatawid sa Ilog Angat sa pagitan ng mga bayan ng Bustos at San Rafael.

Ito ay tinatayang matatapos sa unang tatlong buwan ng 2016.

Ngunit ayon kay Tolentino, kung ang nasabing proyekto ay isasagawa ng walang tigil sa loob ng 24 oras sa bawat araw, matatapos iyon bago magtapos ang 2015.

“Mahigit pos a 40 porsyento ng trapiko ang mababawas sa kahabaan ng Cagayan Valley Road dahil sa Plaridel Bypass,” dagdag pa niya. Dino Balabo