Pinakamataas na bilang ng lumagda sa recall petition naitala sa Malolos

 
MALOLOS—Dismayado na nga ba ang mga Bulakenyo partikular na ang mga residente ng lungsod na ito sa ika-apat na taon ng panunungkulan ni Gob. Wilhelmino Albarado?

Ito ang katanungan ng marami matapos ilabas ng Commission on Elections ang tala ng bilang ng mga lumagda sa petisyon ng recall election na isinumite laban sa punong lalawigan kung saan naitala ang pinakamataas na bilang mga lumagda sa lungsod na ito.

Samantala, nailipat na sa Office of the Deputy Executive Director for Operations (ODEDO) sa punong tanggapan ng Comelec sa Maynila ang mga dokumentong isinumite kaugnay ng petisyon noong Lunes, Mayo 5 matapos ang inisyal na pagsusuri ng Comelec-Bulacan.

Tumanggi ng magbigay ng pahayag si Alvarado hinggil sa petisyon ng siya ay kapanayamin ng Mabuhay noong Lunes, matapos ang paglulunsad ng Sine Bulakenyo sa Capitol Gymnasium.

Ang Sine Bulakenyo ay isang libreng pa-sine na isasagawa ng kapitolyo sa mga barangay sa layuning mapataas ang kaalaman ng mga Bulakenyo sa hinggil sa mga naisagawa at iapatutupad na proyekto ng administrasyong Alvarado.

Ngunit para sa ilang Bulakenyo, ang nasabing pa-sine ay isang kontra propaganda matapos lumagda sa petisyong recall election ang 319,707 Bulakenyo dahil sa kawalan ng tiwala kay Alvarado bunga ng diumano’y kurapsyon at pag-abuso sa kapangyarihan,

Batay sa tala ng Comelec-Bulacan, nanguna ang lungsod na ito sa 21 bayan ay dala pang lungsod sa lalawigan sa dami ng lumagda sa nasabing petisyon.

Ayon kay Abogado Elmo Duque, umabot sa 25,835 botanteng Malolenyo ang lumagda sa petisyon; kasunod ang bayan ng Sta.Maria kung saan ay umabot sa 22,988 ang lumagda.

Ang iba pang bayan at lungsod sa lalawigan na nakapagtala ng mataas na bilang ng lumagda sa petisyon ay ang Marilao (22,676), Lungsod ng San Jose Del Monte (22,486), Bocaue (18,411), at Baliwag (15,593).

Naitala naman sa bayan ng Hagonoy ang pinakamababang bilang na 947.

Ang Hagonoy ay ang bayang pinagmulan ni Alvarado kung saan ay naglingkod siya bilang alkalde mula 1986 hanggang 1998; na sinundan ng paglilingkod mula 1998 hanggang 2007 bilang kongresista ng unang distrito ng lalawigan na sumasakop din sa nasabing bayan.

Kung distrito naman ang pag-uusapan, naitala ang pinamakataas na bilang ng lumagda sa petisyon mula sa ikatlong distrito.

Batay sa tala ng Comelec-Bulacan,umabot sa 87,489 botante ang lumagda sa petisyon mula sa ikatlong distrito,kasunod ang ikalawang distruito na may 83,783.

Ang ikaltlong distrito ng Bulacan ay kinakatawan sa Kongreso ni dating Gob. Joselito Mendoza na ang pamilya ay nagmula sa bayan ng Bocaue na matatagpuan sa ikalawang distrito.

Matatandaan na noong Abril 25, isinumite ni Perlita Mendoza ng bayan ng Bocaue sa Comelec Bulacan ang kopya ng mga dokumentong para sa petisyong election recall laban kay Alvarado.

Si Mendoza ay naglingkod bilang Provincial Administrator ng Bulacan sa panahon ng administrasyon ni dating Gob. Joselito Mendoza noong 2007 hanggang 2009.

Pansamantala rin siyang naglingkod bilang City Information Officer ng  Malolos noong 2010, ngunit nagbitiw sa tungkulin matapos kuwestiyunin ang kanyang tirahan.

Una rito, isang kaso ng pandarambong ang ihinhain ni Antonio Manganti sa Ombudsman laban kay Alvarado at anim pang opisyal ng kapitolyo noong Pebrero 14.

Ayon kay Alvarado, pulitika ang motibo ng pagsasampa ng kasong pandarambong laban sa kanya at mga opisyal ng kapitolyo ngunit pinabulaanan ito ni Manganti.

Si Manganti ay isang dating rebel returnee na naglingkod din sa kapitolyo sa panahon ng panungkulan ni dating Gob. Josefina Dela Cruz, ang nakatatandang kapatid ni Kint. Mendoza ng ikatlong distrito.

Si Dela Cruz ay kasalukuyang nanunungkulang ngayon bilang Post Master General ng Philippine Postal Corporation.  Dino Balabo

Petisyong recall election laban kay Gob Alvarado isinumite na sa Comelec

 

MALOLOS—Naisumite na sa tanggapan ng Commission on Elections (Comelec) sa Bulacan ang petisyong recall election laban kay Gob. Wilhelmino Alvarado.

Ito ay matapos ang ilang buwan ng bulung-bulungan sa lalawigan na may mga taong nagsusulong ng recall election laban sa punong lalawigan na sa halalan noong Mayo 2013 ay kumandidato na walang katunggali o unopposed.

Batay sa sipi ng petisyon, ang nanguna sa pagsasampang recall election laban kay Alvarado ay si Perlita Mendoza ng 714 Mendoza Street, Barangay Lolomboy,Bocaue Bulacan.

Si Mendoza ay sinasabing dating Provincial Administrator ng kapitolyo sa panahon ng panunungkulan ni dating Gob. Joselito Mendoza na ngayon ay kongresista ng ikatlong distrito ng Bulacan.

Bilang pangunahing petitioner, si Mendoza ay kumakatawan sa 319,707 na Bulakenyong lumagda sa nasabing petisyon.

Sa kabuuan, sinabi ni Abogado Elmo Duque na umabot sa 80 kahon ang isumiteng dokumento sa kanilang tanggapan.

Ito ay dahil sa ang mga nagpetisyon ay nahati sa 12 grupo at ang bawat kopya ng petisyon ay may pitong sipi.

“I confirm na may petition para sa recall election laban kay Governor na isinumite sa aming tanggapan kahapon ng alas-11:30 ng umaga,” ani Duque sa panayam ng Mabuhay noong Martes, Abril 29.

Si Duque ang Provincial Election Supervisor ng Comelec sa Bulacan.

 

Front page ng petisyon.

Sa panayam,nilinaw ni Duque na sa proseso ng paghahain ng recall election,nangangailangan ito ng lagda ng 10 porsyento ng voting  population ng isang local government unit (LGU).

Dahil ang punoing lalawigan ang pinetisyon, ito ay ngangailangan ng 10 porsyento ng voting population ng buong lalawigan.

Batay sa sertipikasyon na ipinagkaloob ng National Statistics Office (NSO) kay Abogado Jolette Fajardo na inilakip sa kopya ng petisyon,ang kabuuang voting population ng Bulacan ay umaabot sa 1,830,698 ayon sa isinagawang census noong 2010.

Ipinaliwanag pa ni Duque na ang voting population ay ang bilang ng mga mamamayan ng lalawigan na may edad 18 taong gulang pataas, rehistrado man o hindi.

Gayunpaman, iginiit niya na kahit nakabatay ang 10 porsyento sa voting population, ang mga lumagda sa petisyon ay dapat nakarehistro bilang botante at bumoto sa halalan noong Mayo 2013.

 

Pagsusuri sa form and substance ng petisyon.

Hinggil naman sa bilang na 319,707 na lumagda, sinabini Duque na, “based on initial assessment, umaabot sa halos 20 percent ng voting population ng Bulacan ang pumirma sa recall petition.”

Sa panayam, nilinaw pang Abogado an ang kanilang ginawa sa isinumiteng dokumento ay “ministerial lamang.”

Kabilang sa kanilang sinusuri ay kung ang bawat pahina ng nilagdaan ng mga nagpetisyon ay nakasulat ang pangalan at posisyon ng pinetisyon, maging ang dahilan kung bakit pinetisyon.

“Importante na nakasulat ang mga impormasyon ito sa bawat signature sheet para walang fraud o panloloko sa pagpapapirma,” ani Duque.

Batay sa  isinumiteng dokumento nakita ng Mabuhay,ang dahilan  ng pagpetisyon kay Alvarado ay ang “loss of confidence due to graft and corrupt practices and abuse of authority” o “kawalan ng tiwala dahil sa korupsyon at pag-abuso sa kapangyarihan.”

Kaugnay nito,nilina ni Duque na may tatlong araw lamang sila upang iproseso ang mga dokumentong isinumite sa kanilang tanggapan.

“Limitado muna kami sa form and substance ng petition dahil three days lang ang allow sa amin batay sa ruling ng Commission,” aniya.

Pagkatapos nito,ay isusumite nila sa Office of the Deputy Executive Director for Operations (ODEDO)  angmga dokumento.

 

Mga kahon ng petisyong isinumite sa Comelec.

Ang ODEDO ay may tatlong araw di lamang upang suriin ang “form and substance” ng petisyon bago ito ilipat sa Comelec En Banc.

Ang En Banc naman ay 15 araw bago maglabas ng desisyon.

Ayon kay Duque, may dalawang posibilidad ang desisyon ng En Banc—tuloy o hindi.

“Pag may pondo, tuloy yan at saka namin sisimulan yung verification kung yungmga pumirma ay registered voters at bumoto sa magdaang halalan,” ani Duque.

Kung wala namang pondo, maaaring makatulad itong desisyon ng En Banc sa katulad na petisyon na isinumite ni dating Puerto Princesa City Mayor Edward Hagedorn laban kay incumbent Mayor Lucio Bayron.

Ang naging desisyon ng Comelec En Banc sa nasabing kaso ay “suspended” ang proceedings dahil saw ala pang pondo.

Ayon kay Duque, maaaring sa 2015 masimulan ang aktuwal na proseso sa recall petition kung ito ay mapondohan sa General Appropriation Act bago matapos ang taon. Dino Balabo

Tuloy ang laban ng nag-iisang kandidatong transgender sa Bulacan

Jhane Dela Cruz (left).

HAGONOY, Bulacan—Sa kabila ng kritisismo at mapanirang tsismis na ipinakalat ng kanyang mga katunggali, tuloy pa rin ang laban ng isang 29 anyos na trans-gender sa bayang ito.

Siya ay si Jhane Dela Cruz, isang matagumpay na insurance manager na kandidato ngayon bilang kapitan ng Barangay Iba sa bayang ito.

Sa panayam ng Mabuhay Online, sinabi ni Dela Cruz na hindi hadlang sa isang lingkod bayan ang sexual orientation.

Binigyang diin pa niya na walang batas ang nagbabawal sa isang tulad niya upang kumandidato at maglingkod sa kanyang kababayan.

Ang pananaw na ito ay kinatigan ni Abogado Elmo Duque, ang provincial election supervisor sa Bulacan.

Ayon kay Dunque, malinaw ang itinatakda ng batas para sa mga nais kumandidato at walang isinasaad doon na nagbabawal sa isang tomboy, bakla at transgender.

Para kay Dela Cruz ang pagiging isang transgender ay may bentahe sa paglilingkod.

Ito ay ang pagiging tutok sa trabaho dahil walang iniintinding pamilya na maaaring maging dahilan upang maligwak ang kanyang panglilingkod.

Sa kabila naman ng kanyang pagiging transgender, buo ang suporta kay Dela Cruz ng kanyang mga magulang, kapatid, kaanak at mga kaibigan.

Sinabi niya na wala siyang planong kumandidato, ngunit nakiusap sa kanya ang mga residente ng Barangay Iba na lumahok upang magkaroon ng pagbabago at kaunlaran sa kanilang barangay.

Ayon kay Sol Santos, isang reeleksyunistang kagawad, matagal ng tumutulong sa mga pulitiko at mga kandidato si Dela Cruz kaya nagkaisa ang kanyang kabarangay na himukin ito na siya ang kumandidato.

Bago pumasok sa larangan ng pulitika, si Dela Cruz ay matagumpay na branch manager ng Peoples’ General Insurance sa Bulacan.

Siya ay nagtapos ng kursong interior design sa Estados Unidos.  Dino Balabo

Mayor Germar diniskwalipika dahil sa pamimili ng boto

 

NORZAGARAY, Bulacan—Hindi pa umaabot sa unang ika-100 ng panunungkulan ang alkalde ng bayan ng Norzagaray, ngunit diniskwalipika na siya ng Commission on Election (Comelec).

Ito ay dahil sa kaso ng malawakang pamimili ng boto sa natapos na halalan noong Mayo na isinampa sa kanya ni dating Mayor Feliciano Legazpi.

Ang desisyon na nagdiskwalipika kay Germar ay inalabas ng Comelec First Division noong Huwebes, Oktubre 3, o ang ika-94 na araw ni Germar bilang alkalde.

Si Germar ay nagsimulang manungkulan noong Hulyo 1.

Sinalubong naman ng magkataliwas na reaksyon ang balita ng pagkakadiskwalipika kay Germar.

Sa hanay ng kampo ni dating Mayor Legazpi ay may kasiyahan, ngunit nananatiling kalmado habang naghihintay ng pinal na desisyon ng Comelec En Banc.

Ang mga taga-suporta naman ni Germar at tahimik, ngunit may mga usap-usapan ng paghahanda sa posibilidad ng pagbabarikada sa munisipyo ng Norzagaray.

Ang kalagayang ito ay naramdaman ng ilang mamamahayag sa lalawigan na nagtangka ng kapanayamin si Germar noong Huwebes.

Mahigipit ang naging seguridad sa munisipyo at ang bawat pumasok ay hinahanapan ng ID card, maging mga mamamayahag.

Ang paghihigpit sa seguridad ay para namang naglayo kay Germar dahil sa hindi siya makapanayamhangga’t walang nakatakdang appointment.

Sa kabila ng masasalaming pagiwas sa pagharap sa mga mamamahayag ni Germar, naging maluwag naman ang kampo ni Legazpi sa mga panayam.

Sa isang panayam ng Radyo Bulacan noong Biyernes,Oktubre 4, sinabi ni Legazpi na ang desisyon ng Comelec ay isang bindikasyon sa kanialng ipinaglalabang malinis na halalan.

“Nagpapatunay lamang itona may malawakang pamimili ng boto sa Norzagaray,”sabi ng dating alkalde patungkol sa pahayag ni James Jimenez na diniskwalipika ng Comelec First Division si Germar.

Si Jimenez ang tagapagsalita ng Comelec.

 

Comelec Chair Brillantes

Ang kopya naman ng desisyon ay nakuha ng kampo ni Legazpi noong Huwebes ng hapon.

Bahagi ng desisyon ay nag-aatas na ang anak ni Legazpi na si Arthur ang papalit kay Germar bilang Alkalde.

Si Arthur ay nahalal na bise alkalde noong Mayo.

Ayon sa matandang Legazpi,ang pinagbatayan ng desisyon ng Comelec sa kung sino  ang papalit kay Germar ay ang rules of succession na isinasaad ng Local Government Code of 1991.

Dahil sa desisyon ito ng Comelec, lumalabas na hindi makikinabang ang dating alkalde sa resulta ng kasong kanyang isinampa laban kay Germar.

Gayunpaman, iginiit ng dating alkalde na wala siyang panghihinayang sa naging desisyon ng Comelec.

Iginiit niya na “ang mahalaga ay napatunayan namin na ang ginawa nila ay mali at di dapat pamarisan.”

Si Legazpi ay nanungkulan bilang alkalde ng Norzagaray sa loob ng 15 taon.

Para naman sa kanyang anak na si Vice Mayor Arthur, magpapatuloy siya bilang bise alkalde ng Norzagaray hanggang sa lumabas ang pinal na desisyon sa kaso laban kay Germar.

“This is not yet final and executory, and they can still appeal. For the meantime, I am still the vice mayor,” sabi ng batang Legazpi.

Nagapahayag din siya ng pagtitiwala na lalabas ang katotohanan aty maghahari ang katarungan hinggil sa malawakang pandaraya sa halalan sakanilang bayan.

Matatandaan na sa nagdaang halalan ay nakatunggali ng mag-amang Legazpi ng National Unity Party (NUP)  sina Germar at Roberto Esquivel ng Liberal Party.

Ang matandang Legazpi ay natalo kay Germar, ngunit nagwagi ang kanyang anak na si Arthur laban kay Esquivel.

Pagkatapos ng halalan,nagsampa ng kaso ang matandang Legazpi laban kay Germar, samantalang sinampahan ni Esquivel ng kaso si Arthur.

Kinatigan ng Comelec ang kasong isinampa ng matandang Legazpi; samantalang ibinasura ng Regional Trial Court ang kasong isinampa ni Esquivel laban kay Arthur.

Si Arthur ay unang pumasok sa pulitika noong 2010 kung kailan ay naghalal siya bilang Konsehal.

Nitong Mayo, kumandidato siya bilang bise alkalde ng kanyang ama bilang paghahanda sa kanyang kandidatura bilang mayor sa 2016.

Nagwagi bilang bise alkalde si Arthur, ngunit ang katuparan ng kanyang pangarap na maging alkalde ng Norzagaray ay mukhang mapapaaga kapag tuluyang nadiskwalipika si Germar 

Batay naman sa tala ng Mabuhay, kapag tuluyang nadiskwalipika si Germar bago matapos ang taon, maitatala sa kasaysayan na ang Norzagaray bilang isa sa natatanging bayan sa bansa na nagkaroon ng apat na alkalde sa loob lamang ng isang taon.

Matatandaan na noong Disyembre ay nasuspinde bilang alkalde ang matandang Legazpi at itinalagang acting mayor si Vice Mayor Boyet Santos.

Bago dumating ang Hulyo, muling nakabalik sa puwesto ang matandang Legazpi, ngunit bumaba rin upang bigyang daan ang proklamasyon ng pagkakahalal kay Germar.

Kung matutuloy ang pagdiskwalipika kay Germar,papalitan siya ni Arthur,ang ika-apat na alkalde ng Norzagaray sa loob lamang ng isang taon.(Dino Balabo)