COMELEC: Aaksyunan ang sumbong sa Radyo Bulacan

MALOLOS—Walang panahon para magbukas ng Facebook ang Commssion on Elections (Comelec ) sa Bulacan upang tunghayan angmga sumbong laban sa mga lumalabag sa batas ng halalan.

Ito ay sa kabila ng paghikayat ng punong tanggapan ng Comelec samga botante na gamitin ang social media upang isumbong o ipabatid ang mga lumalabag sa batas.

Ngunit sa kabila ng kawalan ng panahon para magbukas ng Facebook ng Comelec-Bulacan, hinikayat din nila ang mga botante na ipahatid sa mga mamamahayag partikular na sa Radyo Bulacan ang mga sumbong.

Ito naman ay ipababatid ng Radyo Bulacan at ibang pang mamamahayag sa Comelec Bulacan.

“Makatitiyak kayong aaksyunan naming ang inyong mga reklamo basta ipinadaan sa mga media at Radyo Bulacan,” ani Abogado Elmo Duque sa panayam ng Radyo Bulacan noong Martes, Pebrero 26.

Ang pahayag ni Duque ay kaugnay ng tanong kung gagawa at magbubukas ang Comelec-Bulacan ng sariling account sa Facebook.com upang doon ipahatid ng mga Bulakenyo reklamo partikular na sa mga ilegal poster.

Ito ay kaugnay ng artikulong inilabas ng Mabuhay hinggil sa pagpapatanggal ng Comelec Bulacan sa mga tarpaulin poster ni Bro. Eddie Villanueva sa bakod ng Kapitolyo at ng mga katulad na poster ng Alay-Buhay party list sa mga terminal ng tricycle sa bayan ng Hagonoy noong Pebrero 21.

Ilegal na poster na ipinatanggal

“Wala na kaming oras kahit magbukas lang ng Facebook,” ani Duque.

Ipinaliwanag niya na ang limitadong bilang ng mga kawani ng Comelec sa lalawigan ay kasalukuyang nakatutok sa pagsasagawang mga voters education campaign.

Layunin ng kampanya ang pagapapataas ng antas ng kaalaman ng mga botante para sa tapat, malinis payapa at makahulugang halalan sa Mayo.

Sinabi niya na magsasagawa ang mga tanggapan ng Comelec sa bawat bayan ng mga voters education campaign simula ngayong Marso.

Gayunpaman, sinabi niya na hindi nila tinatalikuran ang pagpapatupad ng batas sa halalan, partikular na sa ilegal poster.

Sa panayam, nagpasalamat si Duque samga nagsisipag-ulat sa kanila kung saan matatagpuan ang mga ilegal na poster sa lalawigan.

Inihalimbawa niya ang mga poster ni Villanueva at ng Alay Buhay partylist na matapos makunan ng mamana ito ay itinawag sa Comelec Bulacan.

“Kailangan natin ang aktibong pagbabantay sa halalan upang mapigilan ang mga pandaraya at paglabag sa batas,” ani ng Abogado.

Iginiit niya na matapos matawag ang pansin hinggil sa mga ilegal poster sa kapitolyo at Hagonoy, agad din niyang tinawagan ang mga tagapag-ugnay ng mga kandidato maging ang election officer sa mga nasabing bayan upang tanggalin ang mga poster.

Ipinaliwanag ni Duque na ang mga campaign posters ay dapat nakalagay sa mga common poster area.

“Pag wala sa coomon poster areal, ilegal yan, maliban yung mga mga nasa private properties na may permiso,”aniya.

Sa pag-iikot naman ng mamamahayag na ito sa bayan ng Plaridel, Bocaue, Balagtas, Guiguinto, Paombong at Hagonoy, at maging sa Malolos, muling napansin ang mga poster ng kandidato sa mga poste.

Ilan sa mga ito ay muling nakunan ng larawan.

Sa bayan ng Baliwag, ilang residente na rin ang nagsimulang kunan ng larawan ang mga poster na nasa mga post eng kuryente.

 

Ang mga nasabing larawan at naka-post na sa sa isang Facebook group ng mga taga-Baliwag na tinatawag na Baliwag Socio-Political Group.

Una rito, ipinayo ni Comelec Commissioner Grace Padaca ang paggamit mga social networking sites sa pag-uulat ng mga paglabag sa batas ng halalan.

Ito ay nasundan ng pagbubukas ng Comelec ng sariling Twitter at Facebook accounts.

Sa panayam ng Mabuhay kay Padaca noong Disyembre, ang mga reklamo ay maaaring matagalan bago mahatatulan, ngunit maaaring gamitin ang mga larawan sa social networking sites upang mapuwersda ang mga kandidato na ituwid ang kanilang pangangampanya.  Dino Balabo

Ilegal na posters sa Bulacan, sinimulang baklasin

Isa sa mga unang ipinatanggal  ng Comelec ang tent na ito sa paradahan  ng tricycle sa sa Hagonoy.

HAGONOY, Bulacan—Nagsimula ng magbaklas ng mga campaign posters na wala sa common poster area sa bayang ito ang ilang tauhan ng kandidato noong Huwebes, Pebrero 21.

Ito ay matapos iutos ni Abogado Elmo Duque, provincial election supervisor sa Bulacan ang pagsasagawang imbestigasyon hinggil sa mga illegal campaign posters.

Ang utos ni Duque ay kaugnay ng mga larawang kuha ng Mabuhay at iba pang Bulakenyo na ngayon ay naka-post sa mga social networking sites tulad ng Facebook.com.

Ang mga nasabing larawan ay inilathala sa Facebook.com 10 matapos magsimula ang kampanya ng mga kandidatong senador at party-list group.

Isa sa mga unang poster na tinanggap sa bayang ito ay ang poster ng Alay Buhay partylist dating nakalagay sa bakod ng munisipyo.

Ngunit ang iba pang poster ay hindi pa natatanggal ng katulad na poster ng nasabing party-list group sa terminal ng tricycle sa kabayanan ng Hagonoy, at mga poster ni Bro. Eddie Villanueva sa mga post eng kuryente at bakod ng kapitolyo sa Malolos.

 Maging ang mga poster ng mga kandidatong bise-alkalde ng bayang ito na sina Tina Perez at Lamberto Villanueva ay hindi pa natatanggal habang sinusulat ang balitang ito noong Huwebes ng gabi, Perbero 21.

Ayon kay Duque, ang mga kandidato at partidong sangkot sa paglalagay ng mga poster sa labas ng itinakdang common poster area ay padadalhan nila ng sulat upang tanggalin ang mga mga nasabing poster sa loob ng tatlong araw.

Ito ay matapos maimbestigahan at maidokumento ng Commission on Elections (Comelec) ang mga nasabing poster sa pamamagitan ng pagkuha ng larawan.

Batay sa pahayag ng Comelec, ang mga campaign posters na wala sa common poster area ay ilegal.

Ang pagbabawal na ito ay itinatakda ng Comelec Resolution No 9615 kung saan ay sinasabi ring bawal maglagay ng poster sa mga poste at kable ng kuryente, pader, punong kahoy, at maging s amga pampublikong istraktura, partikular na sa mga pag-aari ng gobyerno tulad ng mga tulay at bakod at gusali ng pamahalaan.

"The Comelec Resolution is very clear. Candidates may be allowed to put up their posters in designated Common Poster Areas (CPAs), but at their own expense. Sila ang gagastos para sa istruktura para makabit nila ang kanilang mga poster," ani James Jimenez, tagapagsalita ng Komisyon.

Idinagdag pa niya na "We cannot just allow candidates to post their campaign materials on electric posts, trees and other public structures. That is why we are allowing them to set up temporary structures in designated Common Poster Areas for the exclusive purpose of displaying their campaign materials."

Batay sa Resolusyon Bilang 9615 ng Comelec, ang mga partido at kandidato ay maaaring magtayo ng isang  common poster area sa bawat barangay na may 5,000 rehistradong botante.

Maaari ding maglagay ang mga partido at kandidato ng common poster area sa mga plaza, palengke, barangay centers, at lansangan na maraming dumadaan.

Nilinaw pa ng Comelec na ang mga common poster area at dapat may sukat lamang na 12 talampakang haba  at anim na talampakan ang taas.

Para sa mga indipendiente, ang commpion poster area ay dapat lamang may sukat na anim na talampakan ang haba at apat na talampakan ang taas. Dino Balabo