Implementasyon ng mga DPWH proj, di para sa LP candidates

 

LUNGSOD NG VALENZUELA—Pinabulaanan ni Kalihim Rogelio Singson ng Department of Public Works and Highways (DPWH) ang mga paratang na ang proyekto ng kanyang ahensya ay ginagamit para sa pagpapalakas ng kandidatura ng mga kasapi Liberal Party sa halalan sa Mayo.

Ito ang kanyang iginiit matapos pangunahan ang groundbreaking ceremony ng North Luzon Expressway (NLEX) Harbor Link project sa Valenzuela City kahapon.

Ayon sa Kalihim, noong pang nakaraang taon nakaplano ang mga proyektong pang-imprastraktura ng admininstrasyong Aquino.

“Hindi po pangkampanya ang mga infrastructure project na aming ipinatutupad ngayon. As a matter of fact, noong pang last year nakalista yon,” ani Singson.

Iginiit pa niya na mahigit 50 porsyento ng mga proyektong isasagawa sa taong ito ay nai-subasta na at nailabas na ang advertisement sa mga pahayaga.

“Transparent pong lahat iyan at nakalagay lahat sa aming website,” aniya.

Sa pagsusuri ng Mabuhay sa website ng DPWH, napag-alaman na kabilang sa mga malalaking proyektong isinasagawa at isasagawa ng ahensiya sa Bulacan ay ang mga flood control project sa Calumpit at konstruksyon ng North Food Exchange (NFEx) sa bayan ng Balagtas.

Ayon pa kay Singson, walang pinilipining proyekto ang administrasyong Aquino.

“We will implement projects regardless of party affiliation,” at hinamon pa ang mga nagbigay malisya sa mga proyekto na bisitahin ang mga proyekto o kaya ay magtano sa mga distrito.

Pinaalalahanan din niya ang publiko na kung marami ang naabala sa mga ginagawang proyekto noong nakaraang taon, asahan na mas marami ang mga proyektong gagawin ngayon.

Ito ay makaraang tumaas ng 55 porsyento ang pondo ng ahensya na umakyat sa P129-Bilyon mula sa dating P82.8-bilyong pondo.

Paliwanag ni Singson, ang dagdag na pondo ay resulta mula sa isang consensus ng Philippine Developmemnt Forum sa Davao City noong nakaraang linggo na nagsasabing mababa ang infrastructure investment sa bansa kumpara sa mga kasamang bansa sa South East Asian Nation (ASEAN).

“We failed in our commitment last year. That’s why we agreed to increase investments on infrastructure from 2.6 percent of our gross domestic product last year to five percent by 2016.”

Dagdag pa niya, sinisimulan na ang paghahanap ng kontraktor para sa mahigit dalawang libong proyekto ng ahensya sa 2013 bago pa magsimula ang election ban sa pagtatapos ng buwan ng Marso.

“Because of the election ban, which starts tail end of March, we have already advertised and started conducting the public bidding for 2,395 projects nationwide. That’s already 89 percent of the projects we are supposed to undertake in 2013,” ani Singson.

Ayon sa kanya, 25 porsyento ng pondo ng ahensya ay mapupunta sa Mindanao; 22 porsyento sa Northern Luzon habang 20 porsyento naman nito ay sa Southern Luzon.   Ron-ron Lopez at Dino Balabo

Bulakenyo nagkaisa sa pagsuporta kay Bro. Eddie

 

MALOLOS—Suportado ng mga lider pampulitika sa Bulacan ang kandidatura sa Senado ni Bro. Eddie Villanueva ng Bangon Pilipinas sa kabila magkakaiba ang kanilang kinasasanibang partido.

Kaugnay nito, inilunsad ng Villanueva ang kanyang kandidatura sa lungsod na ito noong Martes, Pebrero 12.  Ito ang ikatlong sunod na paglulunsad ni Villanueva ng kanyang kandidatura sa lungsod na ito.

“Walang ibang higit na kakalinga sa ating lalawigan kungdi ang ating kalalawigan din,” sabi ni Gob. Wilhelmino Alvarado sa kanyang talumpating pang-endorso kay Villanueva na kilala bilang isang televangelist.

Bilang tagapangulo ng National Unity Party (NUP) sa lalawigan, sinabi ng punong lalawigan na ang Bulacan ay nahaharap sa mas mabilis na kaunlaran at kailangan nito ang lahat ng tulong.

Ayon sa gobernador, kakailanganin ng Bulacanng isang kaalyado sa Senado at si Villanueva ang isa sa mga mangungunang tutulong kung mananalo.

Gayundin ang mga naging pahayag nina dating Gobernador Roberto Padanganan  at Joselito Mendozana siyang tagapangulo ng Liberal Party sa lalawigan at kasalukuyang kinatawan sa ikatlong distrito.

Maging si dating Gob. Josefina Dela Cruz ay nagpahayag ng suporta sa pamamagitan ng maikling video message na ipinapanood sa mga dumalo sa paglulunsad ng kampanya ni Villanueva.

Si Dela Cruz ay kasalukuyang naglilingkod bilang Post Master General ng Philippine Postal Corporation (Philpost).

Ang mga nabanggit na lider, kasama ang mahigit sa 90-taong gulang na si dating Gob. Tomas Martin ng Nacionalista Party at dating Gob. Ignacio Santiago ay naunang nagpahayaga ng kanilang suporta sa pamamagitan ng paglagda sa isang manipesto.

Ang nasabing manipesto ay nilagdaan din ng mahigit 100 pang lider pampulitika sa lalawigan na nabibilang rin sa ibat-ibang partido.

Nagpasalamat si Villanueva sa pagbibigay ng suporta ng mga Bulakenyong lider.

Sinabi niya na ito ang kauna-unahang pagkakataon na nagkaisa ang mga lider sa lalawigan upang isulong ang kandidatura ng isang kalalawigan.

“I am so grateful for their support despite the fact that they came from different political persuasions.  They stand ten feet tall in solidarity to support my attempt to capture a Senate seat.  The future of Bulacan is beyond politics,”  ani Villanueva.

Sa kanyang talumpati, inihayag ng televangelist ang kanyang program kinabibilangan  ng tatlong “E”.

Ito ay ang ekonomiyang agresibot’ walang napag-iiwanan; Edukasyon na napapanahon; Entrepinoy na masang Pilipino ang nangunguna at nakikinabang.”

Ayon kay Villanueva ang nabanggit na plataporma ay kailangan upang higit na mabigyan ng kahulugan ang pagunlad ng ekonomiya ng bansa na ayon sa kanyan ay dahil sa programang tuwid na landas ni Pangulong Aquino.

“Mabilis ang pagunlad ngayon ng bansa, pero hindi tumatagos sa mga masa. Kailangang maramdaman ng masa ang kaunlarang pang-ekonomiya,” sabi ni Villanueva.

Bilang tagapagtatag ng  Jesus Is Lord Movement (JILM), binigyang diin ni Villaneuva ang kahalagahan ng moral leadership.

 “We need moral leadership.  The bedrock of good economics is good politics,” aniya. 

Si Villanueva nagtapos ng Bachelors of Science in Commerce major in Economics sa Polytechnic University of the Philippines (PUP).

Bilang isang lider ng mga mag-aaral, siya ay ng pinakamatagal na nagsilbing kasapi ng PUP Board of Regents. Nagsilbi rin siyang propesor ng Economics sa PUP.

Bilang isang negosyante noong dekada 70, siya ay nagsilbing export manager ng maran Export Industries, at nagtatag ng Agape Trading company kung saan siya ay nanungkulan bilang general manager.

Sa larangan ng pananampalataya, nasubok ang katatagan ni Villanueva ng laban niya ang isang sindikato ng sa kaso ng land grabbing na kinabibilangan ng isang hukom, isang piskal, at apat na abogado na pawang nakulong.

Kasunod nito ang pagtatayo ni Villanueva ng Jesus is Lord Movement (JILM) na may 4,000 simbahan sa buong bansa, at Jesus Is Lord Colleges Foundation.

Noong 2004 at 2010, kumandidato si Villanueva bilang Pangulo, ngunit natalo.

Ang paglulunsad ng kanyang kampanya para sa halalan noong 2004 ay isinagawa sa Bulacan State university; at noong 2009 ay sa bakuran ng makasaysayang simbahan ng Barasoain bilang paghahanda sa halalan noong 2010.

Si Villanueva ay anak ng Olympian na si Joaquin Villanueva na kasal kay Maria Cruz, isang beautician na kapwa nagmula sa Bocaue.

Siya ay kasal kay Adoracion Villanueva  at sila ay biniyayaan ng apat na supling.

Ito ay sina  Eduardo Jr., Joel, Eleanor, at Edelisha.

Si Eduardo Jr., ay kasalukuyang alkalde ng bayan ng Bocaue samantalang si Joel ay nanunuparan bilang Director General ng Technical Education Skills Development Authority (Tesda).     Dino Balabo

Estudyante nasawi sa field trip

PLARIDEL, Bulacan—Ipinagluksa ng mga kaanak at kaibigan ang pagkamatay ng isang mag-aaral ng Holy Spirit Academy (HSA) na naatrasan at nagulungan ng bus na sinakyan sa isang field trip sa Tanay, Rizal noong Biyernes, Pebrero 8.

Ang mag-aaral ay nakilalang si Rio Bianca Ramirez, 14, nasa ikalawang taon ng pag-aaral sa HSA-Malolos.

Isa pang mag-aaral na nakilalang si Pamela Enrique ang nasugatan ngunit nakaligtas sa nasabing insidente, at kasalukuyang inoobserbahan sa isang pagamutan sa Maynila.

Sa panayam ng mga mamamahayag kay Raymundo Ramirez, ama ng biktima, kasama sa isang Lakbay-Aral Kalikasan ang kanyang anak noong Biyernes sa Camp Capinpin, Tanay Rizal.

Ang nasabing Lakbay-Aral a inorganisa ng Outbound Tours, isa sa mga pangunahing tour agency sa bansa, sa pakikipag-ugnayan sa pamunuan ng HSAM.

Ayon sa ama ng biktima, patapos na ang pagbisita ng mga mag-aaral sa Camp Capinpin nang umatras ang nakaparadang bus na kanilang sinakyan matapos bumaba ang driver nito.

Ito ay dahil sa pababa ang kalsada, at nasa bandang ibaba ang biktima na sa pagkakataong iyon ay kinukunan ng larawan ang kaklaseng si Pamela.

Ayon sa ama ng biktima, nakaiwas sa pabulusok na bus si Pamela, ngunit nasugatan din ito.

Sa kasamaang palad, hindi nakaiwas agad si Rio Bianca at nagulungan at naipit pa sa pagitan ng umurong na bus at nakaparadang military truck.

Si Rio Bianca ay kasalukuyang nakaburol sa kanilang tahanan sa Rocka Village sa barangay Tabang, Plaridel, Bulacan at nakatakdang ilibing sa ika-12 ng Pebrero.

Siya ay pang lima sa anim na magkakapatid. Bilang isang mag-aaral, palagi siyang kasama sa top 10 students sa kanilang eskwelahan at pangarap daw nitong maging duktor

Samantala, sinabi ni Raymundo na pinag-aaralan nila na sampahan ng kaso ang mga may pananagutan sa insidente.

Isa sa nais linawin ay ang sistema ng pagsasagawa ng field trip.

Kaugnay nito, nagpahayag ng pakikidalamhati ang pamunuan ng HSAM sa pamilya ng biktima at sinabing ang driver ng bus ay kasalukuyang nakaditene sa Tanay PNP.

Batay sa opisyal na pahayag ng HSAM na inilabas Facebook.com, “a crisis debriefing will conducted by the school in in coordination with the tour supplier, Lakbay Kalikasan, to address the untoward effect of this accident to the other students and faculty who witnessed the accident.”

Sinabi pa ng HSAM sa kanilang pahayag na magbibigay sila ng kritikal na suporta sa pamilya ng biktima sa abot ng kanilang makakaya.   Rommel Ramos at Dino Balabo

Senate bid ni Bro. Eddie ilulunsad sa kapitolyo ng Bulacan

Bro. Eddie Villanueva

MALOLOS CITY—Ilulunsad ni Bro. Eddie Villanueva ng Bangon Pilipinas ang kanyang kandidatura bilang senador sa kapitolyo ng Bulacan ngayon umaga (Martes)

Ang paglulunsad ay inihayag ni Villanueva sa palatuntunang Diyos at Bayan na isinahimpapawid ng GMA TelevisionNetwork noong Lunes ng madaling araw.

Ito ang ikatlong kampanyang pampulitika ng televangelist matapos ang dalawang sunod na pagkatalo bilang Presidente sa halalan noong 2004 at 2010.

Sa huling kandidatura ni Villanueva, inihayag pa niya niya na hindi na siya muling kakandidato sa halal na posisyon.

(Narito ang videlo clip ng pahayag ni Bro. Eddie matapos bumoto noong 2010 sa Bunlo, Bocaue.)  http://youtu.be/21FJ6oMHRTo?t=13s

Ngunit noong Lunes ng madaling araw, sinabi ni Villanueva na “On February 12, I will kick-off my campaign at the steps of the Bulacan capitol building with the political leaders of the province.”

Ito ay matapos na palitan ni Villanueva sa kandidatura bilang Senador si Israel Virgines ng Bangon Pilipinas noong Disyembre.

Sa kanyangpahayag, sinabi ng televangelist na mas mkalaki ang tsansa niyang manalo dahil sa hindi lang isa sa halip ay 12 senador ang ihahal.

Iginiit pa niya na mas malawaka siyang suporta ngayon, partikular na sa lalawigan ng Bulacan na may mahigit sa 1.4 milyong rehistradong botante.

Bukod dito, sabi niya na nagkaisa ang mga lider pulitiko sa lalawigan at nagpahayag ng pagkakaisa upang suportahan siya.

“Nagkaroon ng solidarity ang mga political icons sa Bulacan dahil sa desisyon kong ireperesent ang mga sagigilid na mamamayan sa Pilipinas,” ani Villanueva.

Kinumpirma naman nina Mayor Christian Natividad ng Lungsod na ito at Mayor Feliciano Legazpi ang suporta kay Villanueva, maging si Bokal Michael Fermin.

Maging ang iba pang kandidatong bokal tulad nina Jose Cundangan at Dax Uy  at provincial coordinator ng Bayan Muna sa Bulacan na si Joey Munsayc ay nagpahayag ng suporta kay Villaneuva.

Ayon sa mga nagapahayag ng suporta, napapanahon na muling magkaroon ng kinatawan sa Senado ang Bulacan dahil ang huling Bulakenyong senador na nanungkulan ay ang yumaong si Senate President Blas F. Ople.

Matatandaan na noong 2004 ay inilunsad ni Villanueva ang kanyang kandidatura bilang Presidente sa Bulacan State University quadrangle, at noong  Agosto 2009 ay sa bakuran ng makasaysayang simbahan ng Barasoian. 

KAHIT WALANG PONDO: Media monitor sa halalan palalawakin ng CMFR

CMFR Executive Director Melinda Quintos-De Jesus with seminar workshop participants.

LUNGSOD NG MAKATI—Sa kabila ng kawalan ng pondo, tiniyak ng Center for Media Freedom and Responsibility (CMFR) ang muling pagsasagawa ng media monitoring sa coverage sa halalan.

Bukod dito, sinabi rin ng CMFR, ang pangunahing media watch dog sa bansa, na mas higit nilang palalawakin ang kanilang monitoring.

Ayon kay MelindaQuintos-De Jesus, CMFR executive director, makikipag-ugnayan sila sa mga pamantasan, non-governmental organization at mga mamamahayag para sa boluntaryong pagmomonitor sa halalan.

“We don’t have enough funds this year, but we will still conduct a broader monitoring of reports for the 2013 elections,” ani Quintos-De Jesus sa panayam matapos ang isinagawang seminar-workshop hinggil sa Responsible Journalism and Press Freedom na isinagawa sa Asian Institute of Management (AIM) Conference Center sa lungsod na ito noong Enero 30 hanggang Pebrero 2.

Iginiit pa ni De Jesus na “we will ask journalists in the provinces and other volunteers from colleges and universities.”

Sa panayam, sinabi niya ang kahalagahan ng monitoring sa news coverage sa panahon ng halalan dahil nakatutulong ito sa pagbibigay ng perspektibo sa pag-uulat ng mga mamamahayag.

Bilang isang media watchdog sa bansa, ang CMFR ay unang nagsagawa ng media news coverage sa halalan noong 1992.

Ito ay ipinagpatuloy nila sa mga sumunod pang halalan, at pagkatapos ng bawat halalan ay isinasalibro nila ang kanilang ulat kasama ang pagsusuri sa mga ulat.

Noong 2010, higit na pinalawak ng CMFR ang kanilang monitoring sa tulong ng Cebu Citizens Press Council (CCPC) sa pamamagitan ng pagsasagawa ng katulad na gawain sa lalawigan ng Cebu.

Kabilang sa gawain sa isinagawang monitoring ay ang pagsusuri sa halaga ng mga ginugol ng mga kandidato sa mga anunsyo sa radyo, telebisyon at mga pahayagan.

Nagsagawa rin sila ng pagsusuri sa tema ng mga mensahe sa mga balitang nailathalata at naisahimpapawid.

Ayon kay Luis Teodoro, deputy executive director ng CMFR, lubhang mahalaga ang pagsasagawa ng monitor.

Ito ay dahil sa nakatutulong ito sa mga mamamahayag at mga pahayagan at himpilan ng telebisyon at radyo na maituwid ang mga pagbabalita at madagdagan ang mga pagkukulang sa paghahatid ng balita.

Kabilang dito ay ang pagbibigay ng higit na pansin sa mga isyu na dapat tutukan ng mga kandidato sa halip na pagpapasikat lamang sa kanilang sarili.

Ayon pa kay Teodoro, nakakatulong din sa mga botante ang monitor dahil mas nagiging makahulugan ang mga ulat ng mga mamamahayag.  (Dino Balabo)

Alvarado kumpirmadong unopposed

MALOLOS—Kinumpirma ng Commission on Elections (Comelec) na walang katunggali sa halalan sa Mayo ang gobernador ng Bulacan na si wilhelmino Alvarado.

Ito ay matapos diskwalipikahin ng Comelec En Banc  ang dalawang indipendienteng kandidato sa pagkagobernador ng Bulacan.

Ayon kay Abogado Elmo Duque, provincial election supervisor sa lalawigan na ang decision ng Comelec ay batay sa kanyang rekomendasyon matapos ang pakikipagpulong sa mga apparent nuisance candidates sa lalawigan noong Oktubre.

Almera

Sa panayam sa telepono, sinabi ni Duque na “gusto naming matiyak na hindi magiging katatawanan ang halalan sa Bulacan.”

Matatandaan na noong Oktubre ay pinulong ni Duque ang pitong apparent nuisance candidates sa lalawigan kabilang ang dalawang indipendienteng kandidatong gobernador na sina Jaime Almera at Ernesto Balite.

Ipinaliwanag ni Duque na layunin ng nasabing pulong na masukat ang kakayahan ng mga kandidato na makapagsagawa ng kampanya sa buong lalawigan, partikular nsa sa mga kandidato bilang gobernador.

Ang nasabing pulong ay nasundan ng rekomendasyon ni Duque sa Comelec Law Department, at noong Enero 18, nagpalabas ng desisyon ang Comelec En Banc.

Balite

Ayonkay Duque, ang desisyon ng Comelec En Banc ay pinal na.

Batay sa impormasyon na nakatala sa website ng Comelec (www.comelec.gov.ph), tanging ang pangalan ni Alvarado ang nakatala bilang kandidfatong gobernador sa lalawigan.

“Iyan na ang final list ng certified candidates for the 2013 elections,” ani Duque patungkol sa nakatala sa website ng Comelec.

Iginiit pa niya na ang nasabing impormasyon o talaan ng mga kandidato ang ililimbag ng Comelec simula Pebrero 4 sa gagamiting balota para sa halalan sa Mayo 13.

Kaugnay nito, sinabini Duque na hindi pa nakakapgdesisyon ang Comelec sa kaso ng diskwalipikasyon na isinampa ni Kinatawan Marivic Alvarado ng unang distrito ng Bulacan laban sa kanyang nag-iisang katunggali na si Sahiron Salim, isang retiradong pulis.

Bilang isang indipendienteng kandidato, nagsumite ng Certificate of Candidacy (COC) si Salim bilang kanditatong kongresista sa unang distrito ng Bulacan noong Oktubre.

Ngunit makalipas ang ilang araw ay nagsampa ng kaso para sa kanyang diskwalipikasyon si Kint. Alvarado.

Sa kanyang petisyon sa Comelec, sinabi ni Kint. Alvarado na si Salim ay kumandidatong gobernador sa lalawigan ng Sulu noong 2010 at nakaipon ng pinakamaliit na bilang ng boto sa mga nagtunggali.

Kaugnay nito, sinabi ng mga tagamasid sa pulitika sa lalawigan na kapag natuloy ang diskwalipikasyon kay Salim, ang mag-asawang Alvarado ang kauna-unahang mag-asawang kandidato sa halal na posisyon sa lalawigan na walang katunggali.

Sa naunang panayam kay Jose Rey Munsayac, isang dating Bokal, ang mga kumandidatong gobernador sa Bulacan sa nagdaang 20 taon ay pawang may katunggali.

Gayunpaman, sa kabila ng may nakatalang kalaban sa balota ay halos hindi naman naramdaman ang epekto ng oposisyon sa kandidatura ng mga dating gobernador na tulad nina Roberto Pagdanganan at Josefina Dela Cruz sa kanilamng magkahiwalay na kampanya mula 1988 hanggang 2004. (Dino Balabo)