Libo-libong trabaho lilikhain ng P10-B puhunang ibubuhos ng mga Koreano sa Bulacan

PANDI, Bulacan—Inaasahang lilikha ng libo-libong trabaho ang P10-Bilyong investment na ibubuhos ng mga Koreanong negosyante sa Bulacan sa mga susunod na buwan.

Ito ay kaugnay ng pakikipag-ugnayan ni Mayor Enrico Roque ng bayang ito sa mga negosyanteng Koreano kamakailan.

Ang nasabing investment ay bukod pa sa naunang halos P20-B o mahigit sa $440-Milyong puhunang ginamit ng Korea Water Resources Corporation (K-Water) upang mapagwagian ang bidding para sa pagsasapribado ng Angat River Hydro Electric Power Plant (Arhepp) sa Norzagaray, Bulacan noong nakaraang taon.

Bilang pangulo ng Liga ng mga Alkalde sa Bulacan, sinabi ni Roque hindi bababa sa P10-B ang halagang mga puhunang ibubuhos ng mga Koreano sa mga itatayong negosyo sa ibat-ibang bayan ng lalawigan.

Ayon kay Roque nakatakdang simulan sa lalong madaling panahon ang pagtatayo ng mga naglalakihang negosyo sa Bulacan partikular na sa mga bayang walang kapasidad o kulang sa pondong pinansyal upang makapagpatayo ng sentro ng komersyo gaya ng mga pamilihang bayan.

Kabilang sa mga negosyong nakatakdang ipatayo ng mga negosyantent Koreano ay mga commercial complex at supermarkets kagaya ng Savemore, Puregold, drugstores tulad ng Mercury Drug, mga bigtime na foodchains gaya ng Jollibee at McDonalds, mga ang mga pribadong pamilihan para sa mga bayang wala pang pamilihang bayan.

Bukod dito ay plano rin magtayo sa may 15 ektaryang lupain sa Bulacan  ng mga Koreano ng kauna unahang Outlet Store sa bansa kung saan makikita rito ang aabot sa 400 na kilalang imported brands mula sa ibat ibang bansa gaya ng Prada, Coach, Ferragamo, at Tods.

Roque, LMP-Bulacan president

“Tiyak na mag-ge-generate ito ng libo-libong job opportunities sa ating mga kalalawigan,” ani Roque.

Binigyang diin niya na isa sa nakitang bentahe ng mga Koreano sa Bulacan ay ang istratehikong lokasyon nito sa pagitan ng dalawang international airport—ang Ninoy Aquino International Airport NAIA) sa kalakhang Maynila at ang Clark International Airport (CIA) sa Lungsod ng Angeles sa Pampanga.

Ayon pa kay Roque, bukod samga dagdag na negosyong itatayo ng iba pang negosyangte, tiyak din dadayuhin ng mga turista ang Bulacan dahil sa patuloy na pag-unlad nito.

“Nagiging magnet na ng investments at dumadagsa na sa Bulacan ang mga foreign at local investors dahil sa patuloy na pagyabong nito na bunga ng magandang pamamahala ng ating mga leaders sa pangunguna ni Gov. Willy Alvarado,” sabi ni Roque.

Kaugnay nito, ipinahayag ni Gob. Alvarado ang pagpapahayag ng interes ng mga kasapi ng Filipino American Chamber of Commerce sa Bulacan.

Ito ay matapos na bumisita sa lalawigan ang mga negosyanteng Fil-Am ilang araw matapos pasinayaan ang Ciudad de Victoria ng Iglesia ni Cristo sa bayan ng Bocaue kung saan ay matatagpuan din ang Philippine Arena, ang pinakamalaking mixed-used indoor arena sa buong mundo.

Ayon kay Alvarado, ang mga pagbisita at pagkakaroon ng interes ng mga negosyante na magnegosyo sa Bulacan ay isang palatandaan ang pag-imbulog ng ekonomiya ng lalawigan.

Una rito, kinatigan ng Korte Suprema ang pagwawagi ng K-Water sa bidding ng pagsasapribado ng Arhepp noong nakaraang taon.

Ang K-Water ay nagwagi dahil sa bid na mahigit $440-M para sa Arhepp, ang power generating facility ng Angat Dam na kasalukuyang nasa pamamahala ng National Power Corporation (Napocor).

Batay sa tala, mahigit tatlo taon na ang nakalipas matapos manalo sa bidding ang K-Water ngunit ito ay naantala matapos harangin ng mga petisyon sa Korte Suprema.

Noong nakaraang taon, kinatigan ng Korte Suprema ang K-Water matapos itong maki-pagsosyo sa grupo ni Ramon Ang ng San Migue Corporation.

Sa kasalukuyan ay hininihintay na lamang ang pormal na pagsasalin ng pamamahala sa Arhepp mula sa Napocor patungo sa K-Water. (Dino Balabo)

2 gusali ng ICSM naabo, higit sa P20-M ang pinsala

MALOLOS— Tinupok ng apoy sa loob lamang ng halos tatlong oras noong Biyernes ang dalawang gusali ng Immaculate Conception School of Malolos (ICSM) na sa loob ng mahigit 70 taon ay nagsilbing bantayog sa paghubog sa mga kabataan sa lungsod na ito.

Tinatayang aabot naman sa mahigit P20-M ang halaga ng pinsala ng sunog na umabot ng anim na oras bago tuluyang naapula, samantlang isang rumespondeng bumbero ang nasugatan sa sunog na umabot ng ikatlong alarma.

Kaugnay nito, tiniyak ng pamunuan ng ICSM na magbabalik sa klase ang may 1,600 mag-aaral nito sa loob ng dalawang linggo makaraang magpalabas ng pahayag ilang oras matapos ang sunog.

Nag-alok naman ng mga pasilidad ang pamahalaang lungsod ng Malolos para pansamantalang magamit ng  ng mga mag-aaral, ngunit mas pinili ng pamunuan ng paaralan ang pasilidad ng Simbahan ng Barasoain na kanilang isasaayos sa susunod na isang linggo.

Himala namang nakaligtas sa sunog ang katabing Basilica Minore na noong 1899 ay ipinasunog ni dating Heneral Antonio Luna habang tumatakas ang mga rebolusyunaryo mula sa paparating na puwersa ng mga Amerikano.

Ang Basilica Minore na dating kilala bilang Katedral ng Malolos,ang sentro ng pamunuan ng Diyosesis ng Malolos sa Bulacan at Lungsod ng Valenzuela.

Ang sunog sa ICSM ay nagsimula bandang alas-3 ng madaling araw noong Biyernes,Hunyo 13.  Ang apoy nito ay nakontrol sa ganap na alas-5:09 ng umaga at tuluyang naapula sa ganap na alas-9:14 ng umaga.

Ayon sa security guard ng City of Malolos Water District (CMWD) na nakilalang si Abdul Hassan, nagsimula ang sunog ng magliyab ang kawad ng kuryente sa poste sa labas ng bakod ng paaralan.

Ito ay agad na gumapang sa dalawang gusali at sa loob lamang ng ilang oras ay natupok ito.

Kinatigan ni Monsignor Pablo Legazpi, rector ng ICSM ang pahayag ni Hassan ng kanyang sabihing mabilis ang pagkalat ng apoy dahil sa malakas ang hangi at yari sa kahoy ang dalawang gusali.

Ikinuwento niya na ang dalawang gusali ay itinayo noong 1937.

Hinggil sapinamulan ng sunog, sinabi ni Legazpi na tuwing gabi ay ibinababa nila ang breaker ng kuryente sa mga gusali upang walang dumaloy na kuryente.

Ito raw ay bahagi ng kanilangpag-iingat sa dalawang matandang gusali na yari sa kahoy na nasunog.

Nilinaw pa ni Legazpi na kapapalit lamang nila ng mga kawad ng kuryenteng nakainstalasyon sa gusali, bukod pa sa magkakahiwaly ang linya para sa ilaw, bentilador at mga airconditioners upang matiyak na hindi iyon mag-o-overload.

Sa kanyang pagtaya, aabot sa mahigit P20-M ang halaga ng ari-ariang nasunog kasama ang limang sasakyang ginagamit para sa pagsundo at paghahatid sa mga mag-aaral.

Batay naman sa pahayag ng Bureau or Fire Protection (BFP) walang tao sa loob ng paaralan ng maganap ang sunog, ngunit isang rumespondeng bumbero ang nasugatan sa pag-apula sa apoy.

Siya ay nakilalang si FO1 Edward Sullivan ng BFP-Malolos.

Kinatigan din ng BFP-Malolos ang mabilis na pagkalat ng apoy, kaya’t sa umpisa pa lang ng sunog ay itinaas na nila sa ikatlong alarma ang pagtawag ng saklolo sa mga kapwa bumbero.

Sa kasalukuyan patuloy pa ang imbestigasyon ng BFP upang matukoy ang pinagmulan ng sunog.  Dino Balabo

Pinakamataas na bilang ng lumagda sa recall petition naitala sa Malolos

 
MALOLOS—Dismayado na nga ba ang mga Bulakenyo partikular na ang mga residente ng lungsod na ito sa ika-apat na taon ng panunungkulan ni Gob. Wilhelmino Albarado?

Ito ang katanungan ng marami matapos ilabas ng Commission on Elections ang tala ng bilang ng mga lumagda sa petisyon ng recall election na isinumite laban sa punong lalawigan kung saan naitala ang pinakamataas na bilang mga lumagda sa lungsod na ito.

Samantala, nailipat na sa Office of the Deputy Executive Director for Operations (ODEDO) sa punong tanggapan ng Comelec sa Maynila ang mga dokumentong isinumite kaugnay ng petisyon noong Lunes, Mayo 5 matapos ang inisyal na pagsusuri ng Comelec-Bulacan.

Tumanggi ng magbigay ng pahayag si Alvarado hinggil sa petisyon ng siya ay kapanayamin ng Mabuhay noong Lunes, matapos ang paglulunsad ng Sine Bulakenyo sa Capitol Gymnasium.

Ang Sine Bulakenyo ay isang libreng pa-sine na isasagawa ng kapitolyo sa mga barangay sa layuning mapataas ang kaalaman ng mga Bulakenyo sa hinggil sa mga naisagawa at iapatutupad na proyekto ng administrasyong Alvarado.

Ngunit para sa ilang Bulakenyo, ang nasabing pa-sine ay isang kontra propaganda matapos lumagda sa petisyong recall election ang 319,707 Bulakenyo dahil sa kawalan ng tiwala kay Alvarado bunga ng diumano’y kurapsyon at pag-abuso sa kapangyarihan,

Batay sa tala ng Comelec-Bulacan, nanguna ang lungsod na ito sa 21 bayan ay dala pang lungsod sa lalawigan sa dami ng lumagda sa nasabing petisyon.

Ayon kay Abogado Elmo Duque, umabot sa 25,835 botanteng Malolenyo ang lumagda sa petisyon; kasunod ang bayan ng Sta.Maria kung saan ay umabot sa 22,988 ang lumagda.

Ang iba pang bayan at lungsod sa lalawigan na nakapagtala ng mataas na bilang ng lumagda sa petisyon ay ang Marilao (22,676), Lungsod ng San Jose Del Monte (22,486), Bocaue (18,411), at Baliwag (15,593).

Naitala naman sa bayan ng Hagonoy ang pinakamababang bilang na 947.

Ang Hagonoy ay ang bayang pinagmulan ni Alvarado kung saan ay naglingkod siya bilang alkalde mula 1986 hanggang 1998; na sinundan ng paglilingkod mula 1998 hanggang 2007 bilang kongresista ng unang distrito ng lalawigan na sumasakop din sa nasabing bayan.

Kung distrito naman ang pag-uusapan, naitala ang pinamakataas na bilang ng lumagda sa petisyon mula sa ikatlong distrito.

Batay sa tala ng Comelec-Bulacan,umabot sa 87,489 botante ang lumagda sa petisyon mula sa ikatlong distrito,kasunod ang ikalawang distruito na may 83,783.

Ang ikaltlong distrito ng Bulacan ay kinakatawan sa Kongreso ni dating Gob. Joselito Mendoza na ang pamilya ay nagmula sa bayan ng Bocaue na matatagpuan sa ikalawang distrito.

Matatandaan na noong Abril 25, isinumite ni Perlita Mendoza ng bayan ng Bocaue sa Comelec Bulacan ang kopya ng mga dokumentong para sa petisyong election recall laban kay Alvarado.

Si Mendoza ay naglingkod bilang Provincial Administrator ng Bulacan sa panahon ng administrasyon ni dating Gob. Joselito Mendoza noong 2007 hanggang 2009.

Pansamantala rin siyang naglingkod bilang City Information Officer ng  Malolos noong 2010, ngunit nagbitiw sa tungkulin matapos kuwestiyunin ang kanyang tirahan.

Una rito, isang kaso ng pandarambong ang ihinhain ni Antonio Manganti sa Ombudsman laban kay Alvarado at anim pang opisyal ng kapitolyo noong Pebrero 14.

Ayon kay Alvarado, pulitika ang motibo ng pagsasampa ng kasong pandarambong laban sa kanya at mga opisyal ng kapitolyo ngunit pinabulaanan ito ni Manganti.

Si Manganti ay isang dating rebel returnee na naglingkod din sa kapitolyo sa panahon ng panungkulan ni dating Gob. Josefina Dela Cruz, ang nakatatandang kapatid ni Kint. Mendoza ng ikatlong distrito.

Si Dela Cruz ay kasalukuyang nanunungkulang ngayon bilang Post Master General ng Philippine Postal Corporation.  Dino Balabo

Malolos handa sa pagpapatupad ng Senior High School Program ng K+12

 

MALOLOS—Handang-handa na ang mga paaralan at guro sa lungsod na ito sa patuloy na pagpapatupad  programang K+12 sa kabila ng  kakulangan sa mga kagamitan sa pagtuturo.

Ito ay dahil sa sunod-sunod na pagsasagawa ng mga pagsasanay at patuloy na pagtatayo ng mga dagdag na silid aralan.

“Ang division ay handa na sa usapin ng sapat na mga guro at mga silid-aralan para sa K+12 program,” sabi ni Dr. Amancio S. Villamejor Jr., superintendent ng City Schools Division sa lungsod na ito.

Isang patunay dito ay ang isinagawang Education Summit noong Oktubre ng nakaraang taon sa Bulacan State University Hostel na nilahukan ni Mayor Christian D. Natividad kasama ang mga Education Program Supervisors, Public and Private Secondary School Heads, Division Supreme Student Government Officers, Division Supreme Student Government Officers, Division PTCA President, Division Teachers Club President and MACIPRISA Officers.

Ang nasabing Education Forum ay kaugnay ng pilot implementation ng Senior High School program para sa School Year 2014-2015 o sa pagbubukas ng klase ngayong taon at upang mangalap ng suporta mula sa partners and stakeholders.

Batay sa tala, umabot sa 23,663 Elementary;  13, 813 sa high school; at 3,727 ang nag-enroll sa samga pampublikong paaralan sa lungsod noong nakaraang taon.

Sa hanay ngmga pribadong paaralan,umabot sa 7,163 mag-aaralang pumasoksa elementarya;  5,096 sa secundarya, at 2,083 sa kinder.

Ayon kay Villamejor, ang DepEd ay nakikipagtulungan sa Commission on Higher Education (CHED), Technical Education and Skills Development Authority (TESDA), at pribadong paaralan upang magamit ang kanilang mga pasilidad para sa nalalapit na transition years ng programang K+12.

Bukod dito, magtatayo din ang lungsod ng mga silid aralan para sa mga Senior High School.

Matatandaan na sinimulang ipatupad ang K+12 program taong 2012 sa layuning i-reporma ang pangunahing edukasyon ng bansa sa pamamagitan ng pagdagdag ng dalawang higit pang mga taon ng pag-aaral sa Basic Education upang mas mahusay na maghanda ng mga mag-aaral para sa mas mataas na edukasyon,o maging globally competitive.

Sa isang artikulo na lumabas sa website ng childup.com, tinukoy na ang Pilipinas ang tanging bansa sa Asya na 10 taon ang basic education, isang pangunahing dahilan kung bakit isinusulong ng Department of Education ang implementasyon ng K+12 upang ang kurikulum ng bansa ay magiging katumbas sa internasyonal na mga pamantayan, at magbibigay sa mga graduates ng mas mahusay na pagkakataon upang maging gainfully employed.

Ang dalawang taon ay idadagdag pagkatapos ng four-year high school program. Ito ay tatawaging “Senior High School.”

 Ang mga mga mag-aaral ay maaring mamili ng kanilang espesyalisasyon batay sa kanilang kakayahan, interes, at kapasidad ng paaralan.

Unang ipapatupad ang Senior High School sa pasukan sa Marcelo H. Del Pilar National High School (MHPNHS) at Malolos Marine Fishery School and Laboratory.

Samantala, nababahala ang ilang Maloleño kung sapat naba ang ginagawang paghahanda ng lungsod para sa implementasyon ng nasabing programa.

“The Division is now ready for the K+12 implementation in terms of teachers and classrooms but instructional materials were delayed due to reproduction of them,” ani Cecilia F. Chang Education Program Supervisor DepEd Malolos.

Idinagdag pa niya na dagdag dalawang taon sa Basic Education ay malaking tulong para mahasa ang kakayahan ng mga estudyante.

Kaugnay nito, sinang ayunan naman ito ni Laila D.J Lopez guro ng Calero Elementry

School Grade II na kung saan isang taon na siyang nagtuturo sa ilalim ng bagong curriculum, “Despite of lacking of materials, ang bagong curriculum sa ilalim ng K+12 ay na-adopt naman naming mga teachers,” saad niya.

Aniya, bago sila naturo ng bagong curriculum, ay dumaan siya sa sapat na trainings at seminars nang sa gayon ay maging handa sila.

Ang implementasyon ng K+12 at pagseseminar ay sinimulan noong 2012 sa Grade I, sinundan ng Grade 2 (2013) at sunod sunod na taon sa iba’t ibang baitang hanggang ma-fully implement ang K+12.

Sa ilalim ng panunungkulan ni Mayor Natividad,  walong bagong Elementary Schools at siyam na Secondary Schools ang naipatayo para sa DepEd Division City of Malolos.

Samantalang ang Regular/permanent, contractual, volunteer teachers sa Elementary ay 734 at sa High School naman ay 450 na may suma total na 1,184 teachers. 

(Ang artikulong ito sinulat ni Dexter J. Edrosa para sa pahayagang Mabuhay.  Si Edrosa ay ang School Officer-In-Charge/ Principal ng Calero Elementary School na matatagpuan sa Barangay Calero, isa sa mga coastal barangay ng Lungsod ng Malolos.  Ang mga larawan sa artikulong ito ay kuha ni Dino Balabo sa Binakod Elementary School sa Paombong at Pugad Elementary School sa bayan ng Hagonoy na pawang matatagpuan din sa coastal area ng Bulacan.)

Pulitika motibo sa pamamaslang sa chief of staff ni Bokal Fermin?

 MALOLOS—Pulitika ang nakikitang motibo ni Bokal Michael Fermin sa pamamaslang sa kanyang chief of staff na si Edwin Miranda Inocencio noong Huwebes, Abril 10.

Kaugnay nito, patuloy naman sa imbestigasyon ang pulisya upang matukoy ang pagkakakilanlan sa pamamaslang sa biktima.

Ayon kay Fermin, ilang araw bago paslangin si Inoncencio ay nakatanggap sila ng mga pagbabanata sa buhay.

Ang mga pagbabanta at pinadaan sa pamamagitan ng text message.

Ayon sa Bokal, ang huling mapagbantang text message na kanilang natanggap ay nagsasaad ng “ito na ang huling araw mo.”

“Malaki ang posibilidad na pulitika ang motibo dahil alam ng katunggali naming sa pulitika ang aming mga galaw,” sabi ni Fermin.

Gayunpaman, wala pa siyang tinukoy na katunggali sa pulitika.

Nagpahayag din siya ng pagkabahala sa lumalalang kalagayan ng kriminalidad sa lalalwigan.

Ito ay dahil na rin sa noong Marso 25 ay pinagtangkaan din ang buhay ni Konsehala Francis Dianne Cervantes ng Hagonoy.

Si Cervantes ay himalang nakaligtas sa pamamaril sa bayan ng Paombong.

Sa kabila naman ng pahayag ni Fermin na pulitika ang motibo ng pamamaslang kay Inocencio, patuloy pa rin ang pagsasagaw ang imbestigasyon ng pulisya.

Batay sa mga naunang ulat, si Inoncencio ay patungo sa bahay ni Fermin na matatagpuan sa NorthFields Subdivision sa Barangay Longos sa lungsod na ito ng harangin ng dalawang nakamotorsiklong suspek bandang alas-8ng umaga noong Huwebes, Abril 10.

Kasunod nito ay ang sunod-sunod na putok ng mula sa kalibre .45 na agad na ikinasawi ng biktima.

Ayon sa pulisya, nakasakay sa kanyang van si Inocencio na nasa kahabaan ng MacArthur Highway papasok sa gate ng subdivision ng siya ay tambangan.

Ilang saksi naman ang nasabi sa pulisya na isa sa dalawang suspek ang lumapit pa kay Inocencio matapos paputukan at muling pinaputukan upang matiyak na patay ang biktima.

Ang 40-anyos na si Inocencio ay residente ng Barangay San Sebastian sa Hagonoy

Siya ay nagsilbing chief of staff ni Fermin ng unang distrito ng Bulacan mula noong 2010.

Bilang chief of staff, si Inocencio ay ang responsible sa mga paghahanda at pagapaptupad ng mga programa ni Fermin.

Kabilang dito ay ang planong pagkandidato bilang Kongresista ng unang distrito ng Bulacan sa 2016.

Ito ay dahil matatapos na sa 2016 ang ikatlong termino ni Kinatawan Marivic Alvarado, ang maybahay ni Gob. Wilhelmino Alvarado. (Dino Balabo)