Libo-libong trabaho lilikhain ng P10-B puhunang ibubuhos ng mga Koreano sa Bulacan

PANDI, Bulacan—Inaasahang lilikha ng libo-libong trabaho ang P10-Bilyong investment na ibubuhos ng mga Koreanong negosyante sa Bulacan sa mga susunod na buwan.

Ito ay kaugnay ng pakikipag-ugnayan ni Mayor Enrico Roque ng bayang ito sa mga negosyanteng Koreano kamakailan.

Ang nasabing investment ay bukod pa sa naunang halos P20-B o mahigit sa $440-Milyong puhunang ginamit ng Korea Water Resources Corporation (K-Water) upang mapagwagian ang bidding para sa pagsasapribado ng Angat River Hydro Electric Power Plant (Arhepp) sa Norzagaray, Bulacan noong nakaraang taon.

Bilang pangulo ng Liga ng mga Alkalde sa Bulacan, sinabi ni Roque hindi bababa sa P10-B ang halagang mga puhunang ibubuhos ng mga Koreano sa mga itatayong negosyo sa ibat-ibang bayan ng lalawigan.

Ayon kay Roque nakatakdang simulan sa lalong madaling panahon ang pagtatayo ng mga naglalakihang negosyo sa Bulacan partikular na sa mga bayang walang kapasidad o kulang sa pondong pinansyal upang makapagpatayo ng sentro ng komersyo gaya ng mga pamilihang bayan.

Kabilang sa mga negosyong nakatakdang ipatayo ng mga negosyantent Koreano ay mga commercial complex at supermarkets kagaya ng Savemore, Puregold, drugstores tulad ng Mercury Drug, mga bigtime na foodchains gaya ng Jollibee at McDonalds, mga ang mga pribadong pamilihan para sa mga bayang wala pang pamilihang bayan.

Bukod dito ay plano rin magtayo sa may 15 ektaryang lupain sa Bulacan  ng mga Koreano ng kauna unahang Outlet Store sa bansa kung saan makikita rito ang aabot sa 400 na kilalang imported brands mula sa ibat ibang bansa gaya ng Prada, Coach, Ferragamo, at Tods.

Roque, LMP-Bulacan president

“Tiyak na mag-ge-generate ito ng libo-libong job opportunities sa ating mga kalalawigan,” ani Roque.

Binigyang diin niya na isa sa nakitang bentahe ng mga Koreano sa Bulacan ay ang istratehikong lokasyon nito sa pagitan ng dalawang international airport—ang Ninoy Aquino International Airport NAIA) sa kalakhang Maynila at ang Clark International Airport (CIA) sa Lungsod ng Angeles sa Pampanga.

Ayon pa kay Roque, bukod samga dagdag na negosyong itatayo ng iba pang negosyangte, tiyak din dadayuhin ng mga turista ang Bulacan dahil sa patuloy na pag-unlad nito.

“Nagiging magnet na ng investments at dumadagsa na sa Bulacan ang mga foreign at local investors dahil sa patuloy na pagyabong nito na bunga ng magandang pamamahala ng ating mga leaders sa pangunguna ni Gov. Willy Alvarado,” sabi ni Roque.

Kaugnay nito, ipinahayag ni Gob. Alvarado ang pagpapahayag ng interes ng mga kasapi ng Filipino American Chamber of Commerce sa Bulacan.

Ito ay matapos na bumisita sa lalawigan ang mga negosyanteng Fil-Am ilang araw matapos pasinayaan ang Ciudad de Victoria ng Iglesia ni Cristo sa bayan ng Bocaue kung saan ay matatagpuan din ang Philippine Arena, ang pinakamalaking mixed-used indoor arena sa buong mundo.

Ayon kay Alvarado, ang mga pagbisita at pagkakaroon ng interes ng mga negosyante na magnegosyo sa Bulacan ay isang palatandaan ang pag-imbulog ng ekonomiya ng lalawigan.

Una rito, kinatigan ng Korte Suprema ang pagwawagi ng K-Water sa bidding ng pagsasapribado ng Arhepp noong nakaraang taon.

Ang K-Water ay nagwagi dahil sa bid na mahigit $440-M para sa Arhepp, ang power generating facility ng Angat Dam na kasalukuyang nasa pamamahala ng National Power Corporation (Napocor).

Batay sa tala, mahigit tatlo taon na ang nakalipas matapos manalo sa bidding ang K-Water ngunit ito ay naantala matapos harangin ng mga petisyon sa Korte Suprema.

Noong nakaraang taon, kinatigan ng Korte Suprema ang K-Water matapos itong maki-pagsosyo sa grupo ni Ramon Ang ng San Migue Corporation.

Sa kasalukuyan ay hininihintay na lamang ang pormal na pagsasalin ng pamamahala sa Arhepp mula sa Napocor patungo sa K-Water. (Dino Balabo)

Pinakamataas na bilang ng lumagda sa recall petition naitala sa Malolos

 
MALOLOS—Dismayado na nga ba ang mga Bulakenyo partikular na ang mga residente ng lungsod na ito sa ika-apat na taon ng panunungkulan ni Gob. Wilhelmino Albarado?

Ito ang katanungan ng marami matapos ilabas ng Commission on Elections ang tala ng bilang ng mga lumagda sa petisyon ng recall election na isinumite laban sa punong lalawigan kung saan naitala ang pinakamataas na bilang mga lumagda sa lungsod na ito.

Samantala, nailipat na sa Office of the Deputy Executive Director for Operations (ODEDO) sa punong tanggapan ng Comelec sa Maynila ang mga dokumentong isinumite kaugnay ng petisyon noong Lunes, Mayo 5 matapos ang inisyal na pagsusuri ng Comelec-Bulacan.

Tumanggi ng magbigay ng pahayag si Alvarado hinggil sa petisyon ng siya ay kapanayamin ng Mabuhay noong Lunes, matapos ang paglulunsad ng Sine Bulakenyo sa Capitol Gymnasium.

Ang Sine Bulakenyo ay isang libreng pa-sine na isasagawa ng kapitolyo sa mga barangay sa layuning mapataas ang kaalaman ng mga Bulakenyo sa hinggil sa mga naisagawa at iapatutupad na proyekto ng administrasyong Alvarado.

Ngunit para sa ilang Bulakenyo, ang nasabing pa-sine ay isang kontra propaganda matapos lumagda sa petisyong recall election ang 319,707 Bulakenyo dahil sa kawalan ng tiwala kay Alvarado bunga ng diumano’y kurapsyon at pag-abuso sa kapangyarihan,

Batay sa tala ng Comelec-Bulacan, nanguna ang lungsod na ito sa 21 bayan ay dala pang lungsod sa lalawigan sa dami ng lumagda sa nasabing petisyon.

Ayon kay Abogado Elmo Duque, umabot sa 25,835 botanteng Malolenyo ang lumagda sa petisyon; kasunod ang bayan ng Sta.Maria kung saan ay umabot sa 22,988 ang lumagda.

Ang iba pang bayan at lungsod sa lalawigan na nakapagtala ng mataas na bilang ng lumagda sa petisyon ay ang Marilao (22,676), Lungsod ng San Jose Del Monte (22,486), Bocaue (18,411), at Baliwag (15,593).

Naitala naman sa bayan ng Hagonoy ang pinakamababang bilang na 947.

Ang Hagonoy ay ang bayang pinagmulan ni Alvarado kung saan ay naglingkod siya bilang alkalde mula 1986 hanggang 1998; na sinundan ng paglilingkod mula 1998 hanggang 2007 bilang kongresista ng unang distrito ng lalawigan na sumasakop din sa nasabing bayan.

Kung distrito naman ang pag-uusapan, naitala ang pinamakataas na bilang ng lumagda sa petisyon mula sa ikatlong distrito.

Batay sa tala ng Comelec-Bulacan,umabot sa 87,489 botante ang lumagda sa petisyon mula sa ikatlong distrito,kasunod ang ikalawang distruito na may 83,783.

Ang ikaltlong distrito ng Bulacan ay kinakatawan sa Kongreso ni dating Gob. Joselito Mendoza na ang pamilya ay nagmula sa bayan ng Bocaue na matatagpuan sa ikalawang distrito.

Matatandaan na noong Abril 25, isinumite ni Perlita Mendoza ng bayan ng Bocaue sa Comelec Bulacan ang kopya ng mga dokumentong para sa petisyong election recall laban kay Alvarado.

Si Mendoza ay naglingkod bilang Provincial Administrator ng Bulacan sa panahon ng administrasyon ni dating Gob. Joselito Mendoza noong 2007 hanggang 2009.

Pansamantala rin siyang naglingkod bilang City Information Officer ng  Malolos noong 2010, ngunit nagbitiw sa tungkulin matapos kuwestiyunin ang kanyang tirahan.

Una rito, isang kaso ng pandarambong ang ihinhain ni Antonio Manganti sa Ombudsman laban kay Alvarado at anim pang opisyal ng kapitolyo noong Pebrero 14.

Ayon kay Alvarado, pulitika ang motibo ng pagsasampa ng kasong pandarambong laban sa kanya at mga opisyal ng kapitolyo ngunit pinabulaanan ito ni Manganti.

Si Manganti ay isang dating rebel returnee na naglingkod din sa kapitolyo sa panahon ng panungkulan ni dating Gob. Josefina Dela Cruz, ang nakatatandang kapatid ni Kint. Mendoza ng ikatlong distrito.

Si Dela Cruz ay kasalukuyang nanunungkulang ngayon bilang Post Master General ng Philippine Postal Corporation.  Dino Balabo

Saan pwedeng magtayo ng socialized housing sa Bulacan?

MALOLOS--Nagpahayag ng suporta si Gob. Wilhelmino Alvarado  sa mga programa ng administrasyong Aquino sa paglilinis ng mga estero sa kalakhang Maynila sa pamamagitan ng paglilipat ng mga iskwater.

Ito ay kaugnay ng moratorium sa Lungsod ng SJDM hinggil sa pagpapatigil sa pagpapatayo ng socialized housing.

Ayon sa gobernador, kahit may moratorium sa SJDM, may iba pang mga bayan sa lalawigan na maaring pagtayuan ng mga socialized housing projects na malilipatan ng mga iskwater.

Kabilang dito ang mga bayan ng Pandi, Bustos, San Rafael, San Ildefonso at Norzagaray.

Sa kabila naman ng pagbubukas ng ilang bayan para sa mga socialized housing, iginiit ni Alvarado na dapat ay magkaroon ng tamang koordinasyon sa kanya at maging sa mga punong bayan.

Bukod rito, ipinaalala niya na anumang socialized housing project ang itayo sa ibang bayan sa lalawigan, ito ay kailangan pa ring sumunod samga umiiral na land use plan.

Idinagdag paniya na bukod samga iskwater sa Maynila, mayroon ding mga iskwater sa lalawigan ng Bulacan na dapat bigay ng marangal na tirahan sa mga mas ligtas na lugar.

Ito ay dahil sa ang mga Bulakenyong iskwater ay karaniwang nakatira sa mga gilid ng ilog at sapa na natukoy bilang mga geo-hazard areas.

Isa sa halimbawa ay ang may 6,000 iskwater sa SJDM, na ayon kay Ignacio ay unti-unti na ring naililipat dahil ang 10 porsyento ng mga proyektong pabahay ay ipinagkakaloob sa mga iskwater sa lungsod na ito.

Ang lungsod ng SJDM ito ay sinasabing dating isang barangay lamang ng lungsod ng Meycauayan, ngunit ito ang may pinakamataas na bilang ng populasyon sa lalawigan ngayon.

Ito ay dahil na rin sa mahigit 50 taong paglilipat ng mga iskwater sa kalakhang Maynila patungo sa lungsod na ito.

Batay sa mga tala, ang mga unang iskwater na inilipat sa SJDM ay ang mga retiradong sundalong nakatira sa gilid ng Fort Bonifacio sa Taguig.

Ngunit noong 1959 ay naapektuhan sila ng bahang hatid ng malakas na bagyo at inilipat sa dating Haceinda Sapang Palay, sa silangang bahagi ng SJDM.

 

Nasundan pa ito na mga sunod-sunod na maramihang paglilipat ng mga iskwater mula sa Intramuros, Maynila noong Disyembre 3,1963.

Ito ay matapos puwersahin ni dating Manila Mayor Antonio Villegas ang paglilipat ng mga iskwater na sa Intramuros, sa pamamagitan ng pagbabaklas ng kanilang mga barong-barong.

Ang mga pamilya ng iskwater ay isinakay sa trak at inihatid sa Sapang Palay sa kalagitnaan ng gabi.

Bukod rito, sinasabi ng mga nakasama sa unang inihatid na ibinaba lang sila sa trak at umalis, at wala pang bahay na nakatayo na malilipatan.

Ayon kay Fr. Edward Kelly, isang pari nanagmula sa Ireland at naboluntaryong magsagawa ng misyon sa Sapang Palay, umabot sa 20,000 pamilya ang nailipat sa Sapang Palay sa pagitan ng Disyembre  1963 at Abril 1964.

Si Kelly ay dumating sa bansa noong 1961, at nagsimula ng kanyang misyon sa Sapang Palay noong Mayo 1964.  Siya ay kasalukuyang pa ring nakatira sa Sapang Palay. Dino Balabo

Tigil mula ang pagtatayo ng pabahay sa SJDM

LUNGSOD NG SAN JOSE DEL MONTE, Bulacan—Tigil muna ang pagtatayo ng mga bahay para sa mga pamilyang iskwater o socialized housing sa lungsod na ito matapos magdeklara ng moratorium.

Gayunpaman, sa kabila ng moratorium na matatapos sa Abril 2014, magpapatuloy ang paglilipat ng mga pamilyang iskwater mula sa kalakhang Maynila patungo sa lungsod na ito nagsimula mahigit 50 taon na ang nakakaraan.

Kaugnay nito, ipinahayag ni Gob. Wilhelmino Alvarado ang patuloy na pagsuporta sa programa ng administrasyong Aquino hinggil sa paglilipat sa lalawigan ng mga iskwater mula sa kalakhang Maynila.

Dahil sa moratorium sa SJDM, inialaok niya ang ibang bayan sa lalawigan upang mapaglipatan, ngunit binigyang diin niya na kailangan ang pakikipag-ugnayan sa mga pamahalaang lokal at pagsunod sa mga itinatakda ng kasalukuyang land use plan o gamit ng lupa.

Ayon kay Eduard Ignacio, ang administrator ng lungsod ng SJDM, ang moratorium ay ipinabatid ni Mayor Reynaldo San Pedro kay Kalihim Mar Roxas ng Department of Interior and Local Government (DILG) sa isang pulong na isinagawa sa lungsod na ito noong Lunes, Agosto, 5.

Ang pulong na isinagawa matapos ihatid ni Roxas at nina Social Welfare Secretary Dinky Soliman at Public Works Secretary Rogelio Singson sa lungsod na ito ang 87 pamilyang iskwater mula sa Lungsod ng San Juan sa kalakhang Maynila.

Ang mga nasabing pamilya ay inihatid sa San Jose Heights, isang proyektong pabahay ng National Housing Authority (NHA) sa Barangay Muzon.

Nilinaw ni Ignacio na ang pansamantalang ipinatitigil ng moratorium ay ang reklasipikasyon o pagsasalin ng gamit ng lupa sa lungsod upang pagtayuan ng mga socialized housing projects.

Ang mga socialized housing project ay karaniwang pinaglilipatan ng mga iskwater at maralitang mga taga-lungsod,

Ayon kay Ignacio, ang moratorium ay may bisa hanggang sa katapusan ng Abril sa susunod na taon, maliban na lamang kung ito ay paiikliin o higit na palalawigin ng Sangguniang panglungsod na naunang nagpatibay nito.

 Iginiit pa niya na layunin ng moratorium na pansamantaolang pabagalin ang paglobo ng populasyon ng SJDM na ayon sa 2010 census ay nasa 454,000 na ngunit ngayon ay tinatayang umaabot sa 730,000.

“Sobra na talaga ang laki ng populasyon naming,punong-puno na ang San Jose,” ani Ignacio at iginiit na hindi sila nawawalan ng problema sa paghahatid ng socialservices dahil sa kinakapos ng pondo.

Bukod dito, mga iskwater lamang ang inililipat sa SJDM, at hindi ang pondo na nakatakda sa mga ito mula sa pinagmulang pamahalaang lokal. Dino Balabo

BABALA NG DOH:“Dengue storm” paparating

MALOLOS—Maghanda po tayo, may nagbabadyang bagyo, ito ay ang dengue storm.

Ito ang babalang iniwan ni Health Assistant Secretary Eric Tayag  kaugnay ng pagsasagawa ng ikatlong Regional Asean Dengue Day sa Bulacan noong Lunes, Hunyo 24.

Ayon kay  Tayag, mapanganib ang nagbabadyang dengue storm dahil maaaring mapabagsak nito ang ekomoniya partikular na ang Philippine Health Insurance Corporation (PhilHealth)

Ito ay dahil sa apat na uri ang dengue, kung saan ang type 1 ay nanalasa na sa Luzon partikular na sa Bulacan, at ang type 2 ay nasa Visayas ang Mindanao.

Ayon kay Tayag, “its just a matter of time bago makarating Luzon ang type 2 ng dengue.”

Ipinaliwanag ninya na ang isang tao na dinapuan na ng dengue type 1ay maari pang dapuan ng isa type nito

Ito ay nangangahulugan na kahit nagkadengue naang isang tao, maaari pa rin siyang magsakit hatid ng dengue type 2.

Dahil dito, iginiit ni Tayag ang paghahanda laban sa dengue dahil batay sa kanilang projection ay tataas pa ang mga dengue cases sa susunod na dalawang buwan.

Ito ay matapos ang pagdating mga mga bagyo na maaaring magbukas ng panibagong breeding ground sa mga lamok.

Ayon pa kay Tayag, umabot na sa 193 na ang namatay sa dengue sa bansa  hanggang nitong Hunyo 8. 

Noong nakaraang taon,naitalaang pinakamataas na bilang ng kaso ng dengue sa Luzon, ngunit sa taiong ito, ang mataas na bilang ay naitala sa Visayas at Mindanao.

Ito ay dahil sa paglitaw ng dengue type 2 sa Visasyas at Mindanao.

Bilang paghahanda sa paglaban sa dengue,ipinayo niya ang pagsasagawa ng 4 o’clock habit o ang paglilinis sa kapaligiran, partikular nasa mga pinamumugaran ng mga lamok.

“Kailang puksain natin ang mga lamok lalona ang kiti-kiti upang  hindi tayo ang mapinsala,” sabi ni Tayag.

Ang 4 o’clock habit ay kasunod ng religious 3 o’clock habit na tinatampukan ng pagdadasal.

Sabi ni Tayag, “pagkatapos nating magdasal na sana ay huwag tayong magkasakit ng dengue, sundan agad natin ito ng aksyon.”

Hinggil naman sa epekto ng dengue storm, ipinaliwanag niya na noong nakaraang taon ay umabot sa 175,000 ang naitalang kaso ng dengue sa bansa.

“Halimbawang 100,000 na lang ang magkasakit at sila ay kasapi ng Philhelath na nagbibigay ng P8,000 sa bawat kasaping nagkasakit ng dengue, aabot sa P800-Milyon iyon,” sabi niya.

Kung grabe naman ang sakit tulad ng severe dengue, umaabot sa P15,000 ang ibinibigay ng PhilHealth, at ayon kay Tayag kung aabot sa 100,000 ang may severe dengue, aabot sa P1.5-B an gang magagastos.

“That’s a lot of money and that is the money we don’t have,” sabi niya at iginiit na kung dadami ang maysakit ng dengue, maaaring bumagsaka ng PhilHealth. (Dino Balabo)