Pinakamataas na bilang ng lumagda sa recall petition naitala sa Malolos

 
MALOLOS—Dismayado na nga ba ang mga Bulakenyo partikular na ang mga residente ng lungsod na ito sa ika-apat na taon ng panunungkulan ni Gob. Wilhelmino Albarado?

Ito ang katanungan ng marami matapos ilabas ng Commission on Elections ang tala ng bilang ng mga lumagda sa petisyon ng recall election na isinumite laban sa punong lalawigan kung saan naitala ang pinakamataas na bilang mga lumagda sa lungsod na ito.

Samantala, nailipat na sa Office of the Deputy Executive Director for Operations (ODEDO) sa punong tanggapan ng Comelec sa Maynila ang mga dokumentong isinumite kaugnay ng petisyon noong Lunes, Mayo 5 matapos ang inisyal na pagsusuri ng Comelec-Bulacan.

Tumanggi ng magbigay ng pahayag si Alvarado hinggil sa petisyon ng siya ay kapanayamin ng Mabuhay noong Lunes, matapos ang paglulunsad ng Sine Bulakenyo sa Capitol Gymnasium.

Ang Sine Bulakenyo ay isang libreng pa-sine na isasagawa ng kapitolyo sa mga barangay sa layuning mapataas ang kaalaman ng mga Bulakenyo sa hinggil sa mga naisagawa at iapatutupad na proyekto ng administrasyong Alvarado.

Ngunit para sa ilang Bulakenyo, ang nasabing pa-sine ay isang kontra propaganda matapos lumagda sa petisyong recall election ang 319,707 Bulakenyo dahil sa kawalan ng tiwala kay Alvarado bunga ng diumano’y kurapsyon at pag-abuso sa kapangyarihan,

Batay sa tala ng Comelec-Bulacan, nanguna ang lungsod na ito sa 21 bayan ay dala pang lungsod sa lalawigan sa dami ng lumagda sa nasabing petisyon.

Ayon kay Abogado Elmo Duque, umabot sa 25,835 botanteng Malolenyo ang lumagda sa petisyon; kasunod ang bayan ng Sta.Maria kung saan ay umabot sa 22,988 ang lumagda.

Ang iba pang bayan at lungsod sa lalawigan na nakapagtala ng mataas na bilang ng lumagda sa petisyon ay ang Marilao (22,676), Lungsod ng San Jose Del Monte (22,486), Bocaue (18,411), at Baliwag (15,593).

Naitala naman sa bayan ng Hagonoy ang pinakamababang bilang na 947.

Ang Hagonoy ay ang bayang pinagmulan ni Alvarado kung saan ay naglingkod siya bilang alkalde mula 1986 hanggang 1998; na sinundan ng paglilingkod mula 1998 hanggang 2007 bilang kongresista ng unang distrito ng lalawigan na sumasakop din sa nasabing bayan.

Kung distrito naman ang pag-uusapan, naitala ang pinamakataas na bilang ng lumagda sa petisyon mula sa ikatlong distrito.

Batay sa tala ng Comelec-Bulacan,umabot sa 87,489 botante ang lumagda sa petisyon mula sa ikatlong distrito,kasunod ang ikalawang distruito na may 83,783.

Ang ikaltlong distrito ng Bulacan ay kinakatawan sa Kongreso ni dating Gob. Joselito Mendoza na ang pamilya ay nagmula sa bayan ng Bocaue na matatagpuan sa ikalawang distrito.

Matatandaan na noong Abril 25, isinumite ni Perlita Mendoza ng bayan ng Bocaue sa Comelec Bulacan ang kopya ng mga dokumentong para sa petisyong election recall laban kay Alvarado.

Si Mendoza ay naglingkod bilang Provincial Administrator ng Bulacan sa panahon ng administrasyon ni dating Gob. Joselito Mendoza noong 2007 hanggang 2009.

Pansamantala rin siyang naglingkod bilang City Information Officer ng  Malolos noong 2010, ngunit nagbitiw sa tungkulin matapos kuwestiyunin ang kanyang tirahan.

Una rito, isang kaso ng pandarambong ang ihinhain ni Antonio Manganti sa Ombudsman laban kay Alvarado at anim pang opisyal ng kapitolyo noong Pebrero 14.

Ayon kay Alvarado, pulitika ang motibo ng pagsasampa ng kasong pandarambong laban sa kanya at mga opisyal ng kapitolyo ngunit pinabulaanan ito ni Manganti.

Si Manganti ay isang dating rebel returnee na naglingkod din sa kapitolyo sa panahon ng panungkulan ni dating Gob. Josefina Dela Cruz, ang nakatatandang kapatid ni Kint. Mendoza ng ikatlong distrito.

Si Dela Cruz ay kasalukuyang nanunungkulang ngayon bilang Post Master General ng Philippine Postal Corporation.  Dino Balabo

Misteryosong imahe dinadagsa sa Divine Mercy Shrine

National Shrine of Divine Mercy sa Marilao,Bulacan. Larawan mula sa interaksyon.com

MARILAO, Bulacan— Dumadagsa na ang mga deboto sa Divine Mercy National Shrine sa bayang ito isang buwan bago ang kwaresma.

Ito ay dahil sa balitang kumalat hinggil sa misteryosong image na nakunan ng kakakabit lamang na mga close circuit television (CCTV) camera.

Kaugnay nito, sinabi ni Father Pros Tenorio na magsasagawa ng imbestigasyon ang Diyosesis ng Malolos upang suriin at beripikahin ang nasabing imahe. “Hindi pa namin masabing miraculous dahil ang Obispo ang

magdedeklara niyan,” sabi ni Tenorio sa isang telephone interview kahapon.

Pangungunahan ni Obispo Jose Francisco Oliveros ng Diyosesis ng Malolos ang imbestigasyon, at pagkatapos nito ay saka maglalabas ng ulat at deklarasyon. Sa kasalukuyan ay tinipon ni Tenorio ang mga materyales na susuriin kabilang ang CCTV at cellular phone footage ng misteryosong imahe.

Ang imahe ay nakunan mula alas 12 ng madaling araw hanggang alas 6 ng umaga noong Marso 3. Nakita sa CCTV footage ang larawan ng animo ay hugis ng imahe ni Hesukristo sa Divine Mercy.

 

Larawan mula sa crispypataatkarekare.com

Ang imahe na animo’y ay isang liwanag ay nakita sa isang kuwarto na walang ilaw. Hindi na muling nakita ang imahe matapos itong makunan ng CCTV noong Marso 3.

Ipinaliwanag ni Tenorio na ang 24 na CCTV camera ay ipinakabit nila kamakailan lamang bilang paghahanda sa pagdagsa ng mga debotong dumarayo sa pambansang dambana kapag kuwaresma.

Kaya’t ikinagulat nila nang makunan nito ang isang larawang inilalarawan bilang “misteryoso.” Habang nalalapit naman ang kwaresma, sinabi ng pari na mapaghimala man o hindi ang imahe,ito ay nagpapaalala ng paghahanda ng sarili.

Ipinaalala niya na bukod sa pisikalna paghahanda, nararapat ding ihanda ng bawat tao ang espiritu sa nalalapit na kwaresma. Dala nito ang mensahe ng panalangin, kawang-gawa at pag-aayuno.

Nilinaw niya na ang pananalangin ay pakikipag- ugnayan sa Diyos, ang kawang-gawa ay sa kapwa tao at ang pag-aayuno ay pakikipag- ugnayan sa sarili. Idinagdag pa ni Tenorio ang pagbabalik loob sa Diyos na mapagmahal at handang magpatawad ng mga kasalanan.

Kaugnay ng balita sa misteyosong imahe,kinumpirma ni Tenorio ang pagdagsa ng mga deboto sa pambansang dambana. Sinabi niya na bigla ang pagdami ng mga debotong bumibisita bawat araw mula nang lumabas ng balita.

Nagpahayag din siya ng pag-asa na higit na marami ang dadagsa sa dambana sa nalalapit na Huwebes at Biyernes Santo. Dino Balabo

12 bagong alkalde nalalal sa Bulacan

Mayor-elect Boy Cruz of Guiguinto

MALOLOS—Namayani ang mga kandidato ng Liberal Party-National Unity Party (LP-NUP) coalition sa Bulacan, ngunit 12 bagong  alkalde ang nahalal sa 21 bayan ng lalawigan.

Kaugnay nito,pormal na iprinoklama noong Martes ng gabi, Mayo 14 ng provincial board of canvassers (PBOC) sina Gob. Wilhelmino Alvarado at kanyang maybahay na si Kint. Marivic Alvarado.

Ito ay dahil sa kapwa walang kalaban ang mag-asawa, ngunit hindi sila dumalo sa proklamasyon.

Sa iba pang halal na posisyong panglalawigan kabilang ang apat pang distrito ng kongreso at distrito para sa Sangguniang Panglalawigan, nanguna rin sa bilang ng boto ang kandidato ng koalisyon.

Batay sa monitoring report ng PBOC, tinalo ni Angat Vice Mayor si incumbent Mayor Reggie Santos; samantalang nagtagumpay ang indipendienteng si Carol Dellosa na pigilan ang tangka ni Ferdinand Estrella na halinhan ang kanyang ama na si Mayor Romy Estrella sa Baliwag.

Team Calumpit

Sa Calumpit, naiproklama na si Dr. Jessie De Jessie noong Lunes bilang kapalit ng kanyang kapatid na si outgoing mayor James De Jesus; samantalang matagumpay na nakabalik sa pwesto si dating Mayor Ambrosio Cruz ng talunin si incumbent Mayor Isagani Pascual ng Guiguinto.

Sa Hagonoy, tinalo ni Raulito Manlapaz, pangulo ng Association of the Barangay Captain si incumbent Mayor Angel Cruz; samantalang papalitan ni mayor-elect Tito Santiago si outgoing mayor Epifanio Guillermo sa Marilao sa Hunyo 30.

Sa Norzagaray, pinutol ni Fred Germar ang 15-taong pamamayagpag ng pamilya Legazpi ng talunin niya si incumbent Mayor Feliciano Legazpi; samantalang sa Obando; nagtagumpay sa ikalawang pagtatangka sa pagka-alkalde si Edwin Santos ng talunin si incumbent Mayor Orencio Gabriel.

Mayor-elect Manlapaz & Vice-mayor elect Santos

Sa  Paombong, ginulat ni Abogado Isagani Castro, isa ring indipendiente ang marami ng talunin si Maryann Marcos, ang maybahay ni incumbent Mayor Donato Marcos; samantalang hahalinhan ni Jocell Vistan ang kanyang inang si outgoing Mayor Tessie Vistan ng Plaridel sa Hunyo matapos talunin ang tatlon pang kandidato.

 Sa San Ildefonso, Galvez pa rin ang nanalong alkalde matapos talunin ni Gerald Galvez ang kanyang tiyuhin na si dating Mayor Edgardo Galvez na nagtangkang palitan ng kanyang anak na si incumbent Mayor Carla Paula Galvez Tan na noong Disyembre ay umurong upang magbigay daan sa kanyang ama.

Sa bayan ng San Rafael, nabahiran ng alegasyon ng pamimili ng boto ang pagwawagi ni Vice Mayor Cipriano Violago laban kay incumbent Mayor Lorna Silverio.

Mayor-elect Violago

Ang iba pang alkalde sa Bulacan na muling nahalal ay sina Mayor Romy Castro ng Balagtas, Eduardo Villanueva ng Bocaue, Patrick Neil Meneses ng Bulakan, Arnel Mendoza ng Bustos, Ronaldo Flores ng Donya Remedios Trinidad, Enrico Roque ng Pandi, Vicente Esguerra ng Pulilan, Roderick Tiongson ng San Miguel, at Bartolome Ramos ng Sta.Maria.

Muli rin nahalal sina incumbent Mayor Christian Natividad, Joan Alarilla at Rey San Pedro  ng mga lungsod ng Malolos, Meycauayan at San Jose Del Monte, ayon sa pagkakasunod.  (Dino Balabo)

Koronasyon ng Lakan at Lakambini 2012 isasagawa sa Baliwag sa Disyembre 8

PAOMBONG, Bulacan—Nakatakdang koronahan sa Sabado, Disyembre 8 ang magwawagi sa ika-16 na prestiyosong timpalak na Lakan at Lakambini ng Bulacan.

Ito ay isasagawa sa New Baliwag Gymnasium sa ganap na ika-8 ng gabi.  Ang koronasyon ng magwawagi sa 2012 Lakan at Lakambini ang Bulacan ang magsisilbing kauna-unahang gawain sa katatapos na gymnasium.

Ayon kay Jo Clemente, tagapagtatag ng Lakan at Lakambini ng Bulacan Charities Inc., (LLBCI), mabigat ang tunggalian sa ika-16 na taon ng timpalak dahil bukod sa magaganda at makikisig ang mga kalahok ay may kanya-kanyang angking talent o kakayahan.

Gayunpaman, nilinaw niya na hindi lamang sa ganda, kisig at talino ang batayan ng pagpili ng mananalo.

Sinabi ni Clemente na kabilang din dito ay ang magandang ugali at katauhan ng kalahok.

Ito ay dahil sa ang magwawagi ay magsisilbi ring “ambassador of goodwill” ng lalawigan ng Bulacan.

“Katulad sa mga nagdaang taon, we want not onoy the prettiest, but the best candidate to represent Bulacan,” ani ng tagapagtatag ng timpalak na nagsilbing paunang tuntungan ng mga kabataang Bulakenyo sa pagkakamit ng higit na karangalan sa iba pang larangan.

Ang mga opisyal na kalahok sa timpalak na Lakambini 2012 ay sina Angelica Mae Gaji ng Calumpit, Cristel  Mercado ng Plaridel, Guia Paula Gutierrez ng Sta. Maria, Zairramayca Adriano ng Paombong, Rachel Navarro ng Hagonoy, Dannah Gayle Claro ng San Jose Del Monte (SJDM), Rickie Me Bernabe ng Baliwag, Bernadette Mae Aguirre ng Sta. Maria, Shaira Soriano ng Obando, Kariza De Guzman ng Pulilan, Kate Diane Moreno ng SJDM, Maria Krizza Fylle Ignacio ng Sta. Maria, Kriszha Mare Soriano ng Meycauayan, Michelle Angela Osit ng San Ildefonso, Maria Dayanara Andus ng Plaridel, Cristina Andrea Munsayac ng San Rafael, at Ma. Candice Augustine Alarilla ng Sta. Maria.

Ang mga kandidato naman sa 2012 lakan ng Bulacan ay sina Archie Santos ng Sta. Maria, Christian Allen Soriano ng Meycauayan, Emerald Pascual ng Bulakan, Rey Anthony Mempin ng San Rafael, Raymart Emeterio ng Marilao, Philip Henry Magsalin ng Calumpit, James Maverick Jose ng Bustos, Arvin Valmocina ng San Ildefonso, Aljun Torres ng Malolos, Jayson Agapito ng Sta. Maria, Jonathan Maniquis ng SJDM, Venson Alfonso ng Bocaue, Aaron Neil Borja ng SJDM, Joey Taruc ng San Ildefonso, Mark Louie Bornilla ng Plaridel, Charlie Rick Sheen Flores ng Sta. Maria, Ariel Abracero ng Meycauayan, Ian Paul Cabasag ng Balagtas, at Jay Cervantes ng Marilao.

Batay naman sa tala ng LLBCI, ang mga tinanghal na Lakan at Lakambini ng Bulacan mula 1997 ay sina Arnold Sambilay ng Calumpit at Ruby Ann Copio ng Plaridel (1997), Den Daniel Reyes ng Hagonoy at Novie Anne Principe ng Bocaue (1998), Mark Iaebo ng Meycauayan at Bernadette quiambao ng Marilao (1999), Renato Acosta ng Hagonoy (2000), Jayson Garcia ng Bocaue (2001), Christian Cruz ng San Rafael at Romina Bareyro ng Sta. Maria (2002), Oliver Salas ng Marilao at Ma. Cecilia De Castro ng San Rafael (2003), Carmencita Cruz ng Guiguinto (2004), Josey Ofracio ng Bocaue at Angelica Cardenas ng Guiguinto (2005), Carissa Villanueva ng San Ildefonso (2006), Jolas Paguia ng Guiguinto  at Katrina Moraga ng Meycauayan (2007), Jerby Dela Cruz ng SJDM at Janelle Narciso ng Meycauayan (2008), Mary Kristine ng Malolos (2009), Mark Angelo Lopez at Mary Denisse Toribio ng Baliwag (2010), Joveth Andrade ng San Rafael at Ivy Ocampo ng Paombong (2011).  (Dino Balabo)