PANGGULO O HINDI: 6 na kandidato posibleng matanggal sa listahan

Balite

 MALOLOS—Anim na indipendienteng kandidato sa panglalawigang posisyon,kabilang ang dalawang kandidato sa pagka-gobernador ang posibleng matanggal sa listahan bago dumating halalan sa 2013.

Almera

Ito ay matapos silang ipatawag at imbestigahan ng Commission on Elections (Comelec) noong Sabado, Oktubre 20 upang matukoy kung may kakayahan silang magsagawa ng malawakang kampanya sa halalan.

Ang imbestigasyon ay bahagi ng polisiya ng Comelec na linisin ang talaan ng kandidato o alisin ang mga nuisance o kandidatong itinuturing ng panggulo sa halalan.

Ang mga inimbestigahan ay sina Jaime Almera at Ernesto Balite na kapwa indipendienteng kandidato bilang gobernador; Sahiron Salim at Joseph Cristobal na kandidato bilang kongresista sa una at ikalawang distrito ayon sa pagkakasunod; at sina Jose Cundangan at Carlito Bernabe na kandidatong Bokal sa una at ikatlong distrito ng lalawigan, ayon sa pagkakasunod.

Maliban kay Salim, ang lahat ay ipinatawag ng Comelec batay sa bagong polisiyang ipinatutupad kaugnay ng pagtatanggal ng ng panggulong kandidato sa listahan. 

Salim

Si Salim ay ipinatawag dahil sa nagsampa ng petisyon sa Comelec si Kinatawan Marivic Alvarado na ipinadedeklara siya bilang isang nuisance candidate.

Ito ay dahil sa noong 2010 ay kumandidatong gobernador ng lalawigan ng Sulu si Salim na isang dating koronel ng pulisya, ngunity natalo dahil illang libo lamang naipong boto.

Ayon sa petisyon ni Kint. Alvarado, magiging katawa-tawa ang halalan sa unang distrito dahil wala daw kakayahan si Salim na magsagawa ng kampanya.

Sa panayam kay Abogado Elmo Duque, provincial election supervisor ng Bulacan,nilinaw niya na ang kanilang ginawa ay bahagi ng pagpapatupad ng polisiya ng Comelec.

Sinabi niya na dapat linisin ang listahan ng kandidato batay sa itinatakda ng batas.

Isa sa kanilang batayan ay kung may sapat na pananalapi ang kandidato na gagamitin sa halalan.

Cristobal

Batay sa batas, ang isang indipendienteng kandidato ay gagastos ng P5 sa bawat botante sa kanyang posisyong kinakandidatuhan.

Para sa mga kandidatong tulad nina Almera at Bernabe, hindi sapat na batayan ang pananalapi sa pagkandidato.

Ngunit nilinaw ni Duque na ang nasabing probisyon ay isa lamang sa mga minimum requirement ng batas.

Iginiit pa niya na hindi siya ang magdedesisyon sa magiging kapalaran ng mga indipendienteng kandidato.

“Our part is just to investigate and explore their capabilities, then we will submit a recommendation to our Law Department,”  ani Duque.

Ilan pa sa mga pinagbabatayan ng Comelec kung ang isang kandidato ay panggulo o nuisance lamang ay kung may kapangalan siyang kapwa kandidato sa katulad na posisyong kakandidatuhan.

Isa man sa anim na indipendiente ay walang kapangalan sa posisyong kakandidatuhan.

Bernabe

Dahil dito pinagsumite ng Comelec ang mga kandidato ng mga dokumento upang patunayan na may sapat silang ari-arian at pananalapi na magagamit sa kampanya.

Ayon kay Cundangan, hindi problema sa kanyang ang pananalapi dahil may mga supporters at ari-arian siya.

Si Cundangan ay dating tagapangulo ng Sangguniang Kabataan sa Barangay Matimbo sa lungsod ng Malolos. Siya ay kasalukuyang pangulo ng Federation of Parents Teachers and Community Association sa Bulacan State University.

Si Bernabe naman ay naging kapitan sa Barangay Poblacion sa Norzagaray.  Ang kanyang dalawang kamay ay naputol mataopos maputukan ng pillbox na napulot noong siya ay bata pa.

Si Cristobal naman ay dating Provincial Tourism Officer ng Kapitolyo na nagbitiw sa tungkulin bago maghalalan.

Cundangan

Samantalang si Almera ay nagsabing nag-aral ng drafting sa Bulacan State University; at si Balite ay isang retiradong guro.

Ayon sa mga tagamasid sa pulitika sa Bulacan, kapag nadiskwalipika sina Almera at Balite, wala ng makakalaban si Gob. Wilhelmino Alvarado.

Gayundin ang kanyangmaybahay na si Kinatawan Marivic Alvarado kapag nadiskwalipika si Salim.

Dagdag pa ng mga tagamasid sa pulitika, matatala sa kasaysayan pulitika sa lalawigan ang mag-asawa dahil sila ang kauna-unahang mag-asawang pulitiko na magiging unopposed sa kanilang kandidatura.  (Dino Balabo)

Bakit dumarami ang babaeng pumapasok sa pulitika?

Senador Loren Legarda at Mayor Lorna Silverio ng San Rafael.

SAN RAFAEL, Bulacan—Araw pa lamang ng Lunes ay abala na si Mayor Lorna Silverio ng bayang ito sa dami ng haharapin at kakausaping tao; at mga dokumentong pipirmahan.

Bukod dito, abala rin ang kanyang isip sa presentasyong inihanda para sa mga negosyante na posibleng mamuhunan sa bayang ito na noong nakaraang taon ay pinagbuhusan ng mahigit sa P500-Milyon puhunan ng ibat-ibang negosyante.

Ito ang buhay ng alkalde ng isang bayan na ang pangunahing layunin ay mapaglingkuran ang kanyang mga kababayan sa pamamagitan ng makabuluhang serbisyo na kadalasan ay umaagaw ng kanyang oras para sa pamilya, at sa karanasan ni Silverio, bilang ina at asawa.

Mas kilala sa tawag na Tita Lorna, si Silverio ay isa sa mga babaeng naglilingkod bilang punong bayan sa lalawigan.  Ang iba pang babaeng punong bayan ay sina Mahyor Tessie Vistan ng Plaridel, Mayor Paula Carla Galvez-Tan ng San Ildefonso at Mayor Joan Alarilla ng Lungsod ng Meycauayan.

Batay sa tala ng Mabuhay, may pito pang bayan sa lalawigan na pinaglingkuran ng isang babae bilang punong bayan o bise alkalde sa ibat-ibang panahon mula noong 1998.  Ito ay ang mga bayan ng Donya Remedios Trinidad, Norzagaray, Sta. Maria, Guiguinto, Hagonoy, at Bulakan at Paombong.

Ang pagdami ng pagpasok ng mga kababaihan sa larangan ng pulitika sa lalawigan ay sinasabing hatid panunungkulan ni Pangulong Corazon Aquino mula 1986 hanggang 1992; at pagkakahalal kay dating Gob. Josefina dela Cruz noong 1998.

Makasaysayan ang pagkakahalal kay Dela Cruz dahil siya ang kauna-unahang babeng gobernador sa100-taong kasayasayan ng pamumuno ng mga Bulakenyo sa lalawigan, bukod ipinagdiwang noong 1998 ang ika-100 guning taon ng kasarinlan ng bansa.

Ayon kay Tita Lorna, ang pagpasok ng mga kababaihan sa larangan ng pulitika ay nagpapatunay lamang na patuloy na pagkilala sa kanilang kakayahan na mamuno.

Nagpapatunay din ito na ang larangan ng pulitika ay hindi na isang teritoryo na lamang ng mga kalalakihan.

Katunayan, sa may 651 kandidatong nagsumite ng kanilang certificate of candidacy (COC) noong unang linggo ng Oktubre para sa halalan sa susunod na taon sa lalawigan ay 109 ang babae.

Sa nasabing bilang, walo ang kandidatong alkalde, 11 ang bise alkalde, 90 ang konsehal, isa ang bise gobernandor, dalawa ang bokal at tatlo ang kandidato para sa kongreso.

Sa 109 na babaeng kandidato sa lalawigan, umabot naman sa 15 ang kandidatong indipendiente.

Bilang isa sa mga beteranang babaeng pulitiko sa lalawigan, sinabi ni Tita Lorna na ang kanihaan ng mga babae ay nagsisilbi ring kalakasan nila.

“Pag babae ka, you are seen as weaken than men physically, kasi ang mga lalaki ay malalakas pero mainitin ang ulo,” ani Tita Lorna.

Binigyang diin niya na sa pamamahala sa isang bayan, hindi p-wede ang mainitin ang ulo, sa halip ay kailangan ang akma at tamang pagsusuri sa mga sitwasyon upang makabuo ng akmang hakbang at aksyon.

Bukod dito, sinabi ni Tita Lorna na naniniwala siya sa kasabihan na “if you want the best man for a job, give it to woman.”

Inihalimbawa niya ang katangiang matkiyaga ng mga kababaihan bukod pa sa masusing pagtutok sa trabaho.

“Hindi madali ang pamumuno sa isang bayan, kailangan ang pagiging mahinahon kalmado at tiwala sa sarili.  Hindi pwede yung basta-basta na lang, naku maliligaw ka ng desisyon,” sabi ni Tita Lorna na nagsilbing akalde ng bayang ito noong 1998, pagkatapos ay nahalal na kongresista ng ikatlong distrito noong 2001 at naglingkod sa nasabing posisyon hanggang 2010  kung kailan siya nagbalik bilang alkalde.

Si Tita Lorna ay maybahay ng industrialist na si Ricardo Silverio Sr., na naglingkod bilang kinatawan ng ikatlong distrito at alkalde ng bayang ito.

Inayunan naman ni dating Bokal Patrocinio Laderas  ang mga binanggit na katangian ng mga babae sa paglilingkod bayan na nagsisilbing bentaheng mga ito.

Bilang dating bokal ng unang distrito, sinabi Laderas na ang Bulacan ay may mahabang tradisyon ng mga kababaihang nagsilbing lider ng pamayanan.

Ilan sa mga inihalimbawa niya ay sina Trinidad Tecson, ang isa sa mga bayani Biak na Bato; at ang 20 kababaihan ng Malolos na nagsulong ng pagtatayo ng paaralan para sa mga kababaihan sa Malolos noong panahon ng Kastila.

Ayon kay Laderas, ang inisyatiba ng mga kababaihan ng Malolos ay binigyang diin pa ni Dr. Jose Rizal ng kanyang purihin angmga ito sa kanyang liham na hiniling ni gat Marcelo H. Del Pilar na sulatin para sa mga nasabing kababaihan.

Sa mga nagdaang taon naman, ang tapang ng kababaihan ng Malolos ay nasalin sa larangan ng pulitika ng mahalal na alkalde nito si dating Mayor Purificacion Reyes noong dekada 60.

Si Reyes ay kilala sa tawag na “Cancion” , at siya rin ang itinuturing na kauna-unahang babaeng pulitiko na nahalal bilang alkalde sa lalawigan.

Ayon kay Laderas, ang pagkakahalal kay Reyes bilang alkalde ay naunahan lamang ng ilang taon ng panungkulan ni Mayor Ramona Trillana ng Hagonoy.

Ngunit si Trillana ay hindi nahalal na alkalde, sa halip siya pumalit kay mayor Jose Suntay ng ito ay mahalal sa Kongreso noong 1960.  Si Trillana ang bise alkalde ni Suntay.

“Nana Monang (Trillana) was elected as vice mayor and by succession he assumed office as Mayor,” ani Laderas.

Ang panungkulan ni Trillana ay nasundan pa ng panunungkulan ni mayor Maria Garcia ng Hagonoy sa huling bahagi ng dekada 60 ng siya ay pumalit sa napaslang na si dating Mayor Emilio G. Perez.  (Dino Balabo)

‘3G’ ibabangga ng baguhan sa 50-taong dinastiya

BULAKAN, Bulacan—Inilatag na ng dalawang baguhang kandidato ang kanilang plano upang basagin ng mahigit sa 50-taong dinastiya ng mga Meneses sa bayang ito.

Ang dalawang baguhan ay sina Dr. Roberto Ramirez at Abogada Ana Marie Pagsibigan na kandidato ng Laban ng Demokratikong Pilipino (LDP) bilang alkalde at bise alkalde sa Bulakan.

Ang kanilang sasagupain ay sina incumbent Mayor Patrick Neil Meneses at incumbent Vice Mayor Alberto Bituin ng National Unity Party (NUP).

Si Meneses ay kasapi ng angkan na naghawak ng pinakamataas na posisyon sa bayang ito mula pa noong 1956.

Ayon kay Ramirez, hindi madali ang kanilang magiging laban dahil ang nakakahalintulad nito ang pagbangga sa isang matibay na moog na pinatatag ng mahabang panahon.

“Sa tagal nila sa pulitika, nakabaon na sa kaisipan ng mga tao ang kanilang sistema at mga pamaraan, pero naniniwala kami na mababasag iyan,” sabi ng doktor na napilitang kumandidato sa unang pagkakataon upang magkaroon ng pagbabago sa bayang ito.

Ayon kay Ramirez, bilang isang tradisyonal na angkan ng pulitiko, ang mga Meneses ay may kakayahan magkaroon ng tradisyunal na “3G” o “guns, goons, and gold.”

Ito ay dahil sa mayaman ang angkan na itinuturo ng mga residente ng bayang ito na nagpauso ng maruming pamamaraan sa pulitika katulad ng pamimili ng boto.

Ang akusasyong ito ay ilng beses nang pinatunayan ng ilang kaanak ng mga Meneses at tinampukan pa ng pagkapaslang kay Luisito Sta. Maria na sinasabing “bagman” ng pamilya tatlong araw bago maghalalan noong 2007 kung kailan ay sinasabing natangay din ng mga salarin ang milyong halaga ng salapi na gagamitin sana sa halalan.

Ayon kay Ramrez, ang 3G ng mga Meneses ay tutumbasan din nila ng “3G.” Ito ay nangangahulugan ng “God, goodness, and guts.”

Ipinaliwanag niya na ang Diyos, kabutihan at lakas na loob lamang ang makakabasag sa dinastiya ng mga Meneses.

“Wala kaming itatapat sa pera nila kungdi ang lakas ng loob at kredibildad sa tulong ng Diyos,” aniya.

Inamin ng duktor na wala silang planong pumasok sa larangan ng pulitika, ngunit dahil sa kawalan ng pagbabagong pangkaunlaran sa kanilang bayan ay naglakas na rin sila ng loob.

“Kung hindi kami papasok ngayon, sino at kailan,” aniya.

Nagpahayag din siya ng kalungkutan sa mabagal na pag-unlad ng kanilang bayan sa ilalim ng mahigit na 50 pamumuno ng mga Meneses.

“Ang hamon namin sa mga taga-Bulakan ay iba naman, subukan nila kami ng tatlong taon lang,:” sabi ng duktor at iginiit na napag-iwanan na ng Guiguinto ang Bulakan samanatalang dating bahagi lamang ng kanilang bayan ang Guiguinto.

Bukod dito, sinabi ni Ramirez na ang bayan ng Bulakan ang dating kabisera ng lalawigan sa panahon ng Kastila, ngunit napagiwanan na rin ito ng mga katabing bayan at lungsod tulad ng Balagtas at Malolos.

HALALAN SA 2013: Kapamilya’y kakampi o katunggali sa Bulacan

LUNGSOD NG MALOLOS—Tampok ang tunggalian ng mga magkakapamilya sa halalan sa susunod na taon sa Bulacan batay sa sipi ng certificate of candidacy (COC) na ipinagkaloob ng Commission on Elections (Comelec) sa Mabuhay Online.

Ang kalagayang ito ay nakakatulad ng ilang insidente sa lalawigan noong 2010.

Ngunit kapansin-pansin din sa kasalukuyan ang pagkandidato ng mag-ama sa bayan ng Norzagaray bilang alkalde at bise alkalde. Ang kalagayang ito ay unang nangyari sa lalawigan ng Nueva Ecija kung saan ay nahalal ang magkapatid na Joson bilang gobernador at bise gobernador may anim na taon na ang nakakaraan.

Kapansin pansin din ang pagkandidato bilang kongresista ng dalawang magkapatid sa magkahiwalay na distrito, samanatalang ang anak ng isa ay kandidatong konsehal sa kanilang sinilangang bayan.

Batay sa ulat ng Comelec-Bulacan, magtutunggali sina dating Mayor Edgardo “Sazo” Galvez ng Liberal Party at kanyang anak na si incumbent Mayor Paula Carla Galvez-Tan ng NUP sa bayan ng San Ildefonso sa susunod na halalan.

Mas naging kumplikado ang nalalapit na tunggalian ng mag-ama dahil nagsumite rin ng COC para sa pagka-alkalde ng nasabing bayan si Gerald Galvez, na dating pangulo ng sangguniang kabataan at nahalal ding konsehal ng bayan.

Isang tagpo sa halalan noong 2010.

Si Gerald ay anak ni dating Mayor Gener Galvez na huling nanungkulan noong 1998 sa nasabing bayan at nang babalik sa dating puwesto ay pinatay noong Hunyo 2000.

Si dating Mayor Gener ay nakatatandang kapatid ni dating Mayor Sazo, at tiyuhin ni Mayor Galvez-Tan.

Ang pagtutunggaling ito ng magkakapamilya sa bayan ng San Ildefonso ay ikinagulat ng maraming Bulakenyo, katulad ni dating Bokal Patrocinio Laderas ng Hagonoy.

Ngunit sa kabila nito, sinabi ni Laderas na may posibilidad na dalawa mga Galvez ang posibleng umurong sa laban upang magbigay daan sa isang kapamilya.

Kaugnay nito, umuugong na ang balita na maaaring isa sa mag-ama ang uurong sa laban dahil ang tunay daw na kalaban ay si Gerald.

Ang balitang ito ay nagkahugis nang magpahayag ang isang mataas na opisyal ng koalisyong Liberal Party (LP) at National Unity Party (NUP) na hindi pa nila malaman kung sino kina Sazo at Galvez-Tan ang susuportahan ng koalisyon bilang common candidate.

Ang mga Galvez ang naghaharing pamilya sa larangan ng pulitika sa San Ildefonso mula pa noong unang bahagi ng 1990. Nasingitan lamang sila ni Mayor Enrique Viudez II noong 1998 hanggang 2001.

Matatandaan na sa halalan noong 2010 ay nagsagupa rin sa pagkakongresista ng ikatlong distrito ng Bulacan ang mag-amang Ricardo Silverio Sr., at Ricardo Jr.

Sa nasabing laban, ay kapwa sila tinalo ni dating Gob. Joselito Mendoza na nagwagi bilang kinatawan ng ikatlong distrito.

Sa bulubunduking bayan ng ng Donya Remedios Trinidad, magtutunggali naman sa pagka-mayor ang magpinsang buo na sina incumbent Mayor Ronaldo Tigas Flores (NUP) at Abogado Rustico Tigas De Belen na kandidato bilang indipendiente

Si De Belen ay ang dating hepe ng Bulacan Environment and Natural Resources Office (Benro) na nagbitiw sa tunggkulin nitong Setyembre.

Bukod sa kanilang dalawa, kandidato rin bilang konsehal ng DRT ang isa nilang kaanak na si Oliver Tigas De Belen na nasa ilalim ng partidong Kilusang Bagong Lipunan (KBL).

Sa kauna-unahang pagkakataon naman ay nagkaroon ng mag-amang kandidato sa iisang bayan na magkatiket sa dalawang pangunahing halal na posisyon. Ito ay sina incumbent Mayor Feliciano Legazpi ng Norzagaray at ang kanyang anak na si Konsehal Arthur ng NUP.

Ang mga Legazpi ang naghaharing pamilya sa pulitika sa nasabing bayan mula pa noong 1995 ng maahalal na alkalde si Feliciano. Noong 2004, nahalal ang kanyang maybahay na si Dra. Matilde at noong 2007 ay nagbalik si Feliciano.

Ayon sa mga resident eng Norzagaray, ang pamamayani sa pulitika ng pamilya ay dahil sa mahusay na pamamahala at pamumuno ng mga Legazpi. Isang halimabawa nito ay ang pagpapataas ng taunang pondo ng bayan dahil sa maayos na paniningil ng real property tax sa mga higanteng pabrika ng semento.

Mula noong nakaraang taon, ang Norzagaray ay isa mga bayan sa lalawigan na itinuturing na kwalipikado upang maging isang lungsod dahil sa pagkakaroon ng mahigit sa P100-milyon koleksyon sa buwis sa loob ng nagdaang limang taon.

Sa hanay naman ng mg akandidatong kongresista ay nakatawag ng pansin ang sabayang pagkandidato ng magkapatid na Kinatawan Joselito Mendoza at Dr. Pedrito Canisio Mendoza sa magkahiwalay na distrito.

Si Kinatawan Mendoza ay muling kakandidato bilang kinatawan ng ikatlong distrito; samangtalang ang kanyang kapatid na si Dr. Pedrito ay kandidato ng LP sa pagka-kongresista sa ikalawang distrito ng lalawigan.

Balik-tanaw sa halalan sa Bocaue noong 2010.

Ang ikalawang distrito ng lalawigan ay binubuo ng mga mga bayan ng Baliwag, Bustos, Pandi, Plaridel, Guiguinto, Balagtas at Bocaue kung saan nagmula ang pamilya Mendoza na ang pimnakatanyag na kasapi ay si dating gob. Josefina Mendoza-Dela Cruz na ngayon ay postmaster general ng Philippine Postal Corporation (Philpost).

Sa kabila naman ng pagkandidato ni Kinatawan Joselito sa ikatlong distrito, ang kanyang anak na si Josef Andrew Mendoza ay kandidato naman bilang konsehal sa Bocaue, ang bayang kanilang sinilangan.

Si Josef Andrew ay kandidato rin sa ilalim ng LP kasama si Mayor Eduardo Villanueva Jr.

Ang iba pang kandidato na magkapamilya ay sina Gob. Wilhelmino Alvarado at kanyang maybahay na si Kinatawan Marivic ng unang distrito ng lalawigan.

Pareho namang bokal ang hinahabol na posisyon ng magpinsang buo na sina Bokal Felix at Therese Cheryll Ople. Sila ay anak nina dating Senador Blas F. Ople at kapatid na si dating Bise gob. Bernardo Ople.

Ang kapatid naman ni Therese Cheryll na si Bernardo Jr., ay kandidatong konsehal ng Malolos.

Bukod sa kanila, may mga kandidato rin na nais ipagpatuloy ang nasimulan ng kanilang kaanak.

Sa bayan ng Calumpit, inendorso ni Mayor James De Jesus ang kanyang kapatid na si Jessie bilang kandidatong mayor sa ilalim ng NUP.

Sa Baliwag, inindorso ni Mayor Romeo Estrella ang kanyang anak na si Ferdinand bilang kandidatong alkalde sa ilalim ng bandila ng NUP; at sa Balagtas nais mapahaba ni Mayor Romeo Castro ang pananatili ng pamilya sa paghawak ng tungkulin.

Gayundin sa bayan ng Bulakan kung saan ay nakaatang sa balikat ni Mayor Patrick Neil Meneses ang responsibilidad na mapanatili ang pamilya sa pamamayani sa larangan ng pulitika na nagsimula pa noong 1956.

Sa lungsod ng Malolos, magkahiwalay naman ang partidong kinabibilangan ng magkapatid na Christian at Theodore Natividad. Bilang incumbent mayor, si Christian ay kabilang sa LP samantalang si Theodore ay kandidatong konsehal sa ilalim ng bandila ng United Nationalist Alliance (UNA).

Ang dalawa ay kapwa anak ng yumaong  Kinatawan Teodulo Natividad, ngunit magkaiba ang kanilang ina.