Pagbuo sa PHL space agency isinulong, benepisyo inihayag

LUNGSOD NG QUEZON—Hiniling ng mga pangunahing Pilipino astronomers ang paglikha ng Philippine Space Agency (PSA) matapos mailunsad ang inisyatiba hinggil dito noong Biyernes, Disyembre 14 sa lungsod na ito.

Kaugnay nito, binigyang diin nila ang benepisyo ang pagkakaroon ng PSA sa bansa, na ang panukalang batas ay isinusulong na sa Kongreso ni Kinatawan Angelo Palmones ng Agham party-list.

Ayon kay Dr. Jose Edgardo Aban ng University of Brunei Darussalam, ang paglikha sa PSA ay maghahatid ng karagdagang kaunlaran sa bansa dahil ang mga teknolohiyang gagamitin dito ay magagamit sa iba pang suliranin ng bansa tulad ng climate change.

Bilang dating tapangulo ng Committee on Space Technology Applications ng Department of Science and Technology (DOST), sinabi ni Aban na isa sa beneipisyo ng PSA ay ang pagkakaroon ng sariling satellite ng bansa.

Ito ay magagamit sa pagbuo ng mapa ng buong bansa na tutukoy sa mga hangganan nito; at maging sa mga lugar na madalas mapinsala ng kalamidad.

Ito ay magagamit din sa mga pagsusuri sa mga lugar na sinalanta ng kalamidad.

Ayon kay Aban, sa panahon na siya naglilingkod sa DOST, may mga pagkakataon na kung saan saang ahensioya sila sa nakikisuyo upang magkaroon ng satellite based images ng mga lugar na napinsala ng kalamidad.

“It has been a long time dream for Filipino astronomers and space scientists to someday have a single agency on the country, just like NASA that will navigate the country’s space science  research and development that will spur development of applications that can generate wealth to the nation,” sabi ni Aban.

Ikinumpara din niya ang bansa sa mga kapit-bansa nito sa South East Asia na nakapagsimula na ng sariling space program.

Bilang isa sa mga pangunahing tagapagsulong ng paglikha sa PSA noong siya ay nasa DOST, sinabi ni Aban na noon pang 2006 nila ito unang ipinanukala.

Sa panahong iyon, sinabi niya na ang mga kapit-bansa ng Pilipinas ay nagsusulong na rin ng kanilang space program.

“They move forward while our space program remain a proposal,” sabi ni Aban.

Dr. Custer Deocaris

Kinatigan ito ni Dr. Custer Deocaris ng Rizal Technological University (RTU), ang nag-iisang pamantasan sa bansa na nagtuturo ng kursong Astronomy.

Sinabi ni Deocaris na ang Pilipinas ay napag-iwanan na ng mga bansang Vietnam, Bangladesh at Sri Lanka sa larangan ng space program.

Isa mga epekto nito ay mapapakinabangan na ng mga nasabing bansa ang benepisyo ng kanilang space program, ngunit ang Pilipinas ay wala pang nasisimulan.

Ayon kay Deocaris, “we should not forget that most of today’s modern conveniences like cellular phones, internet, cloud computing, LEDs and solar panels are spin offs from investments in space technology.”

Idinagdag pa niya na, “countries that have some control on those technologies are able to develop even faster as they break the vicious cycle of technological parasitism and are able to compete in the global market.”

Bukod naman sa mga benepisyong pangteknolohiya, idinagdag ni Dr. Aban ang benepisyong pang-makabayan ng space program.

“Its patriotic benefits will be immeasurable, because it will be a source of pride,” abi ni Aban.

Inayunan pa rin ito ni Deocaris at inihalimbawa ang pagwawagi ni Gloria Diaz sa Miss Universe noong 1969; at ang pamamayagapag nina Leah Salonga sa larangan ng musika at Manny Pacquiao sa boksing.

“Mula ng manalo si Gloria Diaz sa Miss Universe, naging bahagi na ng kultura natin ang mga beauty pageant; at nung makasama si Leah Salonga sa Miss Saigon, mas dumami sa atin ang nahilig sa pagkanta,” ani Deocaris.

Hinggil naman kay Manny Pacquiao, sinabi niya na hindi maitatanggi ang pagkilala at pagmamalaki ng mga Pilipino sa boksingero.

Gayundin ang naging mga epekto ng pagwawagi ng mga Pilipino sa larangan ng bowling at billiards.

Matatandaan na ilang beses na nagwagi pandaigdigang kumpetisyon si Rafael Nepomuceno at sa bilyar si Efren “Bata” Reyes.

Ilan sa mga epekto ng mga pagwawaging ito ay ang pagdami ng mga mga bowling lanes at billiard hall sa bansa dahil dumami ring Pilipino ang nahilig sa mga nasabing laro. (Dino Balabo)

Ang Pasko ng pamilya ng nawawalang UP student

MALOLOS—Sa ika-anim na sunod na Pasko, tanging ang larawan lamang ni Sherilyn Cadapan ang makakapiling ng kanyang ama at ina sa hapag ng noche buena.

Ang kalagayang ito ay taliwas sa paggunita ng Pasko ng mas maraming pamilyang Pilipino kung kailan ay masayang magkakasama-sama ang bawat kasapi.

Ngunit para sa pamilya Cadapan, hindi mailalarawan ang kalungkutan.

Sa kanila nito, umaasa pa rin si Erlinda, ina ni Sherilyn na muling makakapiling ang kanyang anak.

Sa esklusibong panayam ng Mabuhay, inamin ni Erlinda ang kalungkutan.

“Bawat araw na nadagdag sa paghahanap sa kanya is a long agony,” sabi niya patungkol sa kanyang anak na si Sherilyn, isa dalawang mag-aaral ng University of the Philippines (UP) na dinukot ng mga armadong kalalakihan sa bayan ng Hagonoy noong Hunyo 2006.

Ang ikalawang mag-aaral ng UP ay si Karen Empeno na ang pamilya ay nagmula Bataan.

Ayon kay Erlinda, halos hindi nakakatulong ang gobyernod sa pag-aresto kay retiradong Heneral Jovito Palparan at sa paghahanap sa kanyang anak, ngunit umaasa pa rin siyang muli itong makikita.

“Kahit  hindi nakakatulong ang gobyerno sa paghahanap kay Palaparan at kay Sherilyn, may Diyos na tumutulong, kaya kung nasaan ka man Sherilyn, manatili kang matatag, magkikita pa rin tayo,” ani Erlinda.

Huling nakipiling ng Pamilya Cadapa sa pagdiriwang ng Pasko si Sherilyn noong 2005 o anim na buwan bago siya dukutin sa Hagonoy.

Mula noon, naglaho ang sigla ng paggunita ng pamilya sa Pasko.

“Yung picture na lang niya ang kasama naming sa mesa at yung picture pa ring iyon ang makakasama naming ngayong Pasko,” ani Erlinda at nagsimulang mabasag ang tinig..

Habang pinapahid ang luhang umagos sa mga mata, nagpahayag si Erlinda ng pagkadismaya sa patuloy na pagkukulang ng gobyerno sa pag-aresto kay Palparan na inakusahan niya na sangkot sa pagdukot sa kanyang anak.

Erlinda Cadapan, ina ni Sherilyn

Ayon kay Erlinda, si Palparan ay hindi pangkaraniwang pugante na nagtatago sa kamay ng batas.

Ito ay dahil sa kilalang kilala ang heneral ng mga ahensiya ng gobyerno na dapat maghanap at umaresto sa kanya,

“Yung ibang kriminal na hindi kilala ay nahuhuli, bakit si Palparan na kilalang kilala ay hindi makita,” ani Erlinda.

Dahil dito, nagpahayag din siya ng duda sa pulisya at maging sa kakayahan ng military na hulihin ang heneral.

Iginiit pa niya na isang taon na ang nakalipas matapos mahgpalabas ng warrant of arrest laban kay Palparan ang korte sa Bulacan.

Sa kabila naman ng di pagpapakita ng heneral ay nagpapatuloy ang pagdinig sa kasong kidnapping na isinampa laban sa kanya.

Dahil sa pagtatago ng henera na binansagang “Berdugo,” muli siyang hinamon ni Erlinda ng sabihing, “dati ang tapang mong humarap sa Kongreso at sabihing ikaw ang implementor ng Oplan Bantay Laya ni Gloria Arroyo, ngayon ay ipakita mo ang tapang mo at humarap sa korte at patunayan na ikaw ay inosente.”  (Dino Balabo)

Taga-San Ildefonso at Sta. Maria ang nagwagi sa ika-16 na Lakan at Lakambini ng Bulacan

Photo by Dee Gonzales

PAOMBONG, Bulacan—Tinanghal na 2012 Lakan at Lakambini ng Bulacan ang binata at dalagang nagmula sa bayan ng San Ildefonso at Sta. Maria.

Sila sina Joey Taruc at Bernadette Mae Aguirre.

Ayon kay Jo Clemente, tagapagtatag ng taunang timpalak, bukod sa pangunahing karangalan, tumanggap din sina Taruc at Aguirre ng tig-dalawangh special awards.

Si Taruc ay tumanggap ng “People’s Choice” at “Best in Swimwear” awards, samantalang si Aguirre ay tumanggap din ng “Best in Swimwear” award at “Best in Formal wear.”

Tumanggp din sila ng tropeo at tig-P30,000 premyo.

Ang iba pang nasipagwagi ay ang mga sumusunod:

Tumanggap ng ikalawang karangalan o first runner up honors sina Jonathan Maniquiz ng Lungsod ng San Jose Del Monte, at Christina Andrea Munsayac ng San Rafael.

Ang ikatlong karangalan at tinanggap nina Charlie Rick Sheen Flores ng Sta. Maria, at Rickie Mae Bernabe; ang ika-apat na karangalan ay nasungkit nina Mark Louie Bornilla ng Plaridel at Kriszha Mae Soriano ng Lungsod ng Meycauayan; at ang ikalimang karangalan ay tinangggap nina Aaron Neil Borja ng Lungsod ng San Jose Del Monte at Rachell Navarro ng Hagonoy.

Ang mga tumanggap naman ng mga special awards ay ang mga sumusunod.

Ang Peoples Choice na Lakambini ay si Kriszha Mae Soriano; Mister and Miss Congeniality naman sina mark Louie Bornilla ar Guia Paula Gutierrez ng Sta. Maria; at tumanggap ng “Best in Talent”award sina Carlie Rick Sheen Flores at Michelle Osit ng San Ildefonso.

Ang Mister and Miss photogenic naman ay sina Christian Allen Soriano ng Lungsod ng Meycauayan at Michelle Osit; samantalang nasungkit din ni Bornilla ang Best in Formal wear award sa hanay ng kalalakihan.

Photo by Ed Galang

Ayon kay Clemente, hindi makakalimutan ang timpalak na Lakan at Lakambini ng Bulacan sa taong ito ay ito ay ang ika-16 na taon.

Bukod dito, sinabi ni Clemente na ang nagwaging Lakambini 2012 ay nauna ng sumali may tatlong taon ang nakakaraan.

“Dati na ng sumali si Bernadette sa Lakambini pageant, at pagkatapos at sumali na rin sa iba pang prestisyosong timpalak tulad ng Binibining Pilipinas.

“Talagang pinili niyang magbalik at sumali ulit sa Lakambini ng Bulacan dahil kinikilala niya na ito ang pinakaprestisyosong timapalak sa ating lalawigan,” ani Clemente.

Iginiit pa ni Clemente na higit nilang pauunlarin ang timpalak sa susunod na taon upang makapipili ng magiging kinatawan ng lalawigan sa mga mas prestisyosong timapalak.

Sa taong ito, umabot sa mahigit 50 ang lumahok nngunit 36 lamang ang naging opisyal na kandidato at kandidata sa 2012 Lakan at Lakambini ng Bulacan.  (Dino Balabo)

Bulakenyo nagtitipid para magkapagbigay ng donasyon sa Mindanao

MALOLOS—Nagsimula na ang pag-iipon ng donasyon ng mga Bulakenyo para sa mga biktima ng bagyong Pablo sa Mindanao.

Ito ay batay sa panawagan ni Gob. Wilhelmino Alvarado na noong Biyernes, Disyembre 7 ay kinansela ang magarbong plano para sa pag-iilaw sa higanteng Christmas tree sa harap ng kapitolyo bilang bahagi ng pagtitipid.

Maging ang ilaw ng nasabing Christmas tree ay tinipid upang makatipid sa gastos sa kuryente, at ang matitipid ayon sa punong lalawigan ay ipahahatid sa mga nasalanta ng bagyo, bukod pa sa maiipong donasyon mula sa bawat Bulakenyo at pamahalaang lokal.

Tumugon din ang mga alkalde sa lalawigan na makikiisa sa pag-iipon ng mga donasyon sa kanilang mga kababayan upang idagdag na maiipon ng kapitolyo.

Kaugnay nito, isinailalim ni Pangulong Benigno Aquino III ang bansa sa ilalim ng State of National Calamity sa pamamagitan ng isang proklamasyon noong Sabado, Disyembre 8.

Ayon kay Alvarado, ang pagbibigay ng donasyon sa nasalanta ng bagyong Pablo ay hindi lamang bilang pagbabalik ng pabok ng Bulacan sa mga biktima, kungdi isang pakikiramay na rin.

“Noong tayo ang nasalanta ay nagbigay din sila noong nakaraang taon at nitong Agosto. Ito na ang pagkakataon nating gumanti sa kanilang kagandahang loob na ipinakita sa atin,” ani ng punong lalawigan.

Bilang patunay ng pagbibigay ng donasyon sa Bulacan ng mga pamahalaang lokal sa timog na bahagi ng bansa ay sinabi ni Alvarado na katatanggap lamang nila ng isang tseke mula sa pamahalaang lokal ng Cebu na nagkakahalaga ng P300,000.

“Tayo naman ang magbibigay ngayon kasi kahit matagal ng tapos ang baha sa atin ay may dumarating pang tulong,” ani Alvarado.

Inayunan din ito ni Mayor James De Jesus ng Calumpit na noong nakaraang taon at nitong Agosto ay lumubog sa baha.

Ayon kay De Jesus nakahanda silang magbigay ng tulong at mag-iipon pa rin sila ng karagdagang donasyon mula sa kanilang mga kababayan.

Para naman kay Mayor Arnel Mendoza ng Bustos, magpapadala sila ng bigas upang maihatid ng kapitolyo sa Mindanao.

Nangako rin si Mayor Christian Natividad ng Malolos na mag-iipon ng donasyon para sa mga biktima ng bagyong Pablo.

Baha 2011, Hagonoy

Para naman kay Mayor Lorna Silverio ng San Rafael na nag-iipon na rin ng mga donasyon, maliit o malaki ang maibigay na donasyon ay malaking tulong para sa mga biktima ng kalamidad.

Sinabi pa niya na pabor din siya sa payak na pagdiriwang ng Pasko upang makatipid.

“Hindi pagarbuhan ang pagdiriwang ng Pasko, dapat nating alalahaning an gating Panginoong Hesus ay sa isang simpleng sabsaban isinilang bilang simula ng kanyang pagtubos sa sangkatauhan,” ani Silverio.  (Dino Balabo)