Hiling sa CMWD: Aksyunan ang problema sa tubig sa Paombong

PAOMBONG, Bulacan – Walang na namang tubig!

Ito ang karaniwang sigaw ng mga residente ng Barangay bayang ito hinggil sa patuloy na lumalalang problema sa tubig.

Ang problemang ito ay napalulubha pa ng patuloy na pag-init ng panahon kaya walang magawa ang mga resident kungdi magtitiis sa kakarampot na tulo ng tubig sa kanilang mga gripo.

Ang problemang ito ay hindi ngayong lang nararamdaman, sa halip ay mahigit sampung taon, ayon sa isang residente.

“Maraming taon nang ganyang ang sitwasyon ng tubig dito. Mga mahigit sampung taon na nga,” ani Cristina Bullos, 35.

Ayon kay Bullos, na mahigit tatlong dekada nang residente sa Baranggay Sto. Niño, nagsimula ang problema sa tubig noong piñata ang deep well na dating pinanggagalingan ng tubig.

“Dati kasi may poso, may deep well, hindi nawawalan ng tubig dito. Nung piñata ang deep well sa NAWASA na tayo umasa,” aniya.

Labis na hirap ayon sa mga residente ang mabuhay ng kapos sa tubig kaya naman iba’t-ibang paraan ang kanilang ginagawa upang makaipon ng tubig.

Sa pamilya ni Bullos, marami silang malalaking drum na tinatiyaga nilang pag-ipunan ng tubig mula ala-una hanggang alas-kuwatro ng madaling araw.

“Madami kaming drum. Pinupuno (namin) kapag gabi. Puyat ang mga tao sa pag-iipon ng tubig,” kwento niya.

Tulad ni Bullos, pinagpupuyatan din ni Michelle dela Cruz, 35, ang pag-iipon ng tubig para may magamit ang kanyang pamilya sa araw. Maliban dito, sa madaling araw din naglalaba si dela Cruz dahil walang tulo kapag araw.

“Minsan one o’clock naglalaba na ko. Inuubos ko na yung labahin ko para kapag umaga na walang tulo nakalaba na ko,” aniya.

Maliban sa maagang pag-iipon ng tubig at paglalaba, labis na pagtitipid din sa tubig ang ginagawa nina Bullos at dela Cruz dahil sa kakulangan ng tubig sa kanilang baranggay.

“Kapag naliligo ako nakasahod ako sa batya para yung tubig na pinang-paligo ko magagamit pa pambuhos sa banyo,” ani dela Cruz.

“Kapag naligo isang timba lang,” biro naman ni Bullos.

Hindi maikakaila ang hirap ng walang tubig ayon kina dela Cruz at Bullos.

Anila, labis na puyat ang nararanasan  nila makaipon lamang ng tubig dahil laging walang tubig tuwing araw.

Kadalasan ay nagsisimula ang pagtulo ng tubig ng ala-una at matatapos ng alas-singko ng umaga.

“Napakahirap. Minsan kapag naghugas ka ng kaldero may langis langis pa. Hindi mo mahugasan ng maayos kasi nga tipid tipid sa tubig,” ani Bullos.

“Yung gusto mong gawin sa araw hindi mo magawa kasi walang tubig. Saka imbis na makaligo ng maayos ang mga bata dahil mainit hindi magawa dahil kulang sa tubig,” ani dela Cruz.

Ayon kay Bullos, makailang beses na siyang nagreklamo sa City of Malolos Water District (CMWD), ang nagsusuplay ng tubig sa baranggay Sto. Niño. Ngunit kahit anong reklamo ang gawin ay walang pagbabagong nagaganap.

Dahil dito, plano aniya ng kanilang baranggay na gumawa ng sulat na pirmado ng mga residente ng kanilang baranggay na ipapadala sa CMWD.

Ang gagwin nilang hakbang na ito ay suportado ng Kapitan ng baranggay na si Edgardo Cabantog.

“Oo, suportado ko iyon. Dahil alam ko din ang hirap ng walang tubig,” ani Cabantog na labing-anim na taon nang nagsisilbing Kapitan ng baranggay.

Ayon as kanya, minsan ng nagpadala ng pirmadong petisyon, kung saan 300 residente ang pumirma, sa CMWD subalit wala ring naganap na aksyon.

“Nagreklamo na kami sa Water District. Nagbigay na kami ng pirmadong petisyon para aksyunan yung aming problema dito siguro one year ago. Pero wala hindi namin makausap yung manager,” ani Cabantog.

“Ang lagi nilang sinasabi ay gagawan ng paraan (pero) walang aksyon, walang solusyon,” dagdag pa niya.

Batid aniya ng mga opisyal ng baranggay ang lumalalang problema sa tubig at ang hirap na dinadanas ng mahigit apat na libong residente ng Baranggay Sto. Niño.

“Yung sitwasyon ng tubig naging worst. Puyat ang mga tao makaipon lang ng tubig,” ani Cabantog.

Aniya, lalong lumala ang sitwasyon ng tubig noong nasira pa ang water pump dalawang taon na ang nakakalipas. Hindi na aniya ito pinalitan o ginawa ng CMWD.

Dahil sa kawalan ng aksyon ng CMWDt, mayroon ng nakalatag na plano ang baranggay upang masolusyunan ang suliranin sa tubig.

“Sa amin sa baranggay, kung ayaw kaming bigyan ng pansin ng Malolos Water District gumagawa kami ng paraan at humahanap kami ng alternatibo upang masolusyunan ang problemang ito,” ani Cabantog.

Isa sa alternatibong paraan aniya ang pagbabaon ng mga tubo ng Jet Matic na makakapagsuplay ng tubig na maari pang inumin.

Sa kasalukyan aniya ay may mga motor ng Jet Matic ang baranggay na ilalagay sa apat na purok sa baranggay.

Inaasahan aniya na sa buwan ng Agosto pa maikakabit na ang apat na water pumps dahil kulang pa ang kagamitang kailangan para dito dahil sa kakulangan na din sa pondo.

Ayon pa kay Cabantog, may balitang balak nang ibenta ng CMWD ang prangkisa nito sa pagsusuplay ng tubig sa Paombong sa Hiyas Water District.

Kung sakaling matuloy ito, ani Cabantog “Bagong management baka naman maging mas maayos ang serbisyo pagka maganda angs serbisyo ay paniguradong tataas ang singil sa tubig.”

Maliban sa paglalagay ng mga tubo at makina na maaaring panggalingan ng tubig, balak din aniyang magtayo ng isa Baranggay Water Cooperative kung saan magiging serbisyo ng baranggay ang patubig sa bawat esidente.

“Ang tubig ay serbisyo, hindi negosyo. Kaya ang gusto talaga natin ay magkaroon ng isang Water Cooperative. Kumita man ito ay kaunti lang at sa Sto. Niño din mapupunta,” ani Cabantog.  Rosemarie Gonzales

Mayor Natividad nakaligtas, body guard nasawi, 2 pa sugatan sa aksidente

Makikita sa larawang kuha ni Kevin De Guzman ang pinsala sa sasakyan ni Mayor Natividad matapos ang aksidente. Nasa ibaba naman ang larawan ni Roderick Santiago na kuha ni Rolan Surio.

PULILAN, Bulacan—Ilang araw bago sumapit ang ika-30 kaarawan ni Roderick Santiago ay biniro ang mga kaibigan na bumisita sa kanyang bahay sa Barangay Canalate sa Malolos upang samahan siya sa pagdiriwang.

Ngunit hindi lamang mga inimbita niya ang dumating sa sa kanyang bahay, sa halip ay ang iba pang mga kaibigan, mga kakilala, kaanak at mga kasama sa trabaho.

Ang kanilang pagdalaw ay hindi lamang upang gunitain ang kaarawan ni Santiago, kundi upang ipagluksa ang kanyang pagkasawi noong Huwebes ng gabi, ilang oras bago sumapit ang kanyang ika-30 kaarawan.

Si Santiago ay nasawi matapos araruhin ng isang 14 wheeler trailer truck ang Mitsubishi Montero ni Mayor Christian Natividad ng Malolos noong Enero 30 sa Barangay Sto. Cristo sa bayang ito.

Nasugatan sa nasabing aksidente ang alkalde maging ang driver na si Nicanor Reyes at isa pang body guard na nakilalang si Maverick Jake Perez.

Bilang isa sa mga close in body guard ni Natividad, si Santiago ay nakaupo sa likod ng driver na si Reyes habang minamaneho sasakayan; samantalang si Natividad ay nasa harap katabi ni Reyes, at si Perez ay nasa likod ni Natividad, katabi ni Santiago.

Batay sa imbestigasyon ng pulisya, kasalukuyang tinatahak ang sasakyan ni Natividad ang kahabaan ng kalsada mula sa Baliwag patungo sa Plaridel sa bahagi ng Barangay Santo Cristo sa bayang ito noong  Huwebes, bandang alas-10:15 ng gabi.

Payapa ang biyahe ng sasakyan ngunit pagdating sa kanto ng Sto.Cristo at Plaridel-Pulilan diversion road ay inararo ito ng trailer truck na nagmula sa tulay ng Plaridel-Pulilan at patungo sa junction ng Pulilan.

Ang tinamaang bahagi ng sasakyan ay ang panig ng driver na si Reyes ngunit higit na mas malaki ang tama sa bahagi kung saan nakaupo si Santiago.

Nasugatan si Natividad at mga kasama niya, samantalang nawasak ang kanyang sasakyan.

Naisugod pa sa Bulacan Medical Center si Santiago, ngunit binawian din ng buhay sanhi ng mga tinamong pinsala sa katawan.

Habang sinusulat ang balitang ito ay wala pang inilalabas na opisyal na pahayag ang tanggapan ni Natividad hinggil sa kanyang kalagayan, ngunit ilang kaibigan ang nagsabing, ligtas ang alkalde at nasa maayos na kondisyon.

Sumuko naman ang driver ng trailer truckna na nakilalang Roger Garces na nagmula sa Tandang Sora sa Quezon City.

Nahaharap naman sa kasong reckless imprudence resulting to damage to property si Garces na kasalukuyang nasa kustodiya ng pulisya ng Pulilan.  Dino Balabo at Rommel Ramos

Misteryosong barko, sumadsad sa Malolos

LUNGSOD NG MALOLOS—Nababalot pa rin ng misteryo ang sumadsad na barko sa baybayin ng Barangay Pamarawan sa lungsod na ito sa kasagsagan ng bagyong Labuyo noong Lunes ng gabi, Agosto 12.

Ito ay dahil magkakasalungat na pahayag hinggil sa kung bakit ito napadpad at sumadsad sa lungsod na ito ay kung sino ang tunay na may ari.

Ang barko ay may pangalang MV Yuan Heng.

Batay sa mga ulat, ipinahayag ng pulisya ng Bulacan na ang barko ay dating nakapundo sa punduhan ng Mariveles sa lalawigan ng  Bataan at tinangay ng alon sanhi ng malakas na hangin ng bagyong Labuyo.

Dahil dito, lumalabas na napadpad lamang sa Pamarawan ang barko bandang alas-10 ng gabi noong Lunes.

Ngunit ayon sa mga mangingisda sa Pamarawan, bandang alas-10 ng gabi noong Lunes ng una nilang mamataan ang barko.

Sinabi ni Felipe Abdon, 57, isang mangingisda, na sa kabila ng malaking alon at madilim na gabi ay nakita niya ang barko mula sa kanyang bahay dahil may ilaw ang barko na halos dalawang kilometro ang layo sa kanyang bahay na matatagpuan sa baybayin.

Bukod rito,iginiit ni Ignacio Cruz, kapitan ng Barangay Pamarawan na may namataang kalalakihan sa barko ang ilang kabarangay niyang mangingisda noong Martes ng umaga.

Ito ay inayunan pa ni Mayor Christian Natividad ng lungsod na ito kung saan ay binanggit pa niyang may mga namataang armadong kalalakihan sa barko noong Martes ng umaga.

Ayon pa kay Natividad, imposible ang ilang pahayag na napadpad lamang ang barko at walang nakasakay doon ng sumadsad dahil na rin sa ang angkla nito sa harap at likod ay kapwa nakababa.

Isa sa pinagbasehan ni Natividad ay ang mga larawang kuha ng mamamahayag na noong Martes ng tanghali kung saan ay malinaw na makikita ang tanikala ng angkla ng barko.

Ang barko na naakyat at napasok ng pinasanib na elemento ng Malolos Police at ng Army Special Forces bandang alas 4:30 ng hapon noong Martes.

Ngunit ng ma[pasoknilaito ay natuklasang abandonadoang barko dahilni isang tripulante ay wala silang natagpuan sa barko.

Una rito, ilang beses na nagtangkang lumapit sa barko ang mga pulis at sundalo sakay ng bangkang de motor, ngunit napigilan ng malalaking alon.

Maging ang mamamahayag na ito, kasama ang dalawa pa ay nagtangkang lumapit sa barko sakay din ng bangka, ngunit napilitang bumalik sa pampang dahil muntik ng tumaob ang bangkang sinasakyan ng hampasin ng naglalakihang alon.

Hinggil sa pagmamay-ari ng barko, sinabi ni Natividad na hanggang noong Huwebes ng tanghali ay wala pa ring nakikipag-ugnayan sa kanila upang angkinin ang pagmamay-ari ng barko.

Ito ay sa kabila na halos araw-araw mula noong Martes ng gabi na iniuulat sa telebisyon ang pagsadsad ng barko sa Pamarawan.

Ilang himpilan ng telebisyon ang nag-ulat naang barko ay pag-aari diumanong isang negosyanteng Filipino-Chinese.

Ngunit batay sa pananaliksik ni Natividad at ng mamamahayag na ito sa maritime database sa internet, ang barkong napadpad na may pangalang MV Yuan Heng ay nakarehistro sa Phnom Penh sa Cambodia.

Batay sa maritime database, ito ay pag-aari ng S. America Far Eastern Shipping Co. Ltd., at ang operator nito ay ang Shandong Jianghai Industrial Group na nakabase sa Rongcheng sa Shandong, mainland China.

Ayon pa sa matitime database,ang MV Yuan Heng ay isang Panamanian flagged ship, ngunit batay sa ulat ni Supt. David Poklay,hepe ng pulisya ng Malolos, nakarekober silang isang watawat ng Peoples Republic of China sa loob ng barko matapos nila itong maakyat at mapasok. Dino Balabo

14 na silid aralan sa CMIS natupok

MALOLOS—Dalawang araw na walang klase sa City of Malolos Integrated School (CMIS) sa Barangay Sto. Rosario matapos matupok ng apoy ang 14 na silid aralan nito noong Lunes ng madaling araw, Hunyo 24.

Nagbalik ang klase noong Miyerkoles matapos simulan ng pamunuan ang pagsasagawa ng shifting ng klase para sa mga apektadong magpaaral.

Batay sa ulat ng Bureau of Fire Protection (BFP), umabot sa mahigit 3.2-Milyon ang napinsalang aro-arian at pasilidad ng paaralan sa dalawang oras na sunog na nagsimula bandang alas-4:20 madaling araw.

Ang sunog ay umabot ng ikalawang alarma at naideklarang fire out makalipas ang dalawang oras.

Batay sa inisyal na imbestigasyon, ang sunog ay nagsimula sa faculty room at mabilis na kumalat sa sa kantina at mga silid aralan ng mag-aaral sa elementarya at sekundarya.

Maging ang dalawang silid aralan ng para sa mga special education (SPED) na gamit ng mga mag-aaral na may kapansanan ay nadamay.

Ayon kay Mayor Christian Natividad, isang malaking dagok ito sa kanilang programang pang-edukasyon.

Ito ay dahil sa kasalukuyang pa lamang nilang dinadagdagan ang mga silid aralan sa mga paaralan sa lungsod na ito na sinimulan nila noong 2011.

Nasunog din ang mga kagamitan tulad ng mga computers.

Ikinalungkot din ni Reynaldo Diaz, punong guro ng CMIS ang nasabing insidente.

Ikunuwento niya sa Mabuhay na unang napansin ng dalawang security guard ang pagkundap-kundap ng ilaw sa paaralan bandang alas-4 ng madaling araw noong Lunes.

Ito ay sinundan ng pag-usok sa silid aralang itinuturing na faculty room, kaya’t agad silang tumawag ng bumbero.

Agad namang tumugon ang BFP ngunit dahil sa yari sa mga kahoy ang mga silid aralan ay umabot sa 14 na silid aralan ang natupok.

Ayon kay Diaz, nagbalik na ang mga magpaaralnoong Miyerkoles matapos ang pulong ng mga guro kung saan ay pinagplanuhan ang pagsasagawa ng klase.

Iginiit pa niya humiling na rin sila sa Department of Education (DepEd) na makapagsagawa ng klase kung Sabado.

Ito ay dahil sa 14 na silid aralan ang nabawas sa kanila ay hindi maaaring pagsabayin ang lahat ng klase, kasama na ang sa sekundarya.

Ayon kay Diaz, walang magiging pagbabago sa klase ng mga mag-aaral na nasa kindergarden at unang baitang.

Ang CMIS ay dating kilala bilang Malolos CentralElementary School kung saan ay isa sa mga pangunahing nagtapos sa nasabing paaralan ay si dating Embahador Bienvenido Tantoco.

Si Tantoco ay nagdonasyon pa ng mga kagamitan sa paaralang noong nakaraang taon kaugnay ng kanyang ika-91 kaarawan.

Bukod dito,may mga iskolar din sa nasabing paaralan ang dating embahador.

Noong 2011, binago ang pangalan ng paaralan at tinawag na CMIS dahil sapagbubukay ng klase para sa sekundarya.

Upang matugunan ang pangangailangan ng mga magpaaral sa sekundarya, nagpatayo ng apat na silid aralan para sa mga ito si Natividad, sa bandang dulo ng bakuran ng paaralan.

Dahil naman sa mataas na bilang ng mgamagpaaral, ilang silid aralan para sa elementarya ang ipinagamit sa mga nasa sekundarya. (Dino Balabo)