Bakit naantala ang rehab ng Angat Dam at pagsasapribado sa ARHEPP?

 

MALOLOS— Bakit naaantala ang pagpapakumpuni sa Angat Dam at pagsasapribado sa Angat River Hydro Electric Power Plant (ARHEPP)?

Ito ang tanong ng maraming Bulakenyo matapos mabatid na hindi natuloy noong Enero ang pagsasalin ng National Power Corporation (Napocor) ng pamamahala sa ARHEPP patungo sa Korea Water Resources Corporation (K-Water).

Ang katanungang ito ay sa kabila ng sunod-sunod na pahayag ni Gob. Wilhelmino Alvarado na masisimulan na ang pagpapakumpuni sa Angat Dam na mahigit isang taon nang ipinapangako ng Metropolitan Waterworks and Sewerage System  (MWSS) at ng kapitolyo.

Batay sa pahayag ng Power Sector Assets and Liabilities Management Corporation (PSALM), hindi pa nakumpleto ng K-Water ang mga dokumento para makapsimula ang operasyon ng tanggapan nito.

Kabilang sa mga kulang sa dokumento ay ang business permit mula sa pamahlaaang bayan ng Norzagaray na nakakasakop sa Hilltop sa Angat Dam kung saan matatagpuan ang kasalukuyang tanggapan ng ARHEPP.

Ito ay kinumpirma ni Inhinyero Rodolfo German, ang general manager ng ARHEPP na nagsabing, umaasa sila na magkakaroon na ng business permit ang K-Water at makakapag-take-over na sa operasyon ng ARHEPP sa Marso 25.

“Nagkaroon ng problema sa legal matters, at sa technical aspect,” sabi ni German kung saan ay tinukoy niya ang kawalan ng business permit ng K-Water bilang isa sa mga “legal matters.”

Sa nauna namang pahayag ni Alvarado, sinabi niya na kinausap na niya si Mayor Alfredo Germar ng Norzagaray upang bigyan ng business permit ang K-Water.

Ayon kay Alvarado, hindi agad ini-release ni Germar ang business permit ng K-Water dahil sinisingil ito ng Real Property Tax (RPT).

Batay sa pahayag ng ilang source, ang RPT na sinisingil ng Norzagaray sa K-Water ay ang RPT na hindi nabayaran ng ARHEPP sa mahabang panahon ng operasyon nito sa Hilltop, Norzagaray.

“Sabi ko kay Mayor Germar ay bigyan na ng business permit ang K-Water at saka na lang kami maniningil ng real property tax,” ani Alvarado at iginiit pa na hindi naman aalis ang K-Water.

Ipinaliwanag ni Alvarado na mahalagang makapagsimula na ng pamamahala ang K-Water sa ARHEPP upang magsimula ang proseso ng pagpapakumpuni sa Angat Dam.

Nagpahayag din ng pag-asa si Alvarado pormal na nang maisasalin sa K-Water ang  pamamahala sa ARHEPP sa Marso.

Ayon pa sa kanya, kapag ito ay natuloy ay maaari ng simulan ang pagpapasubasta ng pagpapakumpuni sa Angat Dam.

Ngunit ayon kay German, bukod sa legal na aspeto ay may hamon pang teknikal sa pormal na paghawak ng K-Water sa ARHEPP.

Ito ay ang kailangan maipakita ng ARHEPP sa K-Water na talagang may kakayahan ang plant na lumikha ng 200 megawatt ng kuryente.

Ayon kay German, apat ang pangunahing turbina ng ARHEPP na lumilikha ng kuryente, at bawa isa rito ay may kakayahang lumikha ng 50 megawatt ng kuryente.

Subalit isa lamang sa apat na turbina ang kasalukuyang umaandar.

Ang tatlo ay may sira, at ayon kay German, dalawa sa mga ito ay kinukumpuni dahil ang isa ay nagkaproblema sa vibrations, samantalang ang isa ay maayos naman ngunit ang generator ang may problema.

Ayon kay German, makukumpuni nila ang dalawa, ngunita ng isa ay maaaring K-Water na ang magpakumpuni at ang magagastos at babayaran na lamang ng PSALM.

Batay sa pagtaya ni German, ang pagkukumpuni ay gagastusan ng P15-Milyon.

Maaari din daw palitan ang turbina dahil matanda na ito o mahigit ng 20 taon.

Ngunit ag bawat isang turbina na na may 50 megawatt capacity at nagkakahalaga ng $50-Milyon o isang milyong dolyar sa bawat isang megawatt.

Dahil naman sa pagkaantala ng pagsasalin ng pamamahala sa  ARHEPP ng K-Water, ay naantala din ang planong pagpapakumpuni sa dam.

Ito ay matapos iurong ng MWSS ang pondong P5.7-B noong nakaraang taon matapos katigan ng Korte Suprema ang K-Water bilang winning bidder sa pagsasapribado ng ARHEPP.

Ayon sa MWSS, bahagi ng kontrata ng K-Water bilang wining bidder ay ang pagpapakumpuni sa dam.

Ngunit hanggang sa kasalukuyan ay hindi pa nakakapag-take-over ang K-Water at wala pa ring pormal na pahayag mula sa mga Koreano kung sila nga mismo ang gagastos sa pagpapakumpuni sa dam.

Bukod dito ay ang isyu kung tatanggapin ng buo ng K-Water ang anim na buwang pag-aaral ng Tonkin and Taylor sa katatagan ng Dam.

Ayon kay Inhinyero Roderick Dela Cruz, isang dam safety expert na Bulakenyo na nakabase sa Estado Unidos, ang nasabing pag-aaral ay masyadong maikli.

Inayunan naman ito ng isang opisyal ng Napocor na nagsabing, “it’s too shallow” patungkol sa isinagawang pag-aaral ng Tonkin and Taylor.  Dino Balabo

Kasaysayan ng Angat Dam, at kaganapan sa naaantalang rehab sa dam

HAGONOY, Bulacan--Para sa higit na pagkakaunawa sa posibilidad ng Angat Dam break, minabuti ng pahayagang Mabuhay na tipuninang mga impormasyon ito hinggil sa mahahalaga tala sa kasaysayan ng Angat Dam at mga kaganapan hinggil sa naaantalang rehabilitasyon ng nasabhing dam.
 

1926—Itinayo ang Angat Afterbay Regulator Dam (AARD) na kilala sa tawag ngayon bilang Bustos Dam.

1929—Itinatyo ang La Mesa Dam sa Novaliches, Lungsod ng Quezon. Ito ang pinagkukunan noon ng tubig inumin ng kalakhang Maynila.

1938—Nagsimula ang pagkuha at paggamit ng Metropolitan Water District (bago naging Nawasa) ng tubig mula sa Angat River sa pamamagitan ng pagpapadaloy ng tubig Ipo-La Mesa Dam Aqueduct.

1959—Tinaasan ang La Mesa Dam upang higit na mas marami ang maitinggal na tubig para sa pangangailangan ng kalakhang Maynila.

1938—Nagsimula  ang Metropolitan Water district (bago naging Nawasa)  sa pagkuha at paggamit ng tubig mula sa Angat River na pinadaloy sa Ipo-La Mesa Aqueduct.

1961 Nobyembre 16—Nagsimula ang konstruksyong para sa Angat River Hydroelectric Power Plant (Arhepp) ng ipagkaloob ng National Power Corporation (Napocor) ang kontrata sa Grogun Inc., para sa konstruksyong ng diversion tunnel, dam foundation excavation and grouting.

Ang kontrata para sa konstruksyon ng dam, dike, spillway tunnels, powerhouse at power facilities ay ipinagkaloob sa  Paul Hardeman (Phil) Inc., para sa kabuuang P72-Milyon.

Ngunit ang tumapos sa konstruksyon ay ang  Filipino Engineers Syndicate Inc..

1964-1967—Konstruksyon para sa Arhepp na bahagi ng Angat Dam.  Ang Arhepp ay kauna-unahang proyekto sa Pilipinas  kung saan ay pinagsama-sama sa disensyo ang ibat-ibang functional  activities tulad ng paglikha ng kuryente (power generation), patubig sa bukirin (irrigation), tubig inumin (water supply), at pamigil baha (flood control).Ito ay ginugulan ng kabuuang halaga na P476.344-M.

1967—Nanalasa sa Gitnang Luzon ang super bagyong Welming (Emma). Dahil sa lakas ng ulan, mabilis na umakyaw ang water elevation sa 212 meters above sea level (masl) kaya’t napilitan ng Napocor na magpatapon ng tubig sa spillway ng dam upang maiwasan ang pag-apaw. Nagsanhi din ito ng pagkasira ng mga kagamitan ng Engineering Construction Inc., (ECI) ng masagasaan ng tubig mula sa spillway.

1967 Setyembre 9—Pinasinayaan ni Pangulong Ferdinand Marcos ang inisyal na operation ng Arhepp. Ito ay may kakayahang lumikha hanggang 246 megawatt ng kuryente.

1968—Kinomisyon ang Angat Dam at nagsimula ang operasyon ng Arhepp.

1972—Naitala ang 4,919 milimetrong ulan sa Angat Dam bilang pinakamataas  o maximum annual rainfall.

27 Oktubre 1978—Nanalasa ang super bagyong Kading (Rita) at dahil sa lakas ng ulan nagbanta ito ng pag-apaw sa dam.  Sa kasagsagan ng bagyuo bandang alas-9 ng gabi, sabay-sabay na binuksan ng Napocor ang tatlong floodgates ng Angat Dam.  Ang bawat floodgates ay may angat o awang na isa hanggang walong metro.  Rumagasa ang mahigit sa 5,000 cubic meters per second (CMS) ng tubig na naging sanhi ng biglaang pagbaha sa malaking bahagi ng Bulacan pagkasira ng pananim at ari-arian at pakasawi ng mahigit 100 buhay. Umabot sa mahigit P100-M ang nasalanta sa Bulacan at sinampahan ng 11 kasong sibil ang Napocor sa RTC

1986 Agosto—Naitala ang pagguho malapit  dating batcher plant ng Angat Dam.  Ayon pa sa ulat, nagkaroon din  leakage sa penstock ng dam at turbine draft tube, nagkaroon bg ng seepage o pagkatas ng tubig  sa  left abutment ng dike ng dam. Kinailangan nito ng agarang pagkukumpuni. Hindi nakapasagawa ng pagsusuri sa penstock dahil hindi ito napatuyuan ng tubig ng Napocor.

Habang nagsasagawa ng imbestigasyon, nagpahatid agad ng kahilingan ang  Napocor sa pamahalaan ng Japan para sa technical assistance sa rehabilitation program.

1987 Pebrero—Agad na tumugon ang Japan, nagsimula ang pag-aaral ng mga dalubhasa ng  Japan International Cooperation Agency (JICA) sa kalagayan ng Angat Damk.

1991 Hulyo 16—Niyanig ng lindol ang Luzon partikular na ang mga Lungsod ng Baguio at Cabanatuan sa Nueva Ecija, ngunit walang naitalang pinsala sa Angat Dam.

1992-Nagsimula ang konstruksyon ng Umiray Angat Transbasin Project (UTAP),  o ang 13-kilometrong tunnel mula sa Umiray, Quezon na pinadadaluyan ng tubig patungo sa Angat Dam.

1992—Nilagdaan ang Memorandum of Understanding sa pagitan ng Bulacan at Metropolitan Waterworks and Sewerage System (MWSS) na nagkakaloob ng kabuuang 230 million liters per day na alokasyong tubiginumin para sa Bulacan dahil sa pag-iiwi ng Angat Dam ng tubig mula sa UATP. Ito ang basehan ng hindi pa natutuloy na Bulacan Bulk Water Supply Project (Bulacan Bulk).

1992—Pinagtibay ng MWSS Board ang resolution na ibinibilang nito ang Bulacan sa kanilang service area.

1993--Nagsimula ang Angat Water Suplly Automization Project (AWSOP) na inireklamo ng Napocor dahil nalugi sila ng P2.77-B, at taunang pagkaluging umaabot sa P36.26-M bawat taon. Ayon sa Napocor ang kanilang energy at capacity losses sa Arheppay dahil  paglilipat ng 15 cms na alokasyong tubig mula sa patubuig ng magsasaka patungo sa karagdagang inumin ng kalakhang Maynila.

1993—Sa taong din ito unang natukoy na ang Angat Dam ay malapit sa Marikina West valley Faultline na nakabalatay sa ilalim ng lupa mula sa Angat Dam hanggang sa Taal Lake sa Batangas. Ayon pa sa dokumentong mula sa  Napocor,” the dike has one of the steepest slope in the world.”

1993—Sa isang memorandum ng Malakanyang, pinagtibay ang pagsasailalim sa Bulacan sa service area ng MWSS.

1997—Sinagasaan ang ng El Nino ang bansa at naitala ang pinakamababang water elevation sa 30-taong kasaysayan ng Angat. Nagtiis ang magsasakang Bulakenyo at pansamantalang ipinagkaloob ang alokasyong tubig sa kanilang bukirin para sa kapakanan ng kalakhang Maynila.  Hindi na nabalik ang alokasyong ipinahiram ng magsasaka sa MWSS.

1997 Disyembre—Iniulat ng Powerlines, isang newsletter ng Napocor ang madaliang pagpapakumpuni sa lownlevel outlet ng Angat Dam na dapat nasimulan noong Pebrero 1999.   Ang low level outlet ay huling nagamit noong 1992 dahil sa El Nino.

2000 Hunyo—Pinangunahan ni dating Pangulong Joseph Estrada ang pagpapasinaya sa 13-kilometrong UATP.

2002 Nobyembre  29—Sa kanyang Report No.1 sinabi ni Dr. Kaare Hoeg ng Norwegian Technical Institute na “the new information about the Marikina Fault and the uncertainties  related to future earthquake loads, and due to the lack of performance monitoring to evaluate the present conditions of the structures, the level of risk involve (product of probability of failure and consequences of failure)  is unacceptable

2004—Nagsampa ng kaso ang Bulacan sa pangunguna ni dating Gob.Josie Del Cruz laban sa Napocor dahil sa hindi pagbabayad ng National Wealth Tax.  Nanalo sa RTC ang kaso, inapela ito ng Napocor sa Court of Appeals na noong 2008 ay kumatig sa Bulacan. Sa kasalukuyan nakabinbin sa Korte Suprema ang kaso.

2004 Nobyembre 25-Nanalasa ang bagyong Winnie sa Gitnang Luzon sa sinundan agad ng bagyong Yoyong.  Naghatid itong pagbaha sa Bulacan noong unang linggo ng Disyembre. Ngunit ang pinakamalaking pinsala nito ay sa UATP.  Nabarahan ng mga troso, tipak ng bato at putikang 13-kilometrong tunnel kaya’t Marso pa lamang ng sumunod na taon ay mababa na ang tubig sa dam. Ang kontrata sa paglilinis at pagkukupuni  sa UATPay nasungkit ng CM Pancho Engineering Corporation.

2005 Pebrero 4 --Iniulat ng Manila Times na sinundan ng Mabuhay ang pagkalat ng mga itim na container sa kailugan ng Sitio Macua sa DRT na bahagi ng Angat dam reservoir. Ang mga itim na container ay pinaglagyan ng mga kemikal na ginamit ng Italyanong kontraktor sa pagbutas ng 130 kilometrong tunnel.

2007 Oktubre-Disyembre—Naging mainit ang mga sesyon sa Sangguniang Panglalawigan na ilang beses na inabot ng hating gabi at madaling araw hinggil sa usapin sa Bulacan Bulk. Ang usapin ay nakasentro kung iuurong o itutuloy ang demanda ng kapitolyo laban sa MWSS hinggil sa di pagbabayad ng national wealth tax. Sa huli,namayani ang kapanalig sa Sanggunian ni Gob. Mendoza at napagtibay ang kasunduan sa pagitan ng MWSS at Bulacan.

2009 Setyembre—Inilahad sa Sangguniang Panglalawigan ng Bulacan ni Dr. Renato Solidum, executive director ng Philippine Institute of Volcanology and Seismology (Phivolcs) na ang MWVF ay may 200 metro lamang ang layo sa dike ng Angat Dam at ito ay hinog na samuling paggagalaw.  Ayon kay Solidum, ang MWVF ay gumagalaw tuwing ika-200 hanggang ika-400 taon at noong 2009ay tapos na ang ika-200 taon kayat anumang oras ay maaaring gumalaw ito at lumikha ng lindol na may lakas na 7.2magnitude na posibleng sumira sa Angat Dam.  Dahil dito nagbabala si Solidum na “Bulacan must prepare for the worst.”

2009 Setyembre 25—Isang araw bago manalasa ang Bagyong Ondoy, sinabi  ng Provincial Disaster Coordinating Office (PDCRO) na nakahanda ang Bulacan sa malawakang kalamidad tuladng pagbaha.

2009 Setyembre 26—Nagbuhos ng malakas na ulang ang bagyong Ondoy sa Kalakhang Maynila na naging sanhi ng malawakang pagbaha; maging sa bahagi ng San Jose delMonte City, Bulacan at Rodriguez, Rizal  na naging sanhi ng malalim at biglang pagbaha sa mga bayan ng Sta. Maria, Bocaue, Balagtas, Marilao, Obando at Lungsod ng Meycauayan. Makalipas ang isang linggo, lumubog sa backflood ang Hagonoy at Calumpit.

2009 Setyembre 27—Sa agarang pulong ng Provincial Disaster Coordinating Council ng Bulacan (PDCC) isinalalim ang lalawigan sa state of calamity. Inamin din ni Gob. Joselito Mendoza na hindi handa ang Bulacan sa malawakang kalamidad.

2010 Hulyo –Naitala ang pinakamababang water elevation sa Angat Dam dahil sa El Nino. Ito ay bumaba sa 157 masl.

2011 Setyembre 27—Nanalasa ang Bagyong Pedring nanaging dahilan pagkaputol ng kuryente at pagbaha sa Hagonoy at Calumpit.

2011 Oktubre 1—Nasa kalaliman pang bahang hatid ng bagyong Pedring ay nanalasa naman ang bagyong Quiel na naghatid ng dagdag na pagbaha.  Isa sa sinisi sa pagbaha ay ang pagpapatapon ng Angat Dam ng halos 1,700 cms ng tubig.

2011 Oktubre 8—Galit na nagpahayag si Gob. Wilhelmino Alvarado sa palatuntunang Rommel Ramos Po sa radyo DWSS na pangungunanan niya ang pagsasampa ng kaso laban sa Napocor dahil sa paghabang hatid ng pagpapatapon ng Angat Dam ng tubig sa Angat river na sinisisi sa pagbaha sa Hagonoy at Calumpit.  Kinabukasan, ito ay nalathala sa bilang banner story sa pahayagang Philippine Star.

2011 Oktubre 10—Ipinatawag sa Malakanyang si Alvarado hinggil sa banta ng pagdedemanda laban sa Napocor. Ngunit naigiit niya ang agarang pagpapakumpuni sa Angat Dam.

2011 Nobyembre 11—Sa kauna-unahang pagkakataon, nakaharap ng pormal ni Alvarado ang dam safety expert na taga-Hagonoy na si Inhinyero Roderick Dela Cruz na nakabase sa California. Ipinakita ni dela Cruz ang kanyang presentasyon kay Alvarado na nag-alok na isasama siya sa Technical Working Group para sa Angat Dam Rehabilitation program.

2011 Nobyembre 11—Isinumite ni Kint. Marivic Alvarado anfg panukalang batas para sa national dam safety program sa Kongreso matapos ang isang privileged speech.

2011 Disyembre—Naglabas ng $1-M ang Power Sector Assets and Liabilities Management (Psalm)  para sa pagsasagawa ng feasibility study sa katatagan ng Angat Dam. Ito ay ipinagkaloob sa Tokin & Taylor International (T&T) at Engineering and Development Corporation of the Philippines (Edcop).

2012 Mayo—Nakumpleto ang feasibility study ng T&T at Edcop at kabilang sakanilang rekomedasyon ay ang agarang rehabilitasyon sa Angat Dam, pagtatayo ng auxiliary spillway at pagsasagawa ng site specific seismic study.

2012 Hunyo 21—Inihayag ni Arkitekto Gerry Esquivel, administrador g MWSS na nakahanda na ang P5.7-Bilyon piso para sa rehabilitasyon ng Angat Dam na magmumula sa pondo ng MWSS. Sinabi ni Esquivel na aabutin ng 42 buwan ang rehabilitasyon at ito at matatapos sa 2016.

2012 Oktubre—Kinatigan ng Korte Suprema ang pagwawagi ng Korea Water Resources Corporation (K-Water) bilang winning bidder sa pagsasapribado ng 246 megawatt na Arhepp.

2013 Pebrero—Makalipas ang mahigit anim na buwan, hindi pa nasimulan ang bidding para sa rehabilitasyon ng Angat Dam. Ngunit ayon sa MWSS, malapit na itong masimulan.

2013 Abril 4—Matapos ang exit presentation ni Inhinyero dela Cruz sa ilalim ng Balik-Scientist Programng DOST at nangako si Gob. Alvarado na isusulong ang dam safety legislation sa Sangguniang Panglalawigan.

2013 Agosto 30—Tiniyak ni MWSS Gerry Esquivel na mapipirmahan na I Pangulong Aquino ang dokumento para sa pagpapasubasta ng rehabilitasyon ng Angat Dam sa Disyembre 2013.

2013 Setyembre 2—Pormal na ipinagkaloob ng Psalm ang Certificate of Effectivity (CoE) sa K-Water bilang winning bidder sa pagsasapribado ng Arhepp.

2013 Setyembre 17—Humarap sa Sangguniang Panglalawigan si Inhinyero Dela Cruz dalawang araw matapos tumanggap ng Dangal ng Lipi award. Nagbigay siya ng presentasyon sa SP hinggil sa kahalagahan ng local legislation sa dam safety program. Pinaboran itong SP, pero hanggang ngayon ay wala pahg nabubuong panukalang batas.

2013 Oktubre 15—Niyanig ng malakas na lindol ang Bohol at Cebu. Ngunit ang higit na takot at tumining sa Bulacan partikular na kay Alvarado na nagsabing, “paano kung sa Bulacan nangyari yon?”

2013 September 15—Inilahad ng isang consultant ng MMDA samga mamamahayag na lumahok sa Lopez Jaena Journalism Fellowship on Disaster Reporting sa UP-Diliman na kung gagalaw ang MWVF at lilikha ng lindolna 7.2 magnitude, aabot sa 33,000 ang masasawi sa kalakhang Maynila, at posibleng magkaputol-putol sa 4,000 piraso ang aqueduct at pipelines ng MWSS, Maynila at Manila Water na maghahatid ng krisis sa tubig sa kalakhang Maynila.

2013 Oktubre 16—Nagpulong ang mga kinatawan ng MWSS, Napocor, National Irrigation Administration (NIA) at Bulacan sa Edsa Shangrila Hotel.  Sentro ng usapan ay kung sino ang magpapakumpuni gagastos sa pagpapakumpuni sa Angat Dam. Ito ay matapos ilahad ni Esquivel na bahagi ng kontrata ng K-Water ay ang paggastos ss isasagawang rehabilitasyon sa Angat Dam.

2013 Nobyembre—Isang mataaas na opisyal ng Napocor ang nagsabi sa Mabuhay na natakot si Esquivel na mademanda kaya iniurong ang P5.7-B pondo para sa pagpapakumpuni sa Anhat Dam. Ito ay dahil kung popondohan din ito ng K-Water, lalabas na doble ang gastos.

2013Nobyembre 8—Sinagasa ng super bagyong Yolanda ang Visayas, Mabuti na lamang at hindi nagbago ng direksyon dahil kung bahagyang kumanan ito sa Luzon, malaki ahg posibilidad naumapaw ang Angat Dam dahil noon ay 208 masl na ang water elevation nito, Kinabukasan, umangat sa 211 masl ang tibig sa Angat Dam.

2013 Nobyembre 12—Nagpulong ang mga kasapi ng Angat Dam and Dyke Safety Technical working Group sa La Mesa Dam sa Quezon City kung saan ay inihanda ang ipiprisintang Emergency Action Plan (EAP) sa Bulacan bilang paghahanda sa posibleng pagkasirang Angat Dam dahil sa lindol o bagyo.

2013 Nobyembre 12—Tiniyak ni Noel Ortigas, Executive Vice President ng EdCop na 50 hanggang 60 porsyento ng Bulacan ang maaapektuhanng posibleng pagkasira ng dam kapag luminddol ng malakas.  Sa paglilinaw sa kanya, sinabi ni Ortigas na hindi lahat ng may 3-M Bulakenyo aay mamamatay.  Sa halip ay tinataya niyang aabot lamang sa 100,000 ang mamamatay sa Bulacan.

2013 Nobyembre 28—Igiiit ni Gob. Alvarado na masyadong konserbatibo ang pagtaya ni Ortigas at nagpahayag siya ng pangamba na maaaring umabot 500,000 ang masasawi sa Bulacan. Inihalintulad pa niya ang posibleng pagkasirag Angat Dam sa pagsabog ng bombing nukleyar dahil sa posibilidadng dami ng masasawi.

2013 Disyembre 2—Pinangunahan ng PDRRMC ang pulong para sa pagsasagawa ng earthguak at dam break drillsa Bulacan.

2013 Disyembre 9—Orientasyon para sa mga mamamahayag at mga rescue groupna kalahok sa pagsasagaawa ng earthquake at Angat Dam Break Drill. Nsgsimula na ring ilabas ng PDRRMO ang mga flood o inundation map para sa mga bayang apektadong dam break.

2013 Disyembre 13—isinagawa ang Earthquake at Dam Break Drill sa Lungsod ng Malolos na nilahukan ng may 12,500 mag-aaral at mga kawani ng gobyerno.

Bago matapos ang nasabing drill,hindi kayat din ang bawat bayan at lungsod sa Bulacan na maghanda ng sariling EAP at magsagawang sariling dam break drill. Dino Balabo

Pagyanig ng Bustos dam, pinangangambahan

 

Bustos Dam

BUSTOS, Bulacan—Hindi pa man umaabot sa spilling level na 17.80 meters above sea level (masl) ang tubig sa Bustos Dam ay nagpapatapon ng ito ng tubig.

Ito ay bahagi ng pangangalaga sa nasabing dam na may anim na rubber gates, kaya’t ito ang itinuturing na longest rubber gate dam, sa buong Asya.

Ayon kay Inhinyero Precioso Punzalan ng National Irrigation Administration na siyang namamahala sa dam, iniiwasan nila na umbot sa 17.70 masl ang water elevation doon upang maiwasan ang pagyanig.

“Pag mataas ang water elevation, yumayanig ang mga rubber gates, lalo na pag may alon sa reservoir,” sabi ni Punzalan.

Engr. Punzalan habang kinakapanayam ng BulSU students

Ipinaliwanag niya na ang nasabig pagyanig ay maaaring maging sanhi ng pagkasira ng rubber gate dahil ang mga ito inflatable o may hangin sa loob at nakaturnilyo lamang.

“Siyempre, kagagalaw niyan dahil sa vibrations, maaaring masira yung pagkakaturnilyo at tuluyang matanggal ang rubber gate,” sabi niya.

Ito ay maaaring magbunga ng pagbaha sa mga bayan sa ibaba ng Ilog Angat, tulad ng mga bayan ng Pulilan, Calumopit at Hagonoy; bukod pa sa maaaring maging problema sa kakulangan sa patubig ng magsasaka sa panahon ng tag-araw.

Ayon kay Punzalan, kapag nabuksan ang isang rubber gate ng Bustos Dam ay tatapon ang 500 hanggang 600 cubic meters per second ng tubig.

Ang dami ng tubig na ito ay maaring maghatid ng pagbaha sa Calumpit at Hagonoy, depende sa kalagayanng ng panahon at lalim ng tubig sa kailugan.

Bukod sapag-iingat sa pagyanig ng mga rubber gate, iginiit pa ni Punzalan, sa talagang pinananatili nila ang water elevation sa dam upang hindi ito umabot sa lalim na 18 masl.

Ipinaliwanag niya na kapag umabot sa nasabing water elevation ang tubig sa dam, awtomatikong  iimpis ang dalawang inflatable rubber gate nito.

Ang pag-impis na ito ay magiging daan sa pagtapon ng 1,200 hanggang 1,500 cms na tubig depende sa lalimng tubig sa reservoir at kalagayan ng panahon.

Ang dami ng tubig na tatapon ay tiniyak ni Punzalan na muling magpapalubog s amga bayan ng Pulilan,Paombong, Hagonoy at Calumpit.

Matatandaan na noong 2011, lumubog ang mga nasabing bayan sa malalim na baha dahil sa pagpapatapon ng Bustos Dam ng 1,700 cms ng tubig hatid ng malakas na ulan ng Bagyong Pedring.

Ang 700cms na pinatapon ng Bustos Dam noon ay nagmula sa Angat Dam sa bayan ng Norzagaray.

Sa kabila namn ng unti-unting pagpapatapon ng tubig ng Bustos Dam, ipinaliwanag ni Punzalan, na hindi naman maaring pababain ng husto ang water elevation sa dam.

“Hanggang 17.40 masl lang ang pinakamababa naming dahil kailangang may tumapong tubig sa ibabaw ng rubber gates,”sabi niya.

Ipinaliwanag na Punzalan naang pagpapaapaw ng tubig sa rubber gates ay bahagi rin ng pangangalaga sa mga ito.

Ayon kay Punzalan,kailangan panatilihin nilang malamig ang rubber gate sa pamamagitanng pagpapaapaw ng tubig upang hindi ito direktang nasisinagan ng araw.

Katuladng ibang produktong yari sa goman, ang direktang sikat ng araw ay nagpaparupok sa rubber gate ng dam.

Inihalimbawa ni Punzalan ang sumabot na rubber gate dam sa Florida sa Estados Unidos.

Ang nasabing rubber gate ay halos kasabay na ikinabit ng rubber gates sa Bustos Dam.

Iyon ay nasira dahil init ng araw na halos nakakatulad ng panahon sa Pilipinas.

“Tropical country ang Pilipinas at halos nakakatulad ng panahon sa Florida kaya, maaring masira din agad ang mga rubber gates natin,” sabi niya.

Batay sa pag-aaral,ang rubber gates ay mag life span na 30 taon, ngunit ang sumabog sa Florida ay nasa 15 taon pa lamang.

“Dahil yan sa constant exposure to element katulad ng sunlight,”sabi niya.

Ang kalagayang ito ay ikinabahala ng mga opisyal ng NIAat ni Gob. Wilhelmino Alvarado kaya’t nanawagan sila sa Malakanyang para sa mabilisang pagpapakumpuni sa Bustos Dam.

Ito ay upang palitan ng kongkreto ang mga rubber gate.

Agad namang tumugon ang Malakanyang sa pamamagitan ng paglalaan ng may P1.5-Bilyong pondo.

Ngunit hanggang sa kasalukuyan ay  hindi panasisimulan ang pag-aaral sa gagawing disenyo sa dam, at hindi pa rinnasisimulan ang pagpapasubasta sapagkukuni nito.  Dino Balabo

PAALALA:  Ang artikulong ito ay unang nalathala sa October 4-10, 2013 edition ng Mabuhay.