Friday, January 20, 2012

Dumagat School bibigyan ng power at water supply ng Napocor


 LUNGSOD NG MALOLOS – Matapos ang mahabang paghihintay, pagkakalooban ng ng power at water supply ng ang mga paaralang Dumagat sa bayan ng Norzagaray.

Ito ay matapos pagtibayin at tugunan ng National Power Corporation (Napocor) ang kahilingan ni Bulacan Gov. Wilhelmino Alvarado.

Ang unang paaralang makikinabang ay ang Coliangco Dumagat School sa Sitio Dike, Brgy. San Lorenzo, Norzagaray, Bulacan na nasa loob ng bakuran ng Napocor na siyang namamahala sa Angat River Hydro Electric Power Plant (Arhepp).

Ayon kay Froilan Tampinco, presidente ng Napocor, hiniling ito ni Alvarado na mabigyan ng probisyong kuryente at tubig ang paaralan ng mga Dumagay kaugnay ng katatapos na 4th Regional Full Council Meeting ng Cental Luzon Regional Development Council na isinagawa noong  nakaraang buwan sa Baler Sports Complex, Baler Aurora.

Sinabi ni Tampinco na magkakabit ang Napocor ng mga solar panels upang maiwasan ang hindi awtorisadong paggamit ng kuryente at magtatayo rin sila ng artesian well para sa maiinom na suplay ng tubig.
“We are now in the process of preparing the design and the estimate of the needed utilities for this project,” ani Tampinco.

Ang Coliangco Dumagat School ay may dalawang gusali na may tig-dalawang silid aralan.

Ito ay itinayo may 10-taon na ang nakakaraan sa pamamagitan ng donasyon ng  Coliangco Family at ng Antonio Roxas-Chua Foundation sa ilalim ng “Operation Barrio Schools Project” ng Federation of Filipino-Chinese Chamber of Commerce and Industry (FFCCCI) at ng Bulacan Filipino-Chinese Chamber of Commerce (BFCCC).

Mula ng maitayo ang nga gusali hanggang sa kasalukuyan ay walang suplay ng kuryente ang nasabing paaralan, samantalang isang non-governmental organization ang nagdionasyon noong nakaraang taon ng tangke ng tubig para sa rainwater harvesting o pagsahod ng tubig ulan.

Sa isang pagbisita noong nakaraang taon nakita ni Gob. Alvarado ang kalagayang ito, maging ng mga katutubong nakatira sa paligid ng Coliangco Dumagat School.

“This is a perfect irony. Napocor generates power and Angat Dam has so much water but Dumagat school and community don’t have power and potable water supply,” ani ng Gobernador.

Iginiit pa niya na ang nasabing proyekto ay simiula pa lamang at isusunod na nila ang iba pang paaralan ng mga Dumagat na matatagpuag sa ibat-ibang pamayanan sa loob ng kabundukan ng Sierra Madre sa taong ito. (dino balabo)

No comments:

Post a Comment