Ikalawang termino ni VG Fernando sasabayan ng pagbabalik sa teleserye

MALOLOS—Tiniyak ng Bise-Gobernador ng Bulacan na higit siyang magiging aktibo sa mga teleserye at muling mapapanood sa telebisyon matapos na muling mahalal.

“Babalik ako sa mga teleserye, I will be more active this time,” sabi ni Bise-Gob. Daniel Fernando sa isang esklusibong panayam.

Isa sa sa mga layunin ng pagbabalik sa telebisyon ng aktor na naging pulitiko ay makaipon ng pondo para sa matustusan ang itinayo niyang Dunong Filipino foundation.

Ang Dunong Filipino Foundation ay nagbibigay ng iskolarsip sa mga kapuspalad na mag-aaral sa Bulacan.

“Nagsimula na kami ngayong taon ito at may 100 scholars na kami, balak namin ay magdagdag pa para mas marami ang matulungan,” ani ng Bise Gobernador.

Binigyang pa ng diin ni Fernando na ang programa ng Dunong Filipino foundation ay isang ayuda sa sa programa ng kapitolyo.

Batay sa tala, umaabot na sa 13,000 ang bilang ng mga kabataang nasa ilalim ng scholarship program ng kapitolyo.

Ngunit sa kabila nito, may mga Bulakenyo pa rin na hindi nakakapasok sa iskolarsip kaya binuo ni Fernando ang Dunong Filipino foundation.

“Tulong naming ito sa programa ni Gob. Willy Alvarado, kaya kalahati lang ng scholarship ang ibinigay namin,” sabi ni Fernando.

Iginiit pa niya na ang kanyang kikitain sa mga teleserye ay kanyang ibubuhos sa Dunong Filipino Foundation.

Dahil dito itinanong ng mamamahayag na ito ang posibilidad na maapektuhan ng pagbabalik sa telebisyon ni Fernando ang kanyang tungkulin bilang bise gobernandor ng lalawigan.

“Hindi naman, nakipag-usap na ko para sa schedule para hindi magkasabay,” sabi niya patungkol sa mga producer at network.

Ayon pa sa kanya posibleng kontrabida ang maging papel niya sa teleserye.

Bilang aktor at bise gobernador ng lalawigan itinanong din ng mamamahayag na ito kung ano ang higit na mas mahalaga kay Fernando.

“Mahirap talikuran yung isa para sa isa.  Napapaligaya ko ang mga tao kapag nasa teleserye ako dahil na-e-entertain ko sila, pero napapasaya ko rin sila kapag naglilingkod ako sa kanila,” aniya.

Si Fernando ay produkto ng mga grupo san a gumaganap sa teatro sa Bulacan hanggang gumanap siya sa pelikulang “Scorpio Nights 1.”

Siya ay nagsimula sa pulitika matapos na italaga bilang tagapangulo ng Sangguniang Kabataan sa Barangay Tabang,Guiguinto.

Noong 1998, natalo siya sa kanyang kandidatura bilang bise alklade ng Guiguinto, ngunit nahalal na Bokal ng ikalawang distrito noong 2001 at 2004.

Noong 2007, natalos siya sa kanyang kandidatura bilang bise gobernador ng Bulacan, ngunit nagwagi siya noong 2010 at muling nahalal nitong Mayo 13 kung kailan ay nakaipon siya ng kabuuang botong 914,960.

Ito ang pinakamataas na bilang ng boto na nakuha ng isang lokal na kandidato sa isang halalan sa Bulacan. (Dino Balabo)

Bokal Fermin bagong Senior Board Member

MALOLOS—Nasungkit ni Bokal Michael Fermin ang karangalan bilang Senior Board Member ng Sangguniang Panglalawigan matapos magtamo ng pinakamataas na porsyento ng boto.

Ikinagalak ito na Fermin at nagpasalamat sa pagtangkilik sa kanya ng mga botante mula sa unang distrito.

“Maraming salamat, hindi ako makapaniwala  na ako ang magiging Senior Board Member,” aniya sa isang panayam sa telepono noong Mayo 21.

Ito ay dahil sa si Fermin ay nagmula sa bayan ng Calumpit na nasasakop ng unang distrito.

Kumpara sa Lungsod ng Malolos at bayan ng Hagonoy, mas mababa ang bilang ng botante sa Calumpit.

Ang Lungsod ng Malolos ay sinasabing teritoryo ng muling nahalal na si Bokal Ayee Ople at sa Hagonoy naman nagmula ang muli ring nahalal na Bokal na si Felix Ople.

Batay sa tala ng Commission on Elections (Comelec), umabot sa 282,857 aqng botante sa unang distrito na bumoto sa katatapos na halalan.

Sa nasabing bilang, umabot sa 167,051 ang nakuhang boto ni Fermin para sa 59.05 porsyento ng kabuuang bilang ng bumotong botante.

Pumangalawa naman sa kanya si Felix Ople na nakakuha ng botong 157,104 o 55.54 porsyento; at pangatlo si Ayee Ople na ang botong 151,776  ay 53.65 porsyentong kabuuang bilang ng bumoto.

Ang pumang-apat ay si Bokal Enrique Dela Cruz na may kabuuang botong 153,263 o 52.81 porsyento ng kabuuang bilang ng bumoto na 290,164 sa ikalawang distrito.

Ang panglimang puwesto ay nakuha ni Bokal Enrique Delos Santos ng ikapat na distrito na may kabuuang botong 193,446 o 50.18 porsyento ng kabuuang bilang na 385,449 ng botante na bumoto sa ika-apat na distrito.

Ayon kay Fermin, hindi niya inaasahan na magiging senior board member dahil mas mataas ang botong nakuha ng mga kapwa halal na Bokal.

Ngunit ayon kay Abogado Elmo Duque, ang Provincial election supervisor sa Bulacan ang pagpili sa Senior Board Member ng Sangguniang Panglalawigan ay batay sa porsyento ng bilang ng boto ng nanalong kandidato at kabuuang bilang ng bumoto sa kanilang distrito.

Ang resulta ng pagpili sa Senior Board Member ay inilabas ng Comelec noong Martes, Mayo 21 o walong araw matapos ang halalan.  (Dino Balabo)

12 bagong alkalde nalalal sa Bulacan

Mayor-elect Boy Cruz of Guiguinto

MALOLOS—Namayani ang mga kandidato ng Liberal Party-National Unity Party (LP-NUP) coalition sa Bulacan, ngunit 12 bagong  alkalde ang nahalal sa 21 bayan ng lalawigan.

Kaugnay nito,pormal na iprinoklama noong Martes ng gabi, Mayo 14 ng provincial board of canvassers (PBOC) sina Gob. Wilhelmino Alvarado at kanyang maybahay na si Kint. Marivic Alvarado.

Ito ay dahil sa kapwa walang kalaban ang mag-asawa, ngunit hindi sila dumalo sa proklamasyon.

Sa iba pang halal na posisyong panglalawigan kabilang ang apat pang distrito ng kongreso at distrito para sa Sangguniang Panglalawigan, nanguna rin sa bilang ng boto ang kandidato ng koalisyon.

Batay sa monitoring report ng PBOC, tinalo ni Angat Vice Mayor si incumbent Mayor Reggie Santos; samantalang nagtagumpay ang indipendienteng si Carol Dellosa na pigilan ang tangka ni Ferdinand Estrella na halinhan ang kanyang ama na si Mayor Romy Estrella sa Baliwag.

Team Calumpit

Sa Calumpit, naiproklama na si Dr. Jessie De Jessie noong Lunes bilang kapalit ng kanyang kapatid na si outgoing mayor James De Jesus; samantalang matagumpay na nakabalik sa pwesto si dating Mayor Ambrosio Cruz ng talunin si incumbent Mayor Isagani Pascual ng Guiguinto.

Sa Hagonoy, tinalo ni Raulito Manlapaz, pangulo ng Association of the Barangay Captain si incumbent Mayor Angel Cruz; samantalang papalitan ni mayor-elect Tito Santiago si outgoing mayor Epifanio Guillermo sa Marilao sa Hunyo 30.

Sa Norzagaray, pinutol ni Fred Germar ang 15-taong pamamayagpag ng pamilya Legazpi ng talunin niya si incumbent Mayor Feliciano Legazpi; samantalang sa Obando; nagtagumpay sa ikalawang pagtatangka sa pagka-alkalde si Edwin Santos ng talunin si incumbent Mayor Orencio Gabriel.

Mayor-elect Manlapaz & Vice-mayor elect Santos

Sa  Paombong, ginulat ni Abogado Isagani Castro, isa ring indipendiente ang marami ng talunin si Maryann Marcos, ang maybahay ni incumbent Mayor Donato Marcos; samantalang hahalinhan ni Jocell Vistan ang kanyang inang si outgoing Mayor Tessie Vistan ng Plaridel sa Hunyo matapos talunin ang tatlon pang kandidato.

 Sa San Ildefonso, Galvez pa rin ang nanalong alkalde matapos talunin ni Gerald Galvez ang kanyang tiyuhin na si dating Mayor Edgardo Galvez na nagtangkang palitan ng kanyang anak na si incumbent Mayor Carla Paula Galvez Tan na noong Disyembre ay umurong upang magbigay daan sa kanyang ama.

Sa bayan ng San Rafael, nabahiran ng alegasyon ng pamimili ng boto ang pagwawagi ni Vice Mayor Cipriano Violago laban kay incumbent Mayor Lorna Silverio.

Mayor-elect Violago

Ang iba pang alkalde sa Bulacan na muling nahalal ay sina Mayor Romy Castro ng Balagtas, Eduardo Villanueva ng Bocaue, Patrick Neil Meneses ng Bulakan, Arnel Mendoza ng Bustos, Ronaldo Flores ng Donya Remedios Trinidad, Enrico Roque ng Pandi, Vicente Esguerra ng Pulilan, Roderick Tiongson ng San Miguel, at Bartolome Ramos ng Sta.Maria.

Muli rin nahalal sina incumbent Mayor Christian Natividad, Joan Alarilla at Rey San Pedro  ng mga lungsod ng Malolos, Meycauayan at San Jose Del Monte, ayon sa pagkakasunod.  (Dino Balabo)

Mabagal na na transmission ng ER, isinisi sa maulap na papawirin

 HAGONOY, Bulacan—Ikinagalak ng mga resident eng bayang ito at iba pang bahagi ng lalawigan ang maulapat makulimlim na panahon noong araw ng halalan, Mayo 13.

Ang kalagayang ito ay nagpatuloy pa hanggang noong Mayo 15.

Ginhawa ang hatid ng makulimlim na papawirin sa mga tao dahilnagsilbing pananggalang ito sa init na hatid ng tag-araw.

Ngunit para sa mga bumubuo ng Commission on Elections (Comelec), perwisyo ang hatid ng maulap na papawirin dahil naantala nito ang pagpapahatid ng resulta ng halalan.

Ang pagkaantalang ito ay nagbunga ng pagkaantala ng proklamasyon sa ilang kandidato na nanalo sa lokal at maging sa mga pambansang posisyon.

Ayon kay Abogado Elmo Duque, provincial election supervisor sa Bulacan, ang maulap na papawirin ay naging sanhi ng pagpapahatid ng resulta ng halalan mula sa mga bayan patungo sa kapitolyo, at patungo sa National Board of canvassers.

 “Our technicians told us that cloudy sky is keeping us from transmitting canvassed results of the elections to the NBOC,” ani Duque sa isang panayam noong Mayo 15 o dalawang araw matapos ang halalan.

Sa pagkakataong iyon, sinabi ni Duque na naiproklama na ang mga nanalong kandidato, partikular na ang mga alklade at bise alkalde salahat ng bayan at lungsod sa lalawigan.

Ngunit naantala ang pagpoproklama samga kandidato sa mga panglalawigan at pambansang halal na posisyon.

Batay sa proseso ng Comelec,ang mga resulta ng halalan ay dapat ipahatid ng mga Municipal Board of Canvassers (MBOC) sa Provincial Board of Canvassers (PBOC) sa pamamagitan ng electronic transmission gamit ang signaling telepono.

Ngunit dahil sa maulapna papawirin, naantala ang electronic transmission, kaya’t inatasan ni Duque ang mga electionofficer sa bawat bayan na ihatid ng personalang mga certificate of canvass sa PBOC.

Sinundan ito ng manwal na pagpapahatid ng PBOC ng resulta ng halalan mula sa mga bayan at lungsod sa NBOC.

Batay sa pahayag ni Duque, sinabi niya na ayon sa mga technicians ng Comelec, ang maulap na papawirin ay nakakasagabal sa signal ng mga satellite na gamit sa electronic transmission ng mga resulta.

“Kaya mabagal ay dahil sa kulimlim,” ani Duque at iginiit na paulit0ulit nilang tinangka ang pagsasagawa ng manual transmission o ang pagpapahatid ng reulst ang halalan mula sa MBOC na tinanggapng PBOC patungo sa NBOC.

Ito ay sa pamamagitan ng pagpapahatid ng resulta na nakalaga sa compact disc (CD).

Sinabi niya na kung hindi maulapang papawirin,natapos sana nila ang lahat ng proklamasyon at transmission ng resutta noong Martes ng gabi, o 24 na oras matapos ang halalan.  (Dino Balabo)

Pinakamaraming boto sa kasaysayan ng halalan sa Bulacan, nakamit ni Fernando

MALOLOS—Congrats! Ang lakas mo Vice Gov!

Ito ang magkakahiwalay na pagbating ipinahatid ng mga Bulakenyo sa muling nahalal na Bise-Gobernador ng Bulacan na si Daniel Fernando matapos malathala sa Mabuhay Newspaper-Bulacan fan page ang larawan niya na may nakalagay na mensaheng “highest vote earner.”

Ito ay dahil sa ang bise-gobernador na isa ring artista ang nag-iisang kandidato sa lokal na posisyon na nakaipon ng pinamakataas na bilang ng boto sa isang halalan sa kasaysayan ng Bulacan.

Kaugnay nito, apat pang artista o celebrity na kumandidato sa ibat-ibang halal na posisyon sa lalawigan ang hindi pinalad na magwagi katulad ni Fernando na unang nakilala sa pelikulang “ScorpioNights 1.”

Ayon kay Abogado Elmo Duque, provincial election supervisor ng Commission on Elections (Comelec) sa Bulacan, mahigit sa kalahati ng 1,497,873 rehistradong botante sa Bulacan ang bumoto sa releksyunistang bise gobernador na hinamon ng dalawang katunggali.

Batay sa certificate of canvass and proclamation (COCP) na ipinagkaloob ng Provincial Board of Canvassers (PBOC) kay Fernando, umabot sa 853,558 Bulakenyo ang bumoto sa bise gobernador.

Ngunit hindi pa kasama sa nasabing bilang ang boto mula sa lungsod ng Meycauayan.

Batay sa pinal na tala ng PBOCang kabuuang botong naipon ni Fernando ay 914,960.

Ang nasabing bilang ay mas mataas sa mahigit 894,593 botong naipon ni Gob. Wilhelmino Alvarado na kumandidato bilang unopposed o walang kalaban.

Ang kabuuang botong naipon ni Alvarado ay ang pinakamatyaas na boto para sa isang gobernador sa kasaysayan ng lalawigan.

Ayon kay Duque ang naipong boto ni Fernando sa halalan ngayong 2013 ay ang pinakamataas na bilang ng boto na naipon ng isang lokal na kandidato sa isang halalan sa kasaysaysan ng Bulacan.

Sa panayam ng Mabuhay, itinanong kay Duque kung ang bilang ng botong naipon ni Fernando ay pinakamataas din sa iba pang lalawigan Luzon.

Ngunit ayon kay Duque, hindi pa niya ito masabi at iginiit na “I could only speak for this province.”

Ang mahigit 800,000 botong naipon ni Fernando sa katatapos na halalan ay higit na mas mataas sa botong mahigit na 535,000 sa halalan noong 2010.

Sa panayam ng Mabuhay matapos ang proklamasyon, mapakumbabang inilarawan ni Fernando ang bilang ng botong naipon ng kanyang sabihing “tsamba lang.”

Sa patuloy na pagtatanong ng Mabuhay sinabi niya na”siguro naramdaman ng tao na ang ating tanging layunin ay maglingkod para sa kapakanan ng lalawigan.”

Hinggil sa mga kapwa artista o celebrity na hindi pinalad sa kanilang kandidatura, simpleng ang naging mensahe ni Fernando.

“May bukas pa, kung talagang nasa puso ang paglilingkod, ituloy lang ninyo,” aniya at idinagdag pa na ang mga artista ay hindi lang popularidad ang puhunan, sa halip ay may puso ring handang maglingkod.

Ang iba pang celebrity na kumandidato sa Bulacan at ang artitang si Alex Castro na natalo bilang Bise-Alkalde sa Marilao; at ang mang-aawit na si Rey Valera na natalo rin sa pagka-bise alkalde ng Meycauayan.

Maging ang mang-aawit na si Imelda Papin ay hindi pinalad sa pagka-kongresita ng Lone District ng Lungsod ng San Jose Del Monte; gayundin ang komedyanteng si Long Mejia na muling natalo sa pagka-konsehal Calumpit.

Itoang ikalawang pagkatalo sa nasabing posisyon Mejia, samantalang si Castro ay unang nahalal na konsehal ng Marilao noong 2010.

Ipinayo pa ni Fernando sa mga natalong celebity na “huwag kayong susuko” na batay sa kanyang sariling karanasan.

Matatandaan na noong 1998, kumandidatongunit natalong bilang bise alkalde ng Guiguinto si Fernando; ngunit noong 2001, siya at nahalal na Bokal ng ikalawang distrito ng lalawigan.

Muli siyang nahalal noong 2004, ngunit noong 2007, kumandidato siya bilang bise gobernador; ngunit tinalo siya noon ni Kint. Wilhelmino Alvarado.

Noong 2010, nagtambal sina Alvarado at Fernando at kapwa sila nagwagi bilang gobernador at bise gobernador ayon sa pagkakasunod.

Bago pumasok sa pulitika si Fernando, siya ay itinalaga at nanungkulan bilang tagapangulo ng Sangguniang Kabataan ng Barangay Tabang sa bayan ng Guiguinto.

Kasunod nito ay ang pagpasok niya sa teatro noong dekada 80 hanggang sa mapabilang sa bumubuo ng pelikulang “Scorpio Nights 1.” (Dino Balabo)